Inuk imaannaanngitsoq, politikeri imaannaanngitsoq aqutsisorlu nukittooq Kalaallit Nunaata annaavaa.

Inatsisartunut ilaasortap borgmesterillu Agnethe Davidsenip ilimaginngisatsinnik tassanngaannaq qimagunneratigut nunami maani najugaqartugut tamatta imaannaanngitsumik maqaasisassaqalersinneqarpugut.

Aaqqissuussaanermik iluarsaaqqinnermi nunarsuarmi kommunit anginersaannik pilersitsinissami paasisimasaqarluartuunini, siumut takorluugaqarluartuunini aqutsisinnaassuseqarluarninilu piffissami aggersumi Kalaallit Nunaannut iluaqutissanngortittussanngoraluarlugit Nuup borgmesteria, suliumatuutut, sunniuteqarluartutut pingaartitaalluartutullu,  ukiut qulit sinnerlugit borgmesterioreerluni qimaguppoq.

Kalaallit Nunaata ineriartorneranut iluaqutaanerpaasussaq angujumallugu borgmester Agnethe Davidsen 2005-mi qinersinermi Kalaallit Nunaata Inatsisartuinut ilaasortatut atuutilerpoq. Tamanna pivoq nunarput tamakkerlugu kommuninilu Kalaallit Nunaata siunissaa pillugu anguniagassatut siunniussanik pingaarutilinnik aalajangigassat piviusunngortitsinissallu peqataaffigisinnaajumallugit. Inatsisartunut ilaasortaq borgmesterilu Agnethe Davidsen aaqqissuussaanermik iluarsaaqqinnermut nunatta atorfissaqartitaatut isigisaminut aalajaatsumik piumassuseqqortussutsi siunissamullu ersarissunik takorluugaqarsinnaassutsi iluaqutissanngortissimavai. Kalaallit Nunaanni kommunit anginersaattut pilersaarut annertooq Agnethe Davidsenip nammineerluni siuttuuffissamisut tigusimavaa.

Agnethe Davidsen inersimasutut inuunini tamakkerlugu inuiaqatigiinni kalaallini pingaarutilinnik atuuffeqartarsimavoq. 1960-ikkut naajartorneranniit eqqartuussivimmi sulisutut eqqartuussisutullu atuutereerluni 1983-mi isumaginninnermut tunngasunut Naalakkersuisutut pissusissamisoortumik atuutilerpoq. 1989-miit ukiut marlussuit Nuummi kommunalbestyrelsimeereerluni 1993-mi Agnethe Davidsen borgmesterinngorpoq toqunissilu tikillugu taamatut atuulluni.

Agnethe Davidsen qinigaaffinni marlunni 1995-miit 97-mut aammalu 2005-miit toqunissi tikillugu Kalaallit Nunaata Inatsisartuinut ilaasortaavoq. Atuuffini allat aqqutigalugit, inooqataanermigut inuiaqatigiinnilu akuunermigut, siunissamut ersarissunik takorluugaqarnermigut sakkukillinngisaannartumillu sunniuteqarnermigut Agnethe Davidsen sulinermini inuiaqatigiissutsitsinni arnaasimavoq maligassiuisoq.

Qinikkatut sulinini tamakkerlugu Agnethe Davidsen partiimut Siumumut sinniisuujuarsimavoq. Kalaallit Nunaata oqaluttuarisaanerani Agnethe Davidsen arnanit qinikkanit sunniuteqarnerpaasimammat qularutigineqassanngilaq. Atuuffigisimasamini tamani Agnethe mikinngitsumik maqaasineqassaaq. Agnethip qimagutiaarpallaarneratigut Kalaallit Nunaat inuiaallu kalaallit taarserneqarsinnanngitsumik annaasaqarput.

Kalaallit Nunaanni Inatsisartut sinnerlugit Agnethe Davidsenip toqunerani aliasungaarnerput ersersikkumavara. Agnethip ilaqutai ikinngutaalu eqqarsaatitsigut najorlugillu misigeqatigaavut.

Jonathan Motzfeldt

Inatsisartut siulittaasuat