Kukkunersiuinermut Ataatsimiititaliaq ataasinngormat inissitsiterpoq tassungalu atatillugu kukkunersiuisumit Inatsisartunit toqqakkamit uku tigullugit

 

Naalakkersuisunut ilaasortat Namminersorlutik Oqartussanut il.il. akiligassaqarnerannik misissuineq, 3. novembari 2014 aamma

 

Naalakkersuisunut ilaasortat Namminersorlutik Oqartussanut akiligassaat pilugit malinnaatitsilluni suliaq, 7. novembari 2014

 

Tassunga atatillugu sulinerup qanoq ingerlanneqarsimanerata kiisalu qinersinerup nalunaarutigineqarnerata nalaani suliap sumut killissimanerata qulaajarneqarnissaat siunertaralugu ataatsimiititaliap kukkunersiuisoq avataaneersoq ataatsimeeqatigaa.

 

Misissuineq amerlasuunik akissutissarsiffiuvoq, aammali arlalinnik apeqqutissarsiffiulluni kiisalu  kaammattuutinik arlalinnik saqqummiussiviulluni. Taamaattumillu apeqqutinut saqqummersunut isummernissaat siunertaralugu misissuinerup inernerata Naalakkersuisunut ingerlateqqinneqarnissaa Kukkunersiuinermut Ataatsimiititaliamit aalajangiunneqarpoq. Naalakkersuisut qanoq iliuuseqareersimanersut aammalu siunissami taama pisoqaqqeqqunagu qanoq iliuuseqalersaarnersut ilanngullugu paasissutissiissutigeqquneqarpoq.

 

Naalakkersuisut akissutaata kunngit pingasut ulluanni ullup qeqqartinnagu tiguneqarnissaa naatsorsuutigineqartoq Kukkunersiuinermut Ataatsimiititaliamit nalunaarutigineqarpoq. Oqaaseqaatit tiguneqareeriarpata Kukkunersiuinermut Ataatsimiititaliamit isummerfigineqarumaarput.

 

 

Randi V. Evaldsen

Kukkunersiuinermut Ataatsimiititaliap siulittaasua

 

Paasissutissat annertunerusut Kukkunersiuinermut Ataatsimiititaliap siulittaasuanut Randi V. Evaldsenimut mobil +299 54 72 12-imut attaviginninnikkut pissarsiarineqarsinnaapput.