Nutaarsiassat


2017 2016 2015 Flere år...

12-04-2017

Hashimik ajornartorsiuteqarneq akiorniarlugu naalaqkkersuinikkut ataatsimoorneq

Nuna tamakkerlugu hashi pillugu suliniutissatut  pilersaarut aamma piffinni hashimik ajornartorsiuteqarneq pillugu  ulluni 9. aama 10. april 2017-imi Peqqissutsimut Naalakkersuisoq peqatigalugu Ilulissani Aasiannilu innuttaasunik paasisitsiniaanermut oqaloqatigiillunilu ataatsimeeqateqarnermut Inatsisartut Ilaqutariinnermut Peqqissutsimullu Ataatsimiititaliaata aallartitaat peqataapput. Illoqarfiit pineqartut marluk uppernarsarpaat nuna tamakkerlugu misissuinerit aamma takutikkaat hashimik ajornartorsiuteeqarnerup annertuneranik allaat meeqqat ukiukitsut hashimik pujortartartut, allaallu inuusuttuaqqat hashimik pujortartarnerisa kingunerisaanik tarnimikkut napparsimalersimasut (hashpsykose), soorluttaaq naartusut hashimik pujortartarnermikkut ajornartorsiuteqartut paasineqartalersimasut.   

 

Nuna tamakkerlugu ajornartorsiutip annertussusia suussusialu pillugit ilisimasanik pissarsinissaq, ilanngullugulu iliuusissatut pilersaarutit sunniuteqassappata sakkut, suliniutit iluaqutaasinnaasullu suut amigaatigineqarnersut paasiiarlugit illoqarfinni innuttaaasut oqaloqatigineqarnissaat Inatsisartunut ilaasortanit pisariaqartinneqartutut isumaqarfigineqarpoq. 

 

Hashi hashimillu atornerluineq inuiaqatigiinni ajoraluartumik ajornartorsiutaaleraluttuinnarput, ataatsimut isigalugu atornerluisunut, atuisunut, ilaqutaasunut, suleqatinut, qanigisanut inuiaqatigiinnullu attuisoq. Hashimik ajornartorsiuteqarneq ima annertutigaaq Inatsisartut Naalakkersuisullu ataatsimoorlutik akiuiniarnissartik aalajangiussimallugu. innuttaasunut, peqatigiiffinnut, kommuninut suliffeqarfinnullu illoqarfigisaminni ajornartorsiutip iliuuseqarfigineqarnissaanut peqataarusuttut pisariaqartinneqartumik tapersersuinissaq Naalakkersuisut Inatsisartullu kissaatigaat. Ataatsimoorutta ajornartorsiutit aatsaat aaqqissinnaavagut.   


Ilulissani Aasiannilu innuttaasunit siunnersuutigineqartorpassuit oqariartuutigineqartorpassuillu Ilaqutariinnermut Peqqissutsimullu Ataatsimiititaliamit Naalakkersuisunillu anguniagaqarfiusumik suliarineqarumapput. Iliuusissat suliniutillu nutaat qanoq qanorlu iliorluni ataatsimut suliniutissatut pilersaarusiornermut ilanngunneqartariaqarnersullu ingerlaavartumik pisariaqartitsineq naapertorlugu nalilersorneqartassapput, taamaaliornikkut tamatumani ajornartorsiutip annertuneranut tunngatillugu angusassatut kissaatigineqartunut sanilliullugu ineriartortinneqarsinnaaqqullugu iluarsiivigineqarsinnaaqqullugulu. 

 

Hashimik akiuiniarnermi suliniutinut tunngatillugu illoqarfini oqartussat, innuttaasut inuiaqatigiinnilu hashimik ajornartorsiuteqarnerup akiorneqarnissaanut tatiginnillutik politiinik aamma Namminersorlutik Oqartussanik suleqateqarsinnaanerat pingaaruteqarluinnarpoq. Ajornartorsiutip tamatumalu ajornartorsiutaanerata annertussusaa innuttaasunit oqartussaasunillu takunngitsuusaarneqaannassappat ajornartorsiut annertusiartuinnassaaq. Piffissaatillugu eqqortumillu iliuuseqanngikkaanni inuiaqatigiittut inuttullu ataasiakkaatut annertoorujussuarmik annaasaqartoqassaaq ajoqusiisoqarlunilu.   

 

Suliniutigineqarsinnaasut arlallit ilaattut nunatsinnut hashimik eqqussisarnerup pinngitsoortinneqarnissaanut tunngatillugu suliniutit nukittorsarneqarnissaat siunertaralugu aammalu nunatsinnut eqqunneqarnermini akornuteqanngitsumik siammarterneqartarnerata pinngitsoortinneqarnissaa siunertaralugu Naalakkersuisut danskit oqartussaasuinik oqaloqateqartarnerminnik attassiinnarnissaat maannangaaq pisariaqartinneqartoq Ilaqutariinnermut Peqqissutsimullu Ataatsimiititaliami aallartitat isumaqarput.

 

Kalaallit umiarsuaatillit umiarsuaataasa nunatsinnut angalasartut aammalu umiarsuit nunatsinni angalasut aqqutigalugit hashimik eqqussuisarnermut tunngatillugu qaammat una Naalakkersuisut oqaloqatiginniniarmata ataatsimiititaliap aallartitaasa iluarisimaarlugu maluginiarpaat. Oqaloqatigiinnerup tamatuma inerneri pillugit Inatsisartut ataatsimiititaliaat susassaqartut erseqqinnerusumik ilisimatinneqartassasut naatsorsuutigineqarpoq.

 

Ilaqutariinnermut Peqqissutsimullu Ataatsimiititaliami angalaqataasut tassaapput Inatsisartunut ilaasortat Mala Høy Kúko (A), Jess Svane (S), Kelly Berthelsen (IA) aamma Bendt Kristiansen (IA). 

 

Annertunerusumik paasissutissat pillugit Ilaqutariinnermut Peqqissutsimullu Ataatsimiititaliami siulittaasup tullianut Mala Høy Kúko,  mobil (00299) 55 16 14 attaveqarfigalugu pissarsiarineqarsinnaapput.b