Nutaarsiassat


2017 2016 2015 Flere år...

10-04-2017

Tamakkiisumik unammilleqatigiiffiusumik neqeroortitsinerni ammasuni Kalaallit Nunaannut iluaqutaasussat kisimik aalajangiisuussappata, illersornissamut isumaqatigiissut 1951-imeersoq, tamatumalu kingorna tapiliunneqartut Kalaallit Nunaata soqutigisaasa qulakkeernissaanut naammanngillat.

”Nunanut Allanut Sillimaniarnermullu Ataatsimiititaliap aamma Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisup erseqqissarusuppaat:

 

Kalaallit Nunaannut siumut sammisumik, Pituffimmi sullissinissamut isumaqatigiissut Kalaallit Nunaanniit peqataaffigineqanngitsumik suliarineqalissappat, Kalaallit Nunaanni USA-p sakkutooqarfiata Kalaallit Nunaaniinneranut pitsaaqutit qulakkeernissaannut tunngatillugu pissutsit ajorseriartorujussuussapput.

 

Taamaattumik Kalaallit Nunaata siumoortumik piumasaraa Pituffimmi kiffartuussinissamik isumaqatigiissummit aallaavilimmik niuernermut atasumik agguagarsiaqartaleqqinnissaq maangamut Kalaallit Nunaata pisarsimasai assigalugit.

 

Tamakkiisumik unammilleqatigiiffiusumik neqeroortitsinerni ammasuni Kalaallit Nunaannut iluaqutaasussat kisimik aalajangiisuussappata, illersornissamut isumaqatigiissut 1951-imeersoq, tamatumalu kingorna tapiliunneqartut Kalaallit Nunaata soqutigisaasa qulakkeernissaanut naammanngillat.

 

Peqatigitillugu USA-p sakkutooqarnikkut ingerlatarisimasaanit qimaannakkat avatangiisinut ulorianartorsiortitsisinnaapput, pinngitsoortinniartariaqakkatsinnik Kalaallit Nunaannut aningaasatigut artukkiinngitsumik. Pissusissamisuunngilluinnartutut isikkoqarpoq ingerlatat, Kalaallit Nunaata peqataaffiginagilluunniit isumaqatigiissuteqarfigisimanngisaasa, kingunerisaannik avatangiisit salinneqarnissaannut Kalaallit Nunaat akisussaatissallugu.

 

Tamanna tunngavigalugu Inatsisartut tamarmiusut 2016-imi ukiakkut ataatsimiinnerminni aalajangiiffigisassatut siunnersuummik (UKA 2016/93) akuersissuteqarput Kalaallit Nunaata inuiaqatigiillu kalaallit amerikamiut Kalaallit Nunaanni sakkutooqarnerat annertunerpaamik pissarsiaqaatigalugulu iluaqutigisinnaanera qulakkeerniarlugu ataatsimoorussamik danskit/kalaallillu USA-mik isumaqatiginninniarnissaannik Naalakkersuisunik peqqusisumik. pisariaqarpat tapiliussamik nutaamik isumaqatiginninniarnermik imaluunniit Illersornissamut Isumaqatigiissutip 1951-imeersup isumaqatiginninniutigineqaqqinnissaanik piumasaqaatitalimmik. Aalajangiiffigisassatut siunnersuutikkut naalakkersuisut ilanngullugu peqquneqarput amerikamiut sakkutooqarfikui sanaartukkallu allat qimaannarneqarnikut pillugit avatangiisitigut akisussaaffiup paatsuugassaanngitsumik inissinneqarnissaa sulissutigeqqullugu

 

Siunnersuut Naalakkersuisunit saqqummiunneqarpoq Nunanut Allanut Sillimaniarnermullu Ataatsimiititaliamillu isumaqatigiissumit akuerineqartussatut inassutigineqarluni.

 

Nunanut Allanut Sillimaniarnermullu Ataatsimiititaliaq Inussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisorlu taamaalillutik peqatigiipput amerikamiut nunatsinni sakkutooqarfeqarnerata Kalaallit Nunaannut inuiaqatigiinnullu kalaallinut sapinngisamik annertunerpaamik pissarsiviullunilu iluaqutissarsiffiginissaata qularnaarneqarnissaannut sulissuteqarnerminni.

 

Taamatuttaaq Nunanut Allanut Sillimaniarnermullu Ataatsimiititaliaq Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisorlu ataatsimut isumaqarput Inatsisartut aalajangernerat tamatumunngalu atatillugu ataatsimiititaliap oqaaseqaatai taakkunanilu anguniagassatut oqaatigineqartut suliassami matumani Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisup sulinissaanut killiliussaasut tunngaviusullu.

 

Nunanut Allanut Sillimaniarnermullu Ataatsimiititaliap Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisullu naatsorsuutigilluinnarpaat danskit naalakkersuisui Kalaallit Nunaanni amerikarmiut sakkutooqarnerata Kalaallit Nunaannut inuiaqatigiinnullu kalaallinut sapinngisamik annertunerpaamik pissarsiviullunilu iluaqutissarsiffiginissaa qularnaarniarlugu USA-mik ataatsimut danskit/nunatta isumaqatigiinniarnissaannik Kalaallit Nunaata kissaataanut nammaqatigiikkusunnermik, paasinninnermik akuersaarnermillu takutitsissasut”.

 

 

Ikinngutinnersumik inuulluaqqusillunga

 

 

 

 

 

Ane Hansen                                                Vittus Qujaukitsoq

Nunanut Allanut Sillimaniarnermullu              Inuussutissarsiornermut, Suliffeqarnermut,

Ataatsimiititaliap Siulittaasua                       Niuernermut, Nukissiuuteqarnermut

Nunanullu Allanut Naalakkersuisoq

 

 

 

 

 

 

 

 

Paasissutissanik annertunerusunik piniarnermi attaveqarfissaq:

Ataatsimiititaliap siulittaasua Ane Hansen +299 58 76 61

Nunanut Allanut Pisortaqarfimmi pisortaq Kai Holst Andersen +299 55 33 31

login