2023-mi Inatsisartut ukiakkut ataatsimiinnissaannut (UKA23-mut) oqaluuserisassat ullumi nassiussuunneqarput.

 

Inatsisartut ukiakkut ataatsimiinnerat tallimanngornermi ulloq 22. september 2023 nal. 11.00 aallartissaaq 10. november 2023-llu tungaanut ingerlasussatut pilersaarutigineqarluni.

 

Taamaalilluni Inatsisartunut ilaasortanit immikkoortut nutaat katillugit 17-it Naalakkersuisunillu immikkoortut nutaat 19-it UKA23-mi suliarineqartussatut oqaluuserisassanut ilanngunneqarput.

 

Sapaatit akunnerini ullut ataatsimiiffiusartussat imatut agguataarneqarput:

 

2023-mi ukiakkut ataatsimiinneq (UKA23)

Ullut ataatsimiiffiusussat imatut agguataarneqarput:

· Ukiakkut ataatsimiinneq tallimanngornermi ulloq 22. september nal. 11.00 aallartissaaq. Tamanna sioqqullugu Hans Egedep Illuaniit Annaassisitta Oqaluffiannut naalagiarnissamut ingerlaaqatigiittoqassaaq

· Inatsisartut ataatsimiittarfianni ullut ataatsimiiffiusut sapaatip akunneranut pingasuussapput – marlunngorneq, pingasunngorneq aamma sisamanngorneq – piffissami nal. 11.00-imiit 17.00-imut, taamaattorli naammassisarnissanut immikkoortut Inatsisartut ataatsimiittarfianni naammassineqarsimanersut apeqqutaasassalluni

· Sapaatilli akunnerani 39-mi, 43-mi 45-milu ullut ataatsimiiffiusut sisamaassapput

· Sapaatip akunnera 44 ataatsimiiffiussanngilaq, ataatsimiititalialli ataatsimiittassallutik

· Pingasunngornerit tamaasa piffissami nal. 10.00-imiit nal. 11.00-imut Naalakkersuisunut akunneq apeqquteqarfiusinnaasoq ingerlanneqartassaaq, tamatumalu kingorna ataatsimiittarfimmi ataatsimiinneq nanginneqartassalluni. Akunneq apeqquteqarfiusinnaasoq siulleq ulloq 27. september ingerlanneqassaaq. Naalakkersuisut apeqquteqarfigineqarsinnaasut tulleriinnerat Inatsisartut nittartagaanni takuneqarsinnaassaaq

· Ataasinngornerit tallimanngornerillu ataatsimiititaliani ataatsimiiffiusassapput

· Inatsisartut siulittaasussaannik siulittaasoqarfimmillu qinersinerit (oqaluuserisassani immikkoortoq 3) ulloq 22. september ingerlanneqassaaq

· UKA23-mi ulloq ataatsimiiffiusussaq kingulleq ullut 22-it ataatsimiiffioreersullu tassaassaaq ulloq 10. november 2023.

 

Apeqquteqaat aallaavigalugu oqallinnissanik siunnersuuteqarnissaq ulloq 8. september nal. 12.00-imut killeqarpoq, taamaattumillu tamatuma kingorna oqaluuserisassat naleqqussarneqarsinnaassallutik.

 

UKA2023-mut tunngatillugu atortussat tamarmik www.inatsisartut.gl-imi takuneqarsinnaapput, soorlu aamma oqaluuserisassani allannguutit oqaluuserisassanut nassuiaammi takuneqarsinnaasassasut.

 

Ataatsimiinnissaq sapaatip akunneranik ataatsimik sioqqullugu iluarsiissuteqarnissamik siulittaasoqarfimmut qinnuteqarnissamut periarfissaqarpoq, taamaattumillu oqaluuserisassani allanngortitsisoqartarsinnaalluni. Iluarsiissutit tamarmik nittartakkami ingerlaavartumik iluarsineqartassapput.

 

 

Siulittaasoqarfik sinnerlugu

 

 

Kim Kielsen