Inatsisartunut ilaasortaq Hans Enoksen pingasunngornerup unnuaani ulloq 18. september 2025 69-inik ukioqarluni toqukkut qimaguppoq.

Hans Enoksenimut eqqaaniut.

Hans Enoksen 1956-imi Itillimi inunngorpoq. Niuertutut ilinniarsimavoq ukiorpaalunnilu nunaqarfinni inunngorfimmini nunaqarfimmi niuertutut sulisimalluni. Tamatuma saniatigut ukiuni arlalinni taamatuttaaq kommunefogeditut sulisimavoq.
1979-imiit 1983-imut Hans Enoksen Itillimi ilagiit sinniisaannut ilaasortaavoq, taamatullu aamma 1987-imiit 2001-imut nunaqarfimmi aqutsisunut ilaasortaalluni. 2000-imiit 2001-imut taamatuttaaq nunaqarfiit peqatigiiffiannut, KANUNUPE-mut, siulittaasuuvoq.

Hans Enoksen 1989-imi kommunimi naalakkersuinikkut ingerlatsinermut iserpoq ukiunilu tulliuttuni aqqaneq-marlunni Sisimiuni kommunalbestyrelsimut ilaasortaalluni, 1997-imiit 2001-imut borgmesterip tulliatut siullertut 1998-imilu Simon Olsenip sulinngiffeqarnerani piffissap ilaani borgmesteritut.

Hans Enoksen 1995-imi nuna tamakkerlugu naalakkersuinikkut ingerlatsinermut iserpoq 1995-imiillu toqussi tikillugu Inatsisartunut ilaasortaalluni. 2001-imiit 2002-mut Aalisarnermut, Piniarnermut Nunaqarfinnullu Naalakkersuisuuvoq, 2002-miillu 2009-mut (taamanikkut partiini Siumut sinnerlugu) Naalakkersuisut Siulittaasoralugu. 2014-imi Siumut qimappaa ukiorlu taanna Naleraq 2022-p tungaanut siulittaasuuffigisani pilersillugu.

Piffissami 2021-miit 2022-mut Inatsisartunut Siulittaasuuvoq.

Minnerunngitsumik Naalakkersuisut Siulittaasuattut, kisiannili aamma partiip siulittaasuatut partiimillu pilersitsisutut, Hans Enoksen Kalaallit Nunaanni naalakkersuinikkut ingerlatsinermut qaangiinnagassaanngitsunik sunniuteqarsimavoq. Minnerunngitsunik aalisartut piniartullu atugarisaasa, taamatullu aamma nunaqarfinnut isorliunerusunullu atugassarititaasut, pitsanngorsarneqarnissaat naalakkersuinermik suliaqarnermini pingaartissimaqai. Kalaallisut oqaatsivut, nammineq pitsaalluinnartumik atorsinnaasami, pingaartitaasa aamma ilagisimavaat, minnerunngitsumillu Kalaallit Nunaata namminerisaminik naalagaaffinngornissaanik ilungersuuteqarneq pingaartitaanut ilaasimallutik.

Uagut - Inatsisartuni ilaasortaaqataasa – oqallinnerni erseqqissunik sakkortuunillu oqariartuuteqartartutut, kisiannili aamma inuttut kissalaartutut inussiarnersutullu illassamut ungasinngitsutut inunnillu allanik isumassuinissaminut tunuarsimaanngitsutut ilisarisimavarput.

Hansi pujortarneq ajorlunilu aalakoornartortalinnik najuineq ajorpoq, oqaluttuartarneratut: Tamanna aataakkut aanaakkullu mianersoqqussutigisarsimammassuk. Utoqqarnik ataqqinninneq kinguaariinnullu uagutsinnik malinnittussanut pitsaasumik maligassiuisuunissarput Hans Enoksenip pingaartitaasa aamma ilagisimavaat.

Hans Enoksen pisussaassutsiminik ilaginnaajumanngitsuuvoq, naalakkersuinermillu suliaqarnermini tamarmi pingaartitani nukittulluni ataavartumillu sorsuutigisarsimallugit. Naak napparsimallunilu sanngiillisimagaluarluni Inatsisartut ukiakkut ataatsimiinnerannut peqataajartorluni Nuummukarsimanerata aalajaatsumik pissuseqarnera ersersiinnarsimavaa. Tikinnermi kinguninnguatigut ataatsimiinnerullu ammarneqarnissaata siulinnguatigut napparsimmavissuarmut unitsinneqarpoq. Ukiakkut ataatsimiinneq ammarneqaliivissoq toqukkut qimaguppoq. Maqaasissaqaarput.

Hans Enoksen 2004-mi kuultiusumik Nersornaaserneqarpoq ukiorlu taanna aamma Dannebrogsordenimik saqqarmiulerneqarluni.

Qamannga pisumik misiginneqataanerput nulianut ilaqutaanullu ersersikkusupparput.

Eqqaaneqarnera ataqqinartuuli.

Inatsisartut Siulittaasuat

Kim Kielsen