Nutaarsiassat


2017 2016 2015 Flere år...

08-03-2017

Tunngaviusumik Inatsisiliornissamut Isumalioqatigiissitamut ilaasortaaneq

Tunngaviusumik inatsisiliornissamut isumalioqatigiissitamut siulittaasussatut inassutigineqarsimanera eqqarsaatigalugu oqallinnerujussuaq tunngavigalugu nalunaarutigissavara Tunngaviusumik inatsisiliornissamut isumaqalioqatigiissitamut siulittaasutut atuuffimmut ataqqinartumut partiinniit toqqagaaffigisimagaluakkannut naaggaartariaqarama.

 

Taamaattumik sukumiisumik isumaliutigereerlugu taama aalajangerpunga, naak sunnguamilluunniit aporfissaqanngikkaluartoq Inatsisartut siulittaasuattut Tunngaviusumik inatsisiliornissamut isumaqalioqatigiissitamut siulittaasutut atuuffimmik tigusisinnaanissannut.

 

Akerlianik isumaqarnarpoq – innuttaasut akornanni oqallinneq naapertorlugu – aporfissaararpassuaqartoq Inatsisartut siulittaasuattut atuuffimma saniatigut peqatigitillugu tunngaviusumik inatsisiliornissamut isumalioqatigiissitap siulittaasuatut atuutilissagaluaruma.

Taamaattumik aamma tamanna tunngavigalugu naatsorsuutigivara Tunngaviusumik inatsisiliornissamut isumalioqatigiissitami sulineq eqqarsaatigalugu innuttaasut akornanni nalinginnaasumik oqallinnermi tamakkiisumik peqataasinnaanissannut naalakkersuinikkut periarfissanni killilerneqassallunga peqatigitillugulu Inatsisartunut tamarmiusunut siulittaasutut atuuffik isumagiitigalugu.

 

Uannut pingaaruteqarpoq erseqqissassallugu Tunngaviusumik inatsisiliornissamut isumalioqatigiissitamut siulittaasutut atuuffimmut ivertinneqarneq – tunngavissalimmik tunngavissaqanngitsumilluunniit – aporfiussanngimmat tatiginninnerup Inatsisartut siulittaasuattut atuuffimmut qinerlunga Inatsisartut takutissimasaata innarlerneqarnissaanut. Isumaqarpungalu aamma taamatut pingaaruteqartigisoq kialuunniip Tunngaviusumik inatsisiliornissamut isumalioqatigiissitamut siulittaasussatut toqqarneqartup tamatigoortumik apeqquserneqarsinnaanngitsumillu tapersersorneqarnissaa.

 

Taamaattumik partiinnut ilisimatitsissutigaara tatiginninneq parteeqatima ersersissimasaat tanngassimaarutigigakku, qujamasuutigalugulu sulisinnaassusera misilittakkakkalu isumalioqatigiissitap sulinissaanut pingaaruteqarsinnaasutut isumaqarfigineqarsimammata, kisianni aamma Inatsisartut siulittaasuattut oqallinneq malinnaavigisimagakku tamannalu tunngavigalugu nalilerlugu Tunngaviusumik inatsisiliornissamut isumalioqatigiissitamut ilaasortatut siulittaasutulluunniit inissinniarnanga.

 

 

Lars-Emil Johansen

Inatsisartut Siulittaasuat

login