Nutaarsiassat


2017 2016 2015 Flere år...

08-03-2017

Henriette Rasmussenimut eqqaaniut

Aliasuutigeqisannik Henriette Rasmussenip sivisuumik napparsimareerluni toqukkut qimagunneranik nalunaarfigineqarpunga.

 

Henriette, arnaq naalakkersuinermik suliaqarsimasoq malunnaatilik, Namminersornerulernerup aallartisarneqarneraniit naalakkersuinikkut suliniarnermut peqataasimasoq, Naalakkersuisullu Siulittaasuattut 1991-imiit 1995-imut atuunninni Isumaginninnermut Suliffeqarnermullu Naalakkersuisuusimasoq, akornatsinniikkunnaarpoq.

 

Henriette Rasmussen 1984-imi Inuit Ataqatigiit tunuliaqutaralugit Inatsisartunut qinigaaqqaarpoq 1995-illu tungaanut Inatsisartunut ilaasortaalluni. Henriette Rasmussenip naalakkersuinikkut angusaasa malugisariaqarnerusut ilagaat 1992-imi nunatta meeqqat piginnaatitaaffii pillugit Naalagaaffiit Peqatigiit isumaqatigiissutaat ilannguffigimmagu, meeqqat atugarisaasa pitsanngorsarneqarnissaannik naalakkersuinikkut soqutiginninnerata inerneratut.

 

Henriette Rasmussen ilinniartitsisutut tusagassiortutullu ilinniarsimavoq, taamalu suliatigut piginnaasaqarnini tunngavigalugu nunatsinni nunallu tamalaat akornanni pitsaasumik pissarsiviusumillu naalakkersuinikkut suliaqarsimalluni. Nunat inoqqaavisa pisinnaatitaaffii sulissutiginerini naalakkersuinikkut angusarnissaq qasujaatsumik sulissutigisimavaa.

 

Taamaattumik aamma nunatsinnit toqqagassat piukkunnarnersarisimavaat 1996-imi Genevemi nunat tamalaat sulineq pillugu suliniaqatigiiffissuanni ILO-mi apeqqutini nunat inoqqaavisa pisinnaatitaaffiinut tunngasuni siunnersortaanertut toqqarneqarmat, 2000-illu tungaanut taamatut sulilluni.

 

2002-mi inatsisartunut qinersinermi Henriette Rasmussen nuna tamakkerlugu naalakkersuinermik suliaqarnermut uterpoq 2003-milu Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisunngorpoq, taamatullu atuulluni 2005-imi qinersisoqarnissaata tungaanut, tamatumalu kingorna nuna tamakkerlugu naalakkersuinikkut suliaqarneq qimallugu.

Henriette Rasmussen sutigut tamatigut inuusimavoq tunniusimasoq, qanilaartoq, innuttaasutut naalakkersuinikkut inissisimanerminik nalornisiginninngitsoq, taamatullu aamma inuttut pisinnaatitaaffiit inuiaqatigiinnilu sanngiinnerpaat atugarisaasa pitsanngorsarniarlugit sorsuuteqarnermi nipi erseqqissoq. Henriette naalakkersuinikkut sumi inissisimaneq apeqqutaatinnagu suleqateqarsinnaaneq piginnaaneqarfigisimavaa taamaattumillu aamma partiit pitarlugit naalakkersuinikkut ikinnguterpassuaqalersimalluni.

 

Inummik kissalaartumik pissanganartumillu annaasaqarnerannik ilaqutaasunut – inuiannullu – qamannga pisumik misiginneqatiginninnera, inuiaqatigiillu ineriartortinneqarnerannut naalakkersuinikkut suliniarsimaneranut qujamasunnera, ersersikkusuppara.

 

Henriette ataqqinartumik eqqaaneqartarli.

 

 

 

Lars-Emil Johansen

Inatsisartut Siulittaasuat

 

Annertunerusumik paasisaqarusukkaanni saaffigineqarsinnaavoq Inatsisartut Siulittaasuat  Lars-Emil Johansen attavigineqarsinnaavoq mobil +299 55 19 15.