Nutaarsiassat


2017 2016 2015 Flere år...

27-02-2017

2017-imi Inuusuttut Inatsisartui iluatsilluarput

Sapaatip akunnerani kingullermi ataasinngornermiit tallimanngornermut inuusuttut 24-it 18-it 24-illu akornanni ukiullit  Inuusuttut Inatsisartoqarnerani qulequtaritinneqartoq tassaassasoq ”Kalaallit tunngaviusumik inatsisaat: Kalaallit tunngaviusumik inatsisissaanni suut ilanngutissallugit pingaaruteqarpat?” oqallisigaat.

 

Peqataasut eqimattanut sisamanut agguataarneqarput eqimattallu ataasiakkaat Inuusuttut Inatsisartuinut pingaarnertut qulequtaritinneqartoq, isummat illuatungeriittut sisamat siumut aalajangiunneqareersut aallaavigalugit, sammivaat. Tassani isummiussat ataasiakkaarlugit siunnersuutitut ilusilerlugit akueriuminartunngorsarlugit saqqummiussuunneqarput kingornalu illersorneqarlutik. Tamatuma kingorna allannguutissatut siunnersuutissanik suliaqarluni isumaqatigiinniarnernik ingerlatsineq misilinneqarpoq. Taamak iliornikkut inuusuttut uummaarissumik oqallinnissamik isumannaarunneqarput.

 

Inuusuttut Inatsisartui katillugit siunnersuutinik 16-inik allannguutissatullu siunnersuutinik arfineq marlunnik saqqummiussipput, saqqummiussanit taakkunannga siunnersuutit 14-it tallimanngormat Inuusuttut Inatsisartuisa Inatsisartut ataatsimiittarfianni katersuunneranni akuersissutigineqarput. Ingerlatsineq partiinit Inatsisartunut ilaasortaatitaqartunit aallartitanik oqalliseqateqarnermik malitseqartinneqarpoq, taamaalillutik inuusuttut misilittagarilikkatik pillugit Inatsisartunut ilumoortunut ilaasortaasut peqatigalugit oqallisiginninnissamik periarfissinneqarlutik.

 

Peqataasut tamanna sioqqullugu imminnut ilisarisimalerluarnissaminnut periarfissinneqarput, Inatsisartut suleriaasiat oqartussaaqataanerullu isumaa pillugit sukumiisumik ilitsersuunneqarlutik. Aammattaaq Naalakkerasuisut Siulittaasuannut Kim Kielsenimut kiisalu Namminiilivinnermut, Pinngortitamut, Avatangiisinut Nunalerinermullu Naalakkersuisumut Suka K. Frederiksenimut pulaartoqarpoq.

 

Inuusuttut Inatsisartui Hans Egedep illuani aaqqissuussinermik naggaserneqarput, tassani Inuusuttut Inatsisartuisa inaarutaasumik nalunaarutaat peqataasumit nukarlerpaamit angajullerpaamillu Inatsisartut Siulittaasuisa tulliisa aappaannut Ineqi Kielsenimut Naalakkersuisullu Siulittaasuannut Kim Kielsenimut tunniunneqarluni.

 

Inuusuttut Inatsisartuisa inaarutaasumik nalunaarutaat tusagassiorfinnut nalunaarummut uunga ilanngunneqarpoq kiisalu inu.gl-imut aaneqarsinnaalluni. Tassani aamma katersuunneq takoqqinneqarsinnaavoq Inuusuttullu Inatsisartui pillugit paasissutissat attuumassutillit tamarmik nassaarineqarsinnaallutik.