Nutaarsiassat


2017 2016 2015 Flere år...

23-03-2017

Kalaallit danskillu Bruxellesimut tikeraarnerat

Folketingimit Inatsisartunillu aallartitaasa ataasinngornermi ulloq 20. marts Bruxellesimut tikeraarnerminni puisinit tunisassianik EU-p eqqusseqqusinnginnera EU-llu issittumi periusissiaa EU-mi ingerlatsiviit assigiinngitsut sinniisuinut ataatsimeeqatiginnissutigaat.

 

Aallartitat tassaapput Folketingimi Kalaallit Nunaannut tunngasunut Ataatsimiititaliamut ilaasortat kiisalu Inatsisartut Nunanut Allanut Sillimaniarnermullu Ataatsimiititaliaat kiisalu Inatsisartut Aalisarnermut, Piniarnermut Nunalerinermullu Ataatsimiititaliaat. Nunat tamalaat suleqatigiinnerannut ineriartornermullu EU-p kommissæria Neven Mimica, avatangiisinut, imarsiornermut tunngasunut aalisarnermullu EU-p kommissæreqarfiani sulisoq Karmenu Vella, danskit europaparlamentimut ilaasortaatitaat Anders Vistisen (DF), EU-p nunanut allanut tunngasunut sullissivia (EEAS) kiisalu soqutigisaqaqatigiit Fur Europe ataatsimeeqatigineqarput.

 

Puisit amiinik EU-p eqqusseqqusinnginnera nunatsinni piniartunut assut eqquinerluttartoq aammalu eqqusseqqusinnginnerup naggueqatigiinnut inunnut atuutsinneqannginnera puisit amiisa Kalaallit Nunaanneersut europami niuerutigineqarnissaannik periarfissiisussaq siunertaq malillugu ingerlanngitsoq ataatsimiinnerni aallartitat kommissionimut nassuiaatigaat. Tassunga atatillugu nalunaaqutsersuinissaq Great Greenlandimit Fur Europemillu siunnersuutigineqartoq kommissionimillu soqutigineqartoq aqqutigalugu  eqqusseqqusinnginnerup naggueqatigiinnut inunnut atuutsinneqannginnerata siunertarineqartutut ingerlasinnaalernissaa aallartitat neriuutigaat.

 

EU-p issittumi periusissiassaanut missingiusiap piffissami aggersumi kommissionimit oqaluuserineqartussap oqaluuserinissaanut aallartitat aamma periarfissaqarsimapput. Aallartitat oqaatigaat EU Kalaallit Nunaannut suleqataasoq pingaarutilik EU-llu Kalaallit Nunaannut atassuteqarnerata nukittorsarneqarnissaanik EU-p kissaateqarneranik kommissær Mimicap oqarnera nuannaarutigineqarluni. Naalakkersuinikkut oqariartuutit ersarissut suleqatigiinnermut pitsanngorsaataasut kommissioni isumaqarpoq kalaallillu tungaannit siunnersuutit tunngavilersorluakkat tusaaniarumallugit.

 

Aallartitanit tamanna nuannaarutigineqarpoq oqaatigineqarlunilu EU-p issittumut politikkiata Issittumiittut qanimut suleqatigalugit oqaloqatigalugillu ilusilersorneqarnissaa pingaaruteqartoq, taamaalilluni taanna ataatsimut paaseqatigiinnissamut tunngaviusinnaaqqullugu. Periarfissaq iluatsillugu aallartitat kommissær Vella aammalu kommissær Mimica Kalaallit Nunaannut tikeraarsarpaat, tassungalu atatillugu Mimica oqarpoq Kalaallit Nunaanut tikeraalersaarluni, tamannalu immaqa junip qaammataani pisinnaassasoq.

 

Paasissutissat sukumiinerusut Nunanut Allanut Sillimaniarnermullu Ataatsimiititaliap siulittaasuata Ane Hansen oqarasuaat 58 76 61 aamma Aalisarnermut, Piniarnermut Nunalerinermullu Ataatsimiititaliap siulittaasua Karl-Kristian Kruse oqarasuaat 548374 attaveqarfigalugit pissarsiarineqarsinnaapput.

 
login