Apeqquteqaat aallaavigalugu oqallisissiaq


Apeqquteqaat aallaavigalugu oqallisissiat -Eqqaamasassat nalunaarsorsimaffiat

 

1. Tunniussivissatut killiliunneqartoq.

 

Apeqquteqaat aallaavigalugu oqallinnissamik siunnersuutit Inatsisartut ataatsimiinnerisa ingerlanerini ingerlaavartumik tunniunneqarsinnaapput. Nalinginnaasumilli siusinnerpaamik oqaluuserisassanut ilanngunneqarsinnaapput tunniunneqarnerminniit ullut suliffiusut aqqaneq-marluk qaangiutereerpata.

 

2. Ilusiliinissamut piumasaqaatit eqquutsinneqarsimanissaat.

 

Allannissaanut najoqqutassiaq atoruk partiillu allaffeqarfiinik ataatsimiititaliallu allattaanik ikiorteqarsinnaaneq atorluaruk. Ilusiliinissamut piumasaqaatit eqquutsinneqarsimanngippata siunnersuutip oqaluuserisassanut ilanngunneqarnissaa Inatsisartut Siulittaasoqarfiannit akuerineqarnavianngilaq.

 

3. Oqallisigitikkumasat maannakkorpiaq pisunut attuumassuteqarnersoq inuiaqatigiillu eqqarsaatigalugit pingaaruteqarnersoq isumaliutersuutigiuk.

 

Oqallisigitikkumasaq maannakkorpiaq pisunut annertunerpaamik attuumassuteqarpat  inuiaqatigiinnullu siamasissumik pingaaruteqarpat Inatsisartut ataatsimiinnerminni oqaluuserisassaannut ilanngunneqarnissaa ilimanarnerussaaq. Siunnersuutit najukkami pissutsinut taamaallaat tunngasut aallavittut isigalugu Inatsisartut Siulittaasoqarfiannit itigartitsissutigineqarnissaat naatsorsuutigineqartariaqarpoq. Aamma taamaappoq siunnersuutit “imakippallaat” pillugit. Assersuutigalugu Siorapalummi mannissarniartarneq pillugu oqallinnermit timmissat imarmiut nungutaanissaminnut ulorianartorsiortut qanoq pitsaanerpaamik ikiliartorunnaarsinneqarsinnaanerat apeqquteqaat aallaavigalugu oqallissisiatut siunnersuutigissallugu pitsaanerussaaq.

 

Pissutsit apeqquteqaat aallaavigalugu oqallinnissamut naammattumik tunngaviliisuun-ngitsut sammineqarnissaat kissaatigigukku taarsiullugu  Naalakkersuisunut allakkatigut apeqquteqarnikkut pissutsit pineqartut soqutigineqalersissinnaavatit. Apeqqutip taama­tullu Naalakkersuisut akissuteqaataasa nuutinneri Inatsisartunut ilaasortanut tusagassiorfinnullu nassiunneqartarput.

 

4. Sammineqartoq Inatsisartunit siusinnerusukkut oqallisigineqarsimanersoq misissoruk. Sammisat ukiuni kingullerni Inatsisartuni oqallisigineqarsimasut oqaluuserisassatut ilannguteqqinneqarsinnaanerat aallaavittut isigalugu naatsorsuutigineqarsinnaanngilaq. Pisariaqartikkukku ataatsimiititaliami allatsi aperisinnaavat.

 

5. Apeqquteqat aallaavigalugu oqallinnissamik siunnersuutip suliarineqarneranut atatillugu partiivit allaffeqarfianik ataatsimiititaliamilu allatsimik ikiorteqartarit, eqqaamalluguli ulloq tunniussereerfissaq sioqqulluarlugu ataatsimiititaliami allatsimut saaffiginnittariaqaravit (Inatsisartut ataatsimiinnissaata aallartinnissaa minnerpaamik sapaatit akunnerinik arfineq marlunnik sioqqullugu, ajornanngippalli siusinnerujussuakkut).

 

6. Eqqaamajuk apeqquteqaat aallaavigalugu oqallinnissamik siunnersuutit Inatsisartut Allattoqarfiannut qarasaasiakkut emailikkut pappiaranngorluguluuniit nassiutissagakku. Tamanna partiivit allaffeqarfia aqqutigalugu nalinginnaasumik pisarpoq.

 


Allatanut nassuiaatit

 

1. Ulluliunneqartoq tassaavoq ulloq siunnersuutip Inatsisartut Allattoqarfiannut nassiunneqarfia.

 

2. Siunnersuummut oqaluuserisassani normuliunneqartoq ilanngullugu partiip allaffeqarfianit Inatsisartulluunniit Allattoqarfiannit immersorneqassaaq. UPA tassaavoq upernaakkut ataatsimiinneq, UKA tassaalluni ukiakkut ataatsimiinneq.

 

3. Apeqquteqaat aallaavigalugu oqallisissiap qulequtaa ima aallartinneqassaaq ”...pillugu apeqquteqaat allaavigalugu oqallinneq” apeqquteqaallu aallaavigalugu oqallisigine­qartussatut siunnersuutigisami sammineqartup naatsumik ersarissumillu nalunaarneqarneranik siuleqartinneqassalluni. Qulequtaa silittumik

 

4. Siunnersuuteqartup taaguutaa, aqqa partiilu ilaasortaaffia apeqqutip sammineqartup qulequtaata atsinnguani ungaluusap iluani nalunaarneqassapput. Partii ilaasortaaffittut nalunaarneqartoq tassaasinnaavoq ass. ”Siumut”, ”Inuit Ataqatigiit”, ”Atassut”, ”Demokraatit”, ”Partii Naleraq” imaluunniit ”attaviitsoq”.

 

5. Itisilerutaasumik nassuiaat immikkut qulequtsernagu aallartinneqassaaq. Itisilerutaamik nassuiaatip apeqqutinut aalajangersimasunut Naalakkersuisut oqaaseqaateqarnissaannik kaammattuut imarigajuppaa (Taamaattumillu ”apeqquteqaat aallaavigalugu oqallinnermik” taaguuteqarpoq).

 

6. Inatsisartut Allattoqarfiannit immersorneqassaaq.

 

7. Inatsisartut Allattoqarfiannit immersorneqassaaq.

 

 

Apeqquteqaat aallaavigalugu oqallisissiap aallartissutigisinnaasaatut assersuut:

21. august 2015                                                                                                                                    UKA 2015/XX

                                                                                                                                                      

 

 

Inatsisartut Suleriaasianni § 36 naapertorlugu apeqquteqaat aallaavigalugu oqallinnissamik siunnersuut imaattoq matumuuna saqqummiuppara:

 

Sinerissap qanittuani aalisarnermi ajornartorsiutit pillugit apeqquteqaat aallaavigalugu oqallisissiaq

(Inatsisartunut ilaasortaq Karline Eliassen, attaviitsoq)    

 

Naluneqanngitsutut issittup raajaasa nunarsuarmi akiisa ukiuni kingullerni appariarnerisa nassataraa.....

 

Inatsisartut oqaaseqaatissaannut siunnersuut

Apeqquteqaat aallaavigalugu oqallinneq tunngavigalugu matumuuna Inatsisartut oqaaseqaatissaannik imaattumik saqqummiussaqarpunga:

 

Inatsisartut Naalakkersuisut kaammattorpaat …..