Nutaarsiassat


2017 2016 2015 Flere år...

16-02-2017

Inuusuttut Inatsisartui ataasinngorpat aallartissapput

Ataasinngorpat ulloq 20. februar 2017-imi Inuusuttut Inatsisartui aallartissapput. Ulluni tallimani inuusuttut nunatsinni tamaneersut 30-it missaat 18-it 24-llu akornanni ukiullit peqataassapput.

 

Inatsisartut Siulittaasoqarfiata maj 2016-imi aalajangerpaa Inuusuttut Inatsisartoqarnerani qulequtaritinneqartussaq tassaassasoq ”Kalaallit tunngaviusumik inatsisaat. Nammineq tunngaviusumik inatsiseqalernissatsinnut piffissanngorpa?”. Inatsisartulli 2016-imi ukiakkut ataatsimiinnerminni aalajangerput tunngaviusumik inatsisissaq pillugu ataatsimiititaliarsuarmik pilersitsisoqassasoq, taamaattumillu apeqqut pingaarnertut sammineqartussaq tassaassaaq ”Kalaallit tunngaviusumik inatsisaat. Kalaallit tunngaviusumik inatsisaanni suut ilanngutissallugit pingaaruteqarpat?”.

 

Inuusuttut taakku ulluni tallimani Inatsisartoqarneq tamallu oqartussaaqataanerat ilinniassavaat oqartussaaqataanermilu ingerlaatsimik misiliissallutik. Peqataasut eqimattanut sisamanut agguataarneqassapput eqimattallu ataasiakkaat Inuusuttut Inatsisartuinut pingaarnertut qulequtaritinneqartoq, isummat illuatungeriittut sisamat siumut aalajangiunneqareersut aallaavigalugit, sammissavaat. Taamaalillunilu massakkorpiaq naalakkersuinikkut pisut pillugit oqallinneq pivallaarnagu oqartussaaqataaneq aallaavigalugu isummat assigiinngitsut pillugit oqallittarneq pillugu ilinniartitsissutitut ilisimasanik ingerlatseqqinnissaq qitiutinneqassaaq. Soorluttaaq inuusuttut namminneq isummersinnaalernissartik taakkuninngalu oqartussaaqataanermi maleruagassat tunngavigalugit illersuisinnaanissartik ilinniassagaat.

 

Inuusuttut Inatsisartui tallimanngornermi ulloq 24. februar Inatsisartut ataatsimiittarfianni tamanut ammasumik nalunaaquttap akunnerini pingasuni affarmilu ingerlanneqartumik oqallinnermik naggaserneqassapput. KNR-ip tallimanngorpat nal. 11.00-imiit KNR 2-kut oqallinneq toqqaannartumik aallakaatissavaa. Tamatuma kingorna inuusuttut partiinit attaviitsunillu Inatsisartunut ilaasortaatitaqartunit tamanit aallartitamik ataatsimik minutsini 90-ini oqalliseqateqassapput. Taamaaliornikkut naalakkersuinerup silarsuaani piviusumi isummersornissamut inuusuttut periarfissinneqassapput.

 

Inu.gl aqqutigalugu oqallinneq malinnaaffigineqarsinnaavoq, tassani aamma pissarsiarineqarsinnaapput Inuusuttullu Inatsisartui pillugit paasissutissat attuumassutillit allat.

login