Politiit pillugit Naammagittaalliuuteqartarfik


Kalaallit Nunaanni politiini sulisuusut pillugit naammagittaalliuutinik aamma taakku pillugit pinerluttulerinermi suliassanik suliarinnittarneq pillugu inatsit nr. 905, 16. december 1998-imeersoq naapertorlugu politiit pillugit naammagittaalliuuteqartarfik pilersinneqarpoq.

 

Kalaallit Nunaanni politiini sulisuusut pillugit naammagittaalliuutinik, nalunaarutiginninnernik pinerluttulerinermilu suliassanik politiit pillugit naammagittaalliuuteqartarfik suliaqartarpoq.

 

Politiit pillugit naammagittaalliuuteqartarfiup inuttarissavai eqqartuussissuserisoq siulittaasutut, eqqartuusseqataasartullu marluk, taakku Inatsisartut inassuteqarnerisigut Justitsministerimit toqqarneqartarput.

 

Eqqartuusseqataasartut taakku Politiit pillugit Naammagittaalliuteqartarfimmi ilaasortatut suliaqarnermut peqatigitillugu kommunalbestyrelsimi, Inatsisartuni Folketingimiluunniit ilaasortaasinnaanngillat. Eqqartuusseqataasartut saniatigut Ministerit, Naalakkersuisunut ilaasortat, eqqartuussissuserisut aamma eqqartuussissuserisut allattaat kiisalu Namminersornerullutik Oqartussani qitiusumik allatseqarfimmi, eqqartuussivinni, Rigsombudimi, politiini aammalu pinerluttunik isumaginnittoqarfimmi tjennestemandit allatullu sulisorisat ilaasortaasinnaanngillat.

 

Piffissami toqqaanerup nalaani 65-inik ukioqalersussat toqqarneqarsinnaanngillat.

 

Politiit pillugit Naammagittaalliuuteqartarfimmi ilaasortat tamarmik Kalaallit Nunaanni najugaqassapput. Politiit pillugit Naammagittaalliuuteqartarfimmut ataasiaannarluni toqqaqqitsittoqarsinnaavoq.

 

Inatsisartut inunnik arfinilinnik innersuussissapput, taakkunannga arnat pingasut angutillu pingasut. Piumasaqaatit qulaani taaneqartut inuit innersuunneqartut naammassisimasussaavaat.

 

Inatsisartut inassutigisaasa akornanni eqqartuusseqataasartunik marlunnik kiisalu sinniisussanik marlunnik Justitsministeri toqqaasarpoq.

 

 

Piffissaq qinigaaffik

Politiit pillugit naammagittaalliuuteqartarfimmi ilaasortat ukiunut sisamanut toqqagaasarput.

 

Piffissamut toqqaaffimmut 1. januar 2014-mit 31. december 2017-mut inunnik arfinilinnik Inatsisartut kingullermik inassuteqarput.

 

Inatsisartut inassuteqaataat pillugit Justitsministereqarfiup Inatsisartunut saffiginnissuteqartarnera ileqquuvoq. Inatsisartut inassuteqaataat Justitsministereqarfimmut nalunaarutigineqassapput.

 

Politiit pillugit Naammagittaalliuuteqartarfimmut UKA 2017-mi Inatsisartut tulliani inassuteqassapput. Taamaaliortoqarpoq piffissamut toqqagaaffimmut 1. januar 2018-imit 31. december 2021-imut.

 

 

Saaffigisassaq:

Politiit pillugit Naammagittaalliuteqartarfik, Postbox 59, 3900 Nuuk. Oqarasuaat 32 13 70. Fax 32 41 17.