Periaatsit ilusiliinissamullu piumasaqaat


Attaveqarfissaq

Laila Kristiansen
+299 34 61 20
lkri@inatsisartut.gl

Suliat Inatsisartunut Naalakkersuisunullu ilaasortat Inatsisartut oqaluuserisassaannut ilanngukkusutaasa ilusilernissaannut piumasaqaatit assigiinngitsut arlallit atuupput.

 

Suliat Inatsisartunut saqqummiukkusutat ilusilernissaannut piumasaqaatit ataani pineqartut nittartakkami ujalerfissiami saamia tungaaniittumi takuneqarsinnaapput. Apeqqutigineqarajuttunut akissutaasartut tulliuttumi atuarneqarsinnaapput:

 

Qassinngorlugit tunniunneqassappat?

Tunniussineq tamatigut elektroniskiusumik pisassaaq tamatumalu saniatigut pappiaranngorlugu tunniussisoqartassaluni. tassami tamatumunnga Inatsisartut Siulittaasuat aamma/imaluunniit Inatsisartut Allattoqarfiat tamatuma saniatigut katersuunnernut tamanut atatillugu Naalakkersuisunut allakkatigut ilitsersuusiortarmat sukumiinerusunik paasissutissartalinnik.

  • Naalakkersuisunit inatsisissatut aalajangiiffigisassatullu siunnersuutit, taakkununngalu saqqummiussissutit: elektroniskiusumik nassiussinerup saniatigut kalaallisut pappiaranngortitat 35-it qallunaatullu pappiaranngortitat 35-it tunniunneqassapput. Saqqummiussissut nammineq kingusinnerusukkut tunniunneqarpat, taanna qarasiakkuinnaq nassiunneqarsinnaavoq. 
  • Nassuiaateqarnerni: Nassuiaat inersuarmi oqaluuserineqassappat elektroniskiusumik nassiussinerup saniatigut kalaallisut danskisullu pappiaranngortitat 35-t tunniunneqassapput. 
  • Nassuiaat agguaanneqaannassappat taamaallaat elektroniskiusumik tunniunneqarsinnaavoq, nalinginnaasumilli amerlassutsit malillugit aamma kalaallisut danskisullu pappiaranngorlugu tunniunneqarnissaa kaammattuutigineqarluni. 
  • Nalinginnaasumik akissuteqaatit qarasaasiakkut tunniunneqarnerat naammattarpoq. Kaammattuutigineqarporli akissuteqaatit aamma pappiaranngorlugit nalinginnaasumik amerlassusissaattut amerlassusilerlugit tunniunneqartassasut - minnerunngitsumik immikkoortup pineqartup oqaluuserineqarnissaa sioqqullugu nal. ak. 24-it iluanni akissuteqaat tunniunneqarpat. 
  • § 37 tunngavigalugu Naalakkersuisunut apeqquteqarnerni: Naalakkersuisoqarfinnit ataasiakkaanit akissutinik katersuinermi Siulittaasup Naalakkersuisoqarfia ataqatigiissaarisuussaaq. Taamaattumik Naalakkersuisoqarfiit Siulittaasup Naalakkersuisoqarfianut saaffiginnittassapput. Aamma taamaaliortoqartassaaq piffissaliussaq eqqortinneqarsinnaanngikkaangat.

 

Kimut tunniunneqassappat?

Atortut elektroniskinngorlugit inatsisartut@inatsisartut.gl.-imut tunniunneqartassapput. Pappiaranngortitat journaleqarfimmut tunniunneqassapput.

 

Oqaatsit pillugit suut piumasaqaataassappat?

Atortussiat tamarmik kalaallisut qallunaatullu tunniunneqassapput. Pineqarputtaaq ilanngussat tapiliunneqartut. Pissutsini immikkut ittuni, assersuutigalugu qallunaat inatsisaat Kalaallit Nunaanni atortussanngortinneqassatillugit, atortussat ilai taamaallaat qallunaatuinnaq saqqummiunneqarsinnaasarput. Taamatuttaaq nunat tamalaat isumaqatigiissuutaannut atatillugu taama pisoqarsinnaasarpoq, atortussat ilai taamaallaat tuluttuinnaq saqqummiunneqarsinnaasarmata. Taama pisoqartillugu, atortussiat siulequtaanni kalaallisut imaqarniliortoqartassaaq. Tusarniaanernit akissutinut piumasaqaatit immikkut ittut atuupput, takuuk ataani allassimasut.

 

Tusarniaanermit akissutit pillugit

Inatsisissatut siunnersuutini inatsisinut nassuiaatinut ilitsersuutit atuuttut naapertorlugit tusarniaassutaaratarsimasoq inatsisissap nalinginnaasumik nassuiaatitaani naammalluartumik nassuiarneqarsimassaaq. Taamaattumik tusarniaanermit atortussianit ataatsimoortunit naqitat taamaallaat ataasiinnaat Inatsisartut Allattoqarfiannut tunniutissallugit naammapput. Tusarniaanermit atortussianut makku ilaassapput:

  • Tusarniaanermit allakkiap assilinera,
  • Tusarniaanermit akissutit tiguneqartut assilineri,
  • Inatsisissatut siunnersuutip tusarniaassutigineqarnermini missingiusiap atorneqartup assilinera,
  • Tusarniaanermit akissutitut allakkiaaratarsinnaasoq,
  • Inatsisissatut siunnersuutip nassuiaatitaani tamanna allassimanngippat, kina/kikkut tusarniarneqarnissamut kaammattorneqarsimanersut pillugit paasissutissaaratarsinnaasut,
  • Tusarniaanermut piffissaliunneqartoq atorneqartoq pillugu paasissutissat. 

Tusarniaanermit atortussiat peqatigitillugulu tassunga atasoq inatsisissatut siunnersuut Inatsisartut Allattoqarfianut tunniunneqassapput. Atortussiat naqitanngorlugit qarasaasiarlu atorlugu tunniunneqassapput. Pissutsit siuliani pineqartut isiginiarneqarpata tusarniaanermit atortussiat tamaasa nutsernissaat pisariaqanngilaq, kisiannili Ataatsimiititaliami suliaqarnissaq siunertaralugu Inatsisartut ataatsimiititaliaat imaluunniit taassuma allattaa atortussiat taakkuluunniit ilaasa nutserneqarnissaannik sukkulluunniit Naalakkersuisunit inniminniisinnaavoq. Pineqartuni allaanerussutaasinnaasut malillugit ilitsersuutit qulaani pineqartut aamma aalajangiiffigisissatut siunnersuutinut nassuiaatinullu atuupput. 

 

Atortunut ilanngussat sorliit tunniunneqassappat?

Ilanngussat tamarmik immikkoortunut atortunullu allanut attuumassutillit Allattoqarfimmut tunniunneqartut ilanngunneqassapput.

 

Piffissat suut killiliussaappat?

  • Inatsisissatut aalajangigassatullu siunnersuutit: Ullormi killiliussami nal. 12.00, imaappoq Inatsisartut ataatsimiilernissaat sapaatit akunnerinik 5-nik sioqqullugu tamatuma kingorna  immikkoortup nalunaarutigineqarnissaa Siulittaasoqarfiup tassungaannaq tunngatillugu akuersaarsimanngippagu. 
  • Apeqquteqaat aallaavigalugu oqallinnissamik siunnersuutit Inatsisartut ataatsimiinnerisa ingerlanerini ingerlaavartumik tunniunneqarsinnaapput. Nalinginnaasumilli siusinnerpaamik oqaluuserisassanut ilanngunneqarsinnaapput tunniunneqarnerminniit ullut suliffiusut aqqaneq-marluk qaangiutereerpata. 
  • Saqqummiussissut siunnersuutip/nassuiaatip tassunga atasup tunniunneqarnera ilutigalugu sapinngisamik saqqummiunneqartassaaq. Saqqummiussissutilli qaqugukkut tunniunneqareernissaat pillugu maleruagassaqanngilaq. Saqqummiussissut immikkoortillugu tunniunneqarpat - partiit oqaaseqartartui eqqarsaatigalugit - immikkoortup suliarineqarnissaa kingusinnerpaamik akunnernik 48-nik sioqqullugu tunniunneqareertariaqarpoq. 
  • Akissuteqaatit: Kingusinnerpaamik tunniussiffissaliisoqanngilaq, immikkoortulli oqaluuserinissaa kingusinnerpaamik ullormik ataatsimik sioqqullugu tunniussisarneq tunngaviusariaqarpoq. 
  • § 37 tunngavigalugu apeqqutinik akissuteqartarneq: Taakku tiguneriniit ullut qulit suliffiusut iluanni akissuteqarfigineqassapput. Naalakkersuisulli akissuteqarnissamut killiliussap sivitsorneqarnissaanik Inatsisartut allaffigalugit qinnuigisinnaavaat, assersuutigalugu apeqqut tunngavigalugu sivisunerusumik misissuisoqassatillugu. Qassiunissannik kisitsit siuliani taaneqartartoq takuuk. 
  • Nassuiaatit agguaassassat: Ulluinnarni nalinginnaasumik allaffimmiittussaanerup nalaani taakku tunniunneqarsinnaapput. 
  • Inatsisartut ataatsimiinnerini nassuiaatit: Ulloq killiussaq, imaappoq Inatsisartut ataatsimiilernissaat sapaatit akunnerinik 5-nik sioqqullugu tamatuma kingorna  immikkoortup nalunaarutigineqarnissaa Siulittaasoqarfiup tassungaannaq tunngatillugu akuersaarsimanngippagu.

 

Allagartamik uppernarsaasiisoqassava?

Atortut pappiaranngorlugit tunniunneqartut "allagartaq tungujortoq" Naalakkersuisut tunniussinerminnut ilanngullugu nassiussaat journaleqarfiup uppernarsaasissavaa.

login