1. Inatsit atuuttoq naapertorlugu allaffissornikkut, aqutsinikkullu meeqqerivinni aqutsisunit ullumikkut suliareqqusaasut Naalakkersuisut qanoq nalilerpaat? 2. Meeqqerivinni aqutsisut perorsaanikkut aqutsisutut akisussaaffimmi isumaginissaasa periarfissaannut, suliassat massakkut agguataarneqarnerat sunniuteqarnerat Naalakkersuisut qanoq nalilerpaat? 3. Pingaartumik sulisunik ataavartunik amigaateqarnermi, meeqqerivinni aqutsisut allaffissornikkut nammataannik oqilisaanissamik pisariaqartitsineq pillugu Naalakkersuisut qanoq isumaliuteqarpat? a. Allaffissornikkut sulisunik imaluunniit sulisunik allanik atuineq ilanngullugu, meeqqerivinni allaffissornikkut suliassat naleqqunnerusumik suliarineqartarsinnaanissaat Naalakkersuisut qanoq tapersersorniarpaat? b. Meeqqerivinnik ulluinnarni ingerlatsinermi, allaffissornikkullu sulinermi NI-mi soraarummeersimasut ilanngullugit allaffissornermi ilinniarsimasut akuutinneqarnerunissaanut suut Naalakkersuisut periarfissaasoraat? 4. Meeqqerivinni aqutsisut eqqissillutik, illersorneqarsinnaasumik, inatsisillu siunertaanut naapertuuttumik suliassaminnik suliaqarsinnaanissaannut pisariaqartumik sinaakkuteqalernissaat Naalakkersuisut qanoq qulakkeerniarpaat? 5. Sammisamut soqutiginartunik allanik Naalakkersuisut paasissutissiisinnaappat? Inatsisartunut ilaasortaq Pipaluk Olsen, Demokraatit

1. Juumuut, sulisullu allat naartusunik qanimut sullissisut ilanngullugit peqqinnissaqarfimmi sulisutigut, suliatigullu isumalluutinik massakkut atuineq Naalakkersuisut qanoq nalilerpaat? 2. Ilaqutariinnut ilitsersuinerup, tarnikkut katsorsaanerup, ajoqusernermit kingunerlutitsinermut katsorsaanerup aamma naalungiarsunnik katsorsaanerup iluini peqqinnissaqarfimmi sulisunik ilinniaqqissimasunik atuineq Naalakkersuisut qanoq annertusarniarpaat? 3. Peqqinnissaqarfimmi sulisut ilinniaqqinnermi kingorna kommunip, isumaginninnerup imaluunniit allarluinnaap iluani suliniarlutik peqqinnissaqarfimmit soraartartut pigiinnarumallugit Naalakkersuisut qanoq isumaliuteqarpat? 4. Naartusut, angajoqqaanngortussallu immikkoortortat, immikkoortortaqarfiillu assigiinngitsut akornanni innersuunneqaqattaaratik peqqinnissaqarfimmi ataqatigiinnerusumik, qaninnerusumillu tapersersorneqarsinnaanissaat Naalakkersuisut qanoq qulakkeerniarpaat? 5. Pingaartumik kommunimit neqeroorutit utaqqinarsinnaatillugit naartusunut misigissutsikkut, eqqarsartaatsikkullu inooqataanikkut peqqinnissaqarfimmi siusissumik tapersersuinerup annertusarneqarnissaanut Naalakkersuisut suut periarfissaasoraat? 6. Peqqinnissaqarfimmi sulisut ilinniaqqinnissaannut aningaasaliinerit, peqqinnissaqarfimmi ulluinnarni sulinermi piginnaasat aamma iluaqutigineqarnissaat Naalakkersuisut qanoq qulakkeerniarpaat? 7. Sammisamut soqutiginartunik allanik Naalakkersuisut paasissutissiisinnaappat? Inatsisartunut ilaasortaq Pipaluk Olsen, Demokraatit

1. Meerarsiat, angajoqqaarsiallu feriaqatigiissinnaanissaannut, sammisassanullu peqataaqatigiissinnaanissaannut massakkut periarfissaasut Naalakkersuisut qanoq nalilerpaat? 2. Meerarsiat feriaqatigisinnaanerinut periarfissat ullumikkut kommunimit, kommunimut assigiinngitsumik iliuuseqarfigineqartarnerat Naalakkersuisut qanoq isumaqarfigaat? a. Meerarsiat kommunimi sumiikkaluarunik feriarnissamut, misigisaqarnissamullu assigiimmik periarfissaqarnerinik qulakkeerisumik nuna tamakkerlugu ersarissunik, assigiinnillu sinaakkuteqartitsinissamik pisariaqartitsineq pillugu Naalakkersuisut qanoq isumaliuteqarpat? 3. Pisortani, namminersortunilu sulisorpaaluit akiliunneqarlutik angalasinnaatitaanerat assigalugu meerarsiat, angajoqqaarsiallu feriarnissaannut aningaasanik immikkoortitsisoqassappat tamanna aningaasatigut, allaffissornikkullu pisortanut qanoq kinguneqassava? a. Meerarsiat atugarissaanerinut, attaveqarnerinut, allanngujaatsumillu atugaqarnerinut taamatut aaqqiissuteqarneq qanoq tapertaasinnaanersoq Naalakkersuisut qanoq nalilerpaat? b. Aaqqiissut kommuninit pisariitsumik, allaffissornikkullu aqunneqarsinnaasumik ilusilersorneqarnissaanut suut Naalakkersuisut periarfissaasoraat? 4. Sammisamut soqutiginartunik allanik Naalakkersuisut paasissutissiisinnaappat? Inatsisartunut ilaasortaq Pipaluk Olsen, Demokraatit

1. Angajoqqaat qitornami napparsimasup angerlarsimaqatiginissaanut periarfissaat pillugu massakkut malittarisassaasut Naalakkersuisut qanoq nalilerpaat? 2. Meeraq suli napparsimagaluartoq meeqqerivimmukaanneqartillugu meeqqap pisariaqartitai pillugit Naalakkersuisut qanoq isumaliuteqarpat? 3. Meeqqap peqqissinissaata tungaanut angerlarsimaqatiginissaanut angajoqqaaq pisinnaatitaaffilerneqassagaluarpat tamanna aningaasatigut, allaffissornikkullu pisortanut qanoq kinguneqassava? 4. Meeqqerivinni, suliffeqarfinnilu tunillaassuunnermut massakkut malittarisassaasut sunniuteqarnersut Naalakkersuisut qanoq nalilerpaat? 5. Meeqqat peqqissusaat, angajoqqaat suliffeqarnikkut inissisimanerat, meeqqeriviillu ingerlatsinerat eqqarsaatigineqarlutik ataqatigiinnerusunik, eqaannerusunillu aaqqiissutinik pilersitsinissamut Naalakkersuisut suut periarfissaasoraat? 6. Sammisamut soqutiginartunik allanik Naalakkersuisut paasissutissiisinnaappat? Inatsisartunut ilaasortaq Pipaluk Olsen, Demokraatit

1. Meeqqerivinni massakkut atorfiit akuerisaasut, sulisunullu massakkut sulinermi atugassarititaasut Naalakkersuisut qanoq nalilerpaat? 2. Meeqqerivinni sulisunik amigaateqarnerup, sulinermi tatineqarnerup, ulluinnarnilu meeqqat paarineqarnerisa pitsaassusaata akornanni ataqatigiinneq Naalakkersuisut qanoq nalilerpaat? 3. Meeqqerivinni tamani inimi ataatsimi atorfiit akuerisaasut minnerpaamik sisamanngortinneqassagaluarpata tamanna aningaasatigut, allaffissornikkullu pisortanut qanoq kinguneqassava? 4. Atorfiit tunngaviusumik akuerisaasut amerlissagunik tamanna meeqqerivinni ulluinnarni paarlatseqartariaqartarnermut, sulisutigullu piaartumik aaqqiissuteqartariaqartarnermut qanoq sunniuteqassanersoq Naalakkersuisut qanoq nalilerpaat? 5. Perorsaasut iggavimmi suliassanik, eqqiagassanillu suliaqartariaqartarnerat ilanngullugu sulisut marloqiusamik suliaqartinneqartarnerat Naalakkersuisut qanoq isumaqarfigaat? 6. Uippakajaarnissaq, napparsimalluni sulinngittarnerit, sulisullu soraartarnerat pinaveersaartinneqarnissaat siunertaralugu, meeqqerivinni sulisunut sulinermi atugassarititat nukittorsarneqarnissaannut Naalakkersuisut qanoq isumaliuteqarpat? 7. Sammisamut soqutiginartunik allanik Naalakkersuisut paasissutissiisinnaappat? Inatsisartunut ilaasortaq Pipaluk Olsen, Demokraatit

1. Kalaallit Nunaanni innuttaasut akileraartartut tamarmik nunatsinni pisortat peqqinnissaqarfianni neqeroorutinut tamanut pisinnaatitaaffeqarpat? 2. Innuttaasunik peqqinnissaqarfimmit ikiorserneqarnissamik itigartinneqarsimasunik sulianik Naalakkersuisut ilisimasaqarpat? A) Aappiuppat, qanoq amerlatigisut aamma sooq? B) Naamiuppat, Peqqinnissaqarfitsinnik innuttaasut naliliinerannik misissuinissamik Naalakkersuisut suliaqalersaarpat? 3. Peqqinnissamik oqartussaasut ulapippallaarneq pissutigalugu pinasuartumik saaffiginnittunik itigartitsisariaqartarsimasutNaalakkersuisut ilisimasaqarpat? Inatsisartunut ilaasortaq Nivi Rosing, Inuit Ataqatigiit

1. Qaqortumi mittarfissaq atulerpat kujataani qulimiguulimmik kiffartuussinerit ingerlaannassasut Naalakkersuisut qulakkeerusuppaat? 2. Qaqortumi mittarfissaq atulerpat nunatta kujataani innuttaasut angallannikkut kiffartuunneqarnerat ajorseriaateqannginnissaa qulakkeerniarlugu imaatigut silaannakkullu angallassinerit ingerlaannarnissaat qulakkeerniarlugu Naalakkersuisut sulippat? 3. Nunatta kujataa eqqarsaatigalugu kiffartuussinissamik isumaqatigiissutit nutarternissaannut suliaq sumut killippa aammalu qaqugu isumaqatigiissut naammassineqarnissaa Naalakkersuisut naatsorsuutigaat? Inatsisartunut ilaasortaq Anders Olsen, Siumut)