EQQAANIUT

Mikael (Miia) Petersenimut eqqaaniut,

Inatsisartunut ilaasortaasimasoq Mikael (Miia) Petersen novembarip ulluisa 25-ani 2025 69-inik ukioqarluni toqukkut qimaguppoq.

Mikael Petersen Niaqornani 1956-mi inunngorpoq. Frederikshavnip amutsiviani maskiinalerisutut ilinniarpoq Ålborgillu teknisk skoliani soraarummeerluni, tamatumalu kingorna Ålborgimi maskinmesteritut soraarummeerpoq. 1980-imit 1987-imut Uummannami innaallagissiorfimmi sulivoq 1983-imilu Uummannap kommunalbestyrelsianut ilaasortanngorpoq piffissamilu 1984-imiit 1995-imut borgmesterimut tullersortaavoq aammalu piffissami 1993-imiit 1995-imut KANUKOKA-mut ilaasortaalluni.

Politikikkut sulinermini Mikael Petersen siullermik 1983-imit 1995-imut Uummannami kommunalbestyrelsimut ilaasortaavoq Inatsisartunullu 1987-imi siullermik qinigaalluni. Piffissani qinigaaffiusuni sisamani 1987-imit 1991-imut aammalu 1995-imit 2005-imut Inatsisartunut ilaasortaavoq. Piffissami 1995-imit 1997-imut Aningaasaqarnermut Ataatsimiititaliamut siulittaasuuvoq. Mikael Petersen marloriarluni Naalakkersuisuusimavoq siullermik 1997-imit 1999-imut aammalu 2002-mit 2004-mut. Mikael Petersen 2000-imit 2002-mut namminersorneq pillugu isumalioqatigiissitami aamma ilaasortaasimavoq.

Politikikkut sulinermi saniatigut Mikael Petersenip Uummannami arsaattartut UB-68 assut soqutigisarisimavaa piffissamilu 1980-imit 1985-imut siulittaasuuffigisimallugu. Mikael Petersenip illoqarfigisaminut soqutiginninnini ilinniakkamigullu tunuliaqutini kommunalbestyrelsip ataatsimiititaliaanni arlaqartuni atuuffimmigut ersersittarpai. Najukkamini taamatullu nuna tamakkerlugu naalakkersuinermik suliaqarnermini kultureqarnermut aammalu teknikeqarnermut ataatsimiititaliat ilaasortaaffigigajussimavai.

Mikael Petersenip ”Uummannaq trawl ApS” 1986-imi pilersippaa ilaatigullu Namminersorlutik Oqartussat aktiaateqarlutik ingerlatseqatigiiffiutaanni arlalinni siulersuisunut ilaasortaasarsimalluni. Ilaatigut Royal Greenlandimi sinniisoqarfimmut piffissami 1991-imit 1993-imut siulittaasuusimavoq, piffissami 1993-imit 1995-imut Tele Greenland A/S-imut siulittaasuusimalluni aammalu piffissami 1995-imit 1997-imut KNI Pilersuisoq A/S-imut siulittaasuusimalluni.

Aammalu ukiut ingerlanerini partiimini tatigisaalluni atuuffiit nuimasut arlallit ingerlassimavai aammalu 1997-imi piffissami sivikitsumi Siumumut siulittaasuusimalluni.

Miiap eqqaamaneqaatigissavai naalakkersuinikkut unammillernartoqarnerani aaqqiissuteqarnissamik ujartuisarnini tunniussimalluarninilu, ilakkuminartuunini angusaqarusussuseqartuuninilu aammalu naalakkersuinikkut tunuliaqutigisaminik peqataatitsisarnini.

Nulia ilaqutaalu qamannga pisumik misiginneqatigaavut.

Eqqaaneqarnera ataqqinartuuli.

Inatsisartut Siulittaasuat
Kim Kielsen