Nutaarsiassat


2017 2016 2015 Flere år...

29-03-2017

Appat piniagaanerisa ukiuni 10-ni eqqissisimatikkallarneqarniissaannut tunngatillugu Pinngortitaleriffiup innersuussuteqarneranut Inatsisartut Eqqissisimatitsinermut Avatangiisinullu Ataatsimiititaliaanit qisuariaat.

Eqqissimatitsinermut Avatangiisinullu Ataatsimiititaliap piffissami kingulermi maluginiarpaa, Pinngortitaleriffiup appat pinigaanerisa ilaatigut piffissamik aalajangesimasumik taasillutik eqissisimatinneqarnissaat. Tamannalu tusagassiuutitigut soqutigisaqaqatigiinniilu assiginngitsuneersunik eqqartorneqartoq isummersorfigineqartoq Ataatsimiititaliamit malugininiarneqarpoq.

 

Tamanna pillugu Ataatsimiititaliamit assigiinngitsutigut paasissutissanik pissarniartarsimavugut ilaatigut siorna novembarip 17-ani 2016, Pinngortitaleriffimmut pulaarnerminut atatillugu, uumasut nungutaanissaminnut uloriarnartorsiortutut nalilerneqarsimasut uani ilaatigut appat qanoq kisinneqartarnerat paasisaqarfigerusullugu apeqquteqaatigisamavaat.Tammana pillugu Pinngortitaleriffimmiik sukumiisumik Ataatsimiititaliamut akissuqarfiginerpoq.

 

Pinngortitaleriffiup ilisimatuuisa appaqarfinni misissuinerisa takutippaat appat ukiuni kingullerni sumiiffinnilu assigiinngitsuni annertuumik ikileriarsimasut, ilaatigullu appat nungutaanissaannut ernumanartorsiortut eqqaaneqarlutik. Tamatumunnga atatillugu appat ukiuni 10-ni eqqissisimatitaanissaat Pinngortitaleriffiup Naalakkersuisunut innersuussutigalugu siunnersuutigisimallugu Eqqissisimatitsinermut Avatangiisinullu Ataatsimiititaliamut oqaatigaa.

 

Appat eqqissisimatinneqarallarnissaannik oqariartuutigineqartut tunngavigalugit Naalakkersuisut suliniuteqarnissaminnut pilersaaruteqarnersut Eqqissisimatitsinermut Avatangiisinullu Ataatsimiititaliamit paasiniaavigineqarput. Naalakkersuisut akissuteqaataanni tamanna pilersaarutaanngitsoq ilisimatitsissutigineqarpoq, innersuussutigineqarluni ingerlariutsit pioreersut atorlugit pineqartut atuisuusullu tusarniaavigineqartarnerannik ingerlariuseq atuinnarusunneqarmat. Pingaarnertut eqqaaneqarpoq Aalisarnermut aamma Piniarnermut Siunnersuisooqatigiit soqutigisaqaqatigiinnit inuttalersugaasoq pisassanik aalajangersaasoqassatillugu tusarniarneqartanerat ingerlasoq. Imaappoq Siunnersuisooqatigiinni KNAPK, TPAK aamma KANUKOKA sinniisuutitaqartoq kiisalu kommunet tamarmik tusarniaavigineqartalernikuunerat ilisimatitsissutigineqarluni. Tusarniarneqartut siunnersuut sumiiffinni immikkoortortaqarfinnut ingerlateqqittaaraat ilanngullugu ilisimatitsissutigineqarluni tamakkulu ataatsimut katersorlugit piniarnermut innersuussinissamut atorneqartartut Naalakkersuisunit ilisimatitsissutigineqarluni.

 

Eqqissisimatitsinermut Avatangiisinullu Ataatsimiititaliap Pinngortitaleriffiup ukiuni 10-ni appat eqqissisimatinneqarallarnissaanut siunnersuutaata eqqartornerani Ataatsimiititaliami ilaasortat ilaasa appanut kisitseriaatsit maanna Pinngortitaleriffimmit  atorneqartut  apeqquserpaat. Piniartut atuisullu sinerissami apparpassuarnik oqariartuuteqarnerannik appallu najugaqarfigisartaagaassa nuussimannerannik tunngavilersortoqarluni. Illuatungaatigullu aamma ilaasortat ilaasa appat Pinngortitaleriffiup ilisimatuuinit ukiuni kingullerni kisitsisoqarsimanerata kingunerisaanik appat taamatut piniarneqarnerat ingerlaannassappat, nungutaanissaanik aarleqquteqartoqarnera aallaavigalugu Ataatsimiititaliamit iliuuseqartoqarnissaanik kissaateqartoqarluni.

 

Isummat assigiinngissitaarnerat – illuatungaani atuisut / piniartut illuatungaanilu uumasorsiuut – eqqarsaatigalugu Eqqissisimatitsinermut Avatangiisinullu Ataatsimiititaliap Aalisarnermut Piniarnermullu Naalakkersuisumut kajumissaarutigiumavaa appat pillugit isumasioqatigiisitseqqullugu kikkunnit attuumassuteqartunit tamanit peqataaffigineqartumik.

 

Isumasioqatigiinnermi ilaatigut atuisut / piniartut ilisimasaannik katersuinermi uppernarsaasersuinermilu periaasissat suliarineqarnissaannut tunngavissat suliarineqassapput.Taamaalilluni atuisut aammalu uumasorsiuut ilisimasamikkut qanoq tapertariissinnaanerat ilanngullugu eqqartorneqassammat.

 

Naggaterpiaatigut Ataatsimiititaliamit pingaartipparput appat pillugit siunissaq isigalugu nungutsaaliuinissarlu qularnaarniarlugu tigussaasumik attuumassuteqartut tamaasa peqatigalugit iliuuseqarnissaq isumasioqatigiinnerup inernerissagaa.

 

Inuulluaqqusillunga

 

Kelly Berthelsen,

Ataatsimiititaliami siulittaasoq

 

Annertunerusumik paasisaqarusukkussi Eqqissisimatitsinermut Avatangiisinullu Ataatsimiititaliap siulittaasuanut Kelly Berthelsenimut oqarasuaataanut uunga sianerlusi:   58 63 69 saaffiginnissinnaavusi.

login