Inatsisartut Allattoqarfiat sullissinermi ikiortinik nutaanik pissarsiorpoq
Inatsisartunut ilaasortanut aamma Inatsisartut Allattoqarfianni immikkoortortanut allanut sullissinermi ikiortimik ataatsimik-marlunnik Inatsisartut Allattoqarfiat pissarsiorpoq.
Sullissilluarusussuseqartuuit? Oqaloqatikkuminartuuit? Iliuuseqartuusarlutillu akisussaaffimmik tigusisuusarpit? Piffissaq suliffiusoq equngalaarsinnaasartoq ajorinngiliuk? Taamaappat sullissinermut immikkoortortami sullissinermi ikiortitut atorfimmut inuttassarsiuussatsinnut tulluupputit.
Inatsisartut ilaasortanut allattoqarfiullu sulisuinut allaffissornikkut suliassanut pissutsinullu nalinginnaasunut apeqquteqartoqartillugu sullissinermut immikkoortortami sullissinermi ikiortitut attaveqaatitut inissisimassaatit. Ataatsimiinnerit nalaanni ilaatigut ilaasortat inaat pillugit suliassat tigummissavatit, partiit allattoqarfii aamma Inatsisartut Allattoqarfiat kiisalu suliassat allaffissornermut tunngasut assigiinngitsut isumagisassallugit. Tamatuma saniatigut ulapaarnerup nalaani suliassanut nalinginnaasunut ikiuuttarnissat naatsorsuutigineqarpoq.
Sullissinermut immikkoortortap Inatsisartut ilaasortaasa Inatsisartullu Allattoqarfianni sulisuisa ulluinnarni suliaat allaffissornermullu pingaarutillit arlalippassuit isumagisassarai.
Sullissinermut immikkoortortap ilaatigut makkua suliassarai:
- Ilaasortat, partiit allattoqarfiisa Inatsisartut Allattoqarfiatalu inissaannut tunngasut
- Suliffeqarfimmi illup iluani aserfallatsaaliineq eqqiaanerlu
- Qarasaasiatigut pappialakkullu allakkianik ilanngussanillu nuutiterineq Inatsisartullu ilaasortaannut agguaassineq
- Pisiniarneq
- Ataatsimiittunut sutugassat
- Allattoqarfiup allagaateqarfianik isumaginninneq (atortussanik tigusineq nalunaarsuinerlu)
- Sulilertunut nutaanut allaffiit atortussallu piareersarneri tikilluaqqusinerlu
- Inatsisartut initaasalu takujuminartuutinnissaannut iseruminartuutinnissaannullu qulakkeerinninneq
- Sanasunik, nussuisartunik assigisaannillu imitsinerit
- Kaffiliorfiit suliarineri
- Suleqatigiinnut aaqqissuussinerit suliarineri
Suliassat ilaatigut suliffiup iluani ilaannilu avataanit ikiorneqarluni suliarineqassapput.
Assersuutigalugu pisattanik nussuisunik sanasunillu imitsisarnissat eqqiaasunullu attaveqartarnissat suliassavit ilagissavaat.
Ulloq suliffiusoq allaffissornikkut suliassatigullu isumagisassartalik suliffigissallugu soqutigisarissavat. Assersuutigalugu ulloq suliffiusoq tassaasinnaavoq mailit akillugit qarasaasiakkut suliaqarneq, allagartanik nivinngaassuineq imaluunniit arlaannik iluarsaassineq.
Sullissinermut immikkoortortaq ullumikkut inunnik pingasunik-sisamanik sulisoqartussaavoq, Inatsisartut ataatsimiinneranni marlunnik ikiorteqartarluni. Allattoqarfimmi Sullissinermut immikkoortortami sulisut tamarmik Sulisoqarnermut allaffissornermullu immikkoortortami pisortaq qaninnertut qullersaraat.
Suliat ingerlasarneri, atorfimmi suliassanut nassuiaatit, sulinissamut pilersaarusiornerit il. il. eqeersimaartumik isumatusaartumillu suleqataaffigisassavatit.
Inuttut piginnaasat:
Ammasuussaatit, suleqatigiissinnaassuseqarlutit, sullisserusussuseqarlutit suliassanillu assigiinngitsunik arlalinnik ataatsikkut aqutsisinnaassuseqarlutit. Nammineersinnaassaatit ataqatigiissaarisinnaanermullu piginnaaneqarluassallutit. Inuttut qanimaatsuussaatit naaggaarsinnaanerlu qunuginagu. Tamatuma saniatigut ullormi suliffiusumi allaffissornikkut allatigullu suliassat nalinginnaasut akuleriiaartut suliarinissaannut kajumissuseqartuussaatit.
Microsoft Office (Word aamma Excel) aamma Outlook atornissaannut atuisutut misilittagaqarluassaatit. Allakkianik nalunaarsuinermut periutsinik misilittagaqarneq iluaqutaassaaq piumasaqaataananili.
Suliffeqarfimmi amerlavallaanngitsunik sulisoqartumi, nutaaliorusussuseqartumi, pitsanngorsaatissatullu siunnersuutinut ataatsimut isigalugu ammanermik ilisarnaateqartumi sulilissaatit. Qiimasuullutillu eqeersimaartuuvutit ulluinnarnilu nuannaarnermik tunniussaqartarlutit. Siusinnerusukkut atorfeqarfigisimasanit assingusunit misilittagaqareerneq ilinniakkatigullu tunuliaqutit isiginiarneqassapput. Taamaattoq ilinniagaqassutsinnut tunngatillugu immikkut piumasaqaateqartoqanngilaq.
Atorfininnermi atugassarititaasut:
Piginnaasat misilittakkallu tunngavigalugit immikkut isumaqatigiissuteqarlutit atorfinitsinneqassaatit. Atorfik nalinginnaasumik suliffiup avataatigut suliartoqquneqaratarsinnaanermik ilaqarpoq, ataatsimiittoqarnerata nalaani qaangiuttoornerpassuit pisarmata. Taakku immikkut akissarsiaqaataasarput.
Piaartumik sulilertussamik pissarsiorpugut.
Malittarisassat atuuttut naapertorlugit akilerneqartussamik pisatsersugaanngitsumik ineqartitsisoqarsinnaavoq. Atugassarititaasut isumaqatigiissutinut atuuttunut naapertuuttut malillugit atorfininnermut soraarnermullu atatillugu angalasoqarsinnaavoq pisariaqarpallu pisattat nuunneqarnerat ilanngullugu akilerneqarsinnaalluni.
Qinnuteqarneq:
Qinnuteqarfissaq pingasunngornermut 11. september 2024-mut killeqarpoq.
Qinnuteqaatit ilinniakkannut suliffiginikuusannullu paasissutissartalik, soraarummeersimanermut allagartat assilineri, uppernarsaatit il. il. ilanngullugit, sukkanerpaamik uunga nassiutikkit:
Inatsisartut Allattoqarfiat
Postboks 1060, 3900 Nuuk Grønland
emailikkulluunniit inatsisartut@inatsisartut.gl
Paasisaqarnerorusukkuit:
www.inatsisartut.gl-ikkut Inatsisartut aamma Inatsisartut Allattoqarfiat paasisaqarfiginerusinnaavatit.
Atorfik pillugu apeqqutissaqaruit allakkanik nalunaarsuinermi sulisumut David Lynge-Frederiksenimut oqarasuaatikkut 34 61 33-mut imaluunniit emailikkut dafr@ina.gl -imut attaveqarnissannut tikilluaqqusaavutit.