Nutaarsiassat


2017 2016 2015 Flere år...

11-10-2017

Illersornissamut isumaqatigiissuteqarnissaq, tamatumalu Kalaallit Nunaannut Issittumullu pingaarutai

Nunanut Allanut Sillimaniarnermullu Ataatsimiititaliap Danmarkimi illersornissamut isumaqatigiissuteqarnissaq, inaarutaasumillu isumaqatigiissutaasup Kalaallit Nunaannut, kiisalu sakkutuut Kalaallit Nunaanni Issittumilu suliaannut sunniutigisinnaasai, oqallisigisimavai.

 

Ullumi pingasunngornermi ulloq 11. oktober ministeriunerup Lars Løkke Rasmussenip illersornissamullu ministerip Claus Hjort Frederiksenip illersornissamut isumaqatigiissutissamut nutaamut naalakkersuisut aallaavissaat ”Et stærkt værn om Danmark” saqqummiuppaat. Ataatsimiititaliaq neriuppoq illersornissamut isumaqatigiissuteqarnissami Danmarkimi naalakkersuisut Kalaallit Nunaat issittorlu, imaluunniit illersornissamut isumaqatigiissuteqarsimasut 2016-imi isumaqatigiissutaat, tassuuna sakkutuut Issittumi sulinerat neriorsuutigineqarluni ukiumut 120 mill. kr.-inik nukittorsarneqassasoq, puigorneqassanngitsut.

 

Sakkutuut Kalaallit Nunaanni suliassaat annerusumik Issittumi Sakkutooqarnikkut Qullersaqarfik Arktisk Kommando aqqutigalugu ingerlanneqartarput. Kalaallit Nunaata sakkutooqarnikkut illersorneqarnissaata, kiisalu alapernaarsuinermik oqartussaanermillu nittarsaassinerup, piffissaq eqqarsaatigalugu suliassat ilaannannguisa, saniatigut Arktisk Kommando suliassarpassuarnik assigiinngitsunik allanik ingerlatsisarpoq, soorlu aalisarnermik nakkutilliinermik, imartanik uuttortaanermik, kiisalu ujaasillunilu annaassiniartarnernik, Kalaallit Nunaanni ulluinnarni inuunermut pingaarutilerujussuarnik.

 

 

Ikinngutinnersumik inuulluaqqusillunga

 

Ataatsimiititaliaq sinnerlugu

 

Aaja Chemnitz Larsen

Nunanut Allanut Sillimaniarnermullu Ataatsimiititaliap siulittaasua

 

Paasissutissat sukumiinerusut ataatsimiititaliap siulittassua Aaja Chemnitz Larsen +45 61 62 46 67 attaveqarfigineqarsinnaavoq.