Nutaarsiassat


2017 2016 2015 Flere år...

28-02-2017

Nunat Avannarliit Killiit Siunnersuisoqatigiiffiata Tórshavnimi aalajangersimasumik qulequtaqartitsilluni isummersoqatigiissitsinera

Nunat Avannarliit Killiit Siunnersuisoqatigiiffiat, NAKS, Savalimmiuni Tórshavnimi Hotel Hafniami ulluni 24.-27. februar aalajangersimasumik qulequtaqartitsilluni isummersoqatigiissitsivoq. Nunatsinnit peqataapput Inatsisartut Siulittaasuat, Lars-Emil Johansen, nunatsinnit NAKS-imut aallartitanut aamma siulittaasuusoq, siulittaasup tullia Michael Rosing, Kalistat Lund, Villy Olsvig aamma Vivian Motzfeldt.

 

Isummersoqatigiinnermi qulequtaritinneqarpoq ”Ajornartorsiutit suiaassutsimik aallaavillit - angutit ajornartorsiutaat isiginiarnerullugit”. Taamaalilluni isummersoqatigiinnermi naligiissitaaneq eqqarsaatigalugu angutinut unammillernarsinnaasut immikkut pingaartinneqarput.

 

Isummersoqatigiinnermi saqqummiussisut aamma ilagaat Anda Poulsen, nunatsinni angutit atugarisaat, taamatullu nunatsinni angutit ikorfartoqatigiiffiinik pilersitsiortornermik suliaqarnini pillugit saqqummiussaqartoq.

 

Isummersoqatigiinneq pillugu siulittaasoq ima oqaaseqarpoq:

”Isummersoqatigiinnerup takutippaa aamma ullumikkut 2017-imi suliassaqarfippassuarni angutit arnallu akornanni naligiissitaaneq eqqarsaatigalugu pitsaanerusumik oqimaaqatigiissitsinissaq suli pisariaqartoq. Isummersoqatigiinnermi takutinneqartutut, angutit ilaqutariinnermik pingaartitsinerulernissamut pitsaanerusunik periarfissinneqassappata, taava inuiaqatigiinni aaqqissuussinerit, ilaqutariit assersuutigalugu kiap erninermut atatillugu sulinngiffeqarnissaanik aalajangiiniarnerinut tunngaviusartut misissuataartariaqarpagut.

 

Qaangaaniilli ilisimaneqarpoq erninermut atatillugu sulinngiffeqartoqassatillugu annerusumik anaanaasut sulinngiffeqartartut, ataataasut sulinngiffeqassagaluarpata tamanna ilaqutariinnut akisunerusussaammat, angutit nalinginnaasunik akissarsiaqarnerusarmata. Tamanna naapertuutinngilaq ullumikkut ilinniagaqassutsikkut inissisimanermut, tassami ullumikkut arnat angutinut sanilliullugit qaffasinnerusumik ilinniagaqarsimassuseqalersimammata, tamatumunngali akissarsiaat malinnaasimanatik. Taamaakkaluartoq suli angutit nalinginnaasumik qaffasinnerusunik atorfeqartarput qaffasinnerusunillu aningaasarsiaqartarlutik. Taamaattumik anaanaasut erninerminnut atatillugu sulinngiffeqaraangamik akissarsiatigut atorfeqarnikkullu kinguaattoortarnerat illuatungaanut saatittariaqarparput, taamaalilluni arnat qaffasinnerusumik ilinniagaqarsimassutsimut naapertuuttumik qaffasinnerusunik aningaasarsiaqalernissaat ilanngullugu qularnaarlugu, erninermut atatillugu sulinngiffeqartarneq arlaannaannulluunniit akisuneroqqunagu, taamalu ilaqutariinni kiap erninermut atatillugu sulinngiffeqarnissaata aalajangerniarneqarnerani pitsaanerusumik oqimaaqatigiinneq pilersillugu.”

 

Aalajangersimasumik qulequtaqartitsilluni isummersoqatigiinnerup saniatigut NAKS immikkut ittumik ukiumoortumik ataatsimiippoq, tamatumani 2017-imut missingersuutit, taamatullu aamma siulittaasoqarfiup siunnersuisoqatigiiffiullu ingerlatassatut pilersaarutai akuersissutigineqarlutik.

 

2017-imut missingersuutinik siulittaasoqarfiullu ingerlatassatut pilersaarutaanik siunnersuisoqatigiiffiup oqaluuserinninnerini Kalaallit Nunaata Savalimmiullu SCPAR-imut (Standing Committee of Parliamentarians of the Arctic Region – Issittumi Siunnersuisoqatigiit ataavartumik ataatsimiititaliaat Issittumi inatsisartunut ilaasortanik ilaasortalik) ilaasortanngorsinnaanerat Siunnersuisoqatigiiffiup ilanngullugu oqaluuseraa. SCPAR-imulli ilaasortanngorsinnaaneq aamma Issittumi Siunnersuisoqatigiinnut ilaasortanngorsinnaanermut atavoq. Nunat Avannarliit Killiit Siunnersuisoqatigiiffiat Issittumi Siunnersuisoqatigiinnut alaatsinaatsutut ilaasortanngorsinnaanerminik qinnuteqarnikuuvoq, maajip qaammataani erseqqinnerusumik aalajangiivigineqartussamik. NAKS taamaalilluni aamma SCPAR-imi alaatsinaatsuinnartut inissisimavoq.