Nutaarsiassat


2017 2016 2015 Flere år...

11-05-2017

Tunngaviusumik Inatsisissamut Isumalioqatigiissitaq pillugu Ataatsimiititaliap aalajangiusimavaa Inatsisartunit kaammattuutaasoq tassaasimasoq tassaasorlu, Tunngaviusumik Inatsisissamut Isumalioqatigiissitaq taamaallaat Tunngaviusumik Inatsimmik ataatsimik Kalaallit Nunaannut namminersortumut atuuttussamik suliaqassasoq

Siunnersuummut, Tunngaviusumik Inatsisissaq pillugu Isumalioqatigiissitamik Naalakkersuisunut pilersitsisinnaatitsisumik, ataatsimiititaliap isumaliutissiissutaani kaammattuutit Naalakkersuisut malissimasariaqaraluarpaat.

 

Naalakkersuisulli allatut iliornissartik toqqarsimavaat, tamannalu Tunngaviusumik Inatsisissamut Isumalioqatigiissitaq pillugu Ataatsimiititaliamit eqqumiigineqarpoq.

 

Naalakkersuisoq Suka K. Frederiksenip Tunngaviusumik Inatsisissamut Isumalioqatigiissitaq pillugu Ataatsimiititaliaq ataatsimeeqatiseralugu maanna qaaqquaa. Ataatsimiititaliap neriuutigaa ataatsimiinnermi erseqqinnerusumik nassuiaatigineqassasoq, sooq Naalakkersuisut Inatsisartut ukiakkut ataatsimiinnermi kaammattuutigisaasa malinneqarnissaat pisariaqarsorisimanngikkaat.

 

Ataatsimiititalialli malugisimavaa Naalakkersuisoq tusagassiorfinnut oqaaseqarsimasoq, isumalioqatigiissitaq nammineerluni Tunngaviusumik Inatsisissamut missingiummik ilusilersuisinnaasoq, taamaalillunilu isumalioqatigiissitap missingiut Inatsisartut kaammattuutaat naapertorlugit ilusilersinnaagaa. Ataatsimiititaliaq isumaqarpoq tamanna iluarsiissutaasoq pitsaasoq.

 

Ataatsimiititaliap neriuutigaa, tamatuma qanoq isumalioqatigiissitamut periarfissaatiginera pillugu ataatsimiinneq qulaajaaqataassasoq, taamatullu pitsaasuusinnaanersoq Naalaakkersuisut periarfissamik tamatuminnga erseqqissaataasumik isumalioqatigiissitamut suliassiissutissanut ilanngussippata (isumalioqatigiissitamut suliassiissutit allannguutaattut imaluunniit suliassiissutit ilassutaattut ilusilerlugu).

 

Ataatsimiititaliaq ataatsimiinnissamut qilanaarpoq.

 

Annerusumik paasisaqarumalluni Tunngaviusumik Inatsisissamut Isumalioqatigiissitaq pillugu Ataatsimiititaliap Siulittaasua, Anders Olsen, ugguuna saaffigineqarsinnaavoq:  +299 49 07 08