Thue Christiansen 82-inik ukioqarluni 2022-mi juunip ulluisa 26.-ata unnuaani Jyllandip avannaani illoqarfimmi Halsimi toqukkut qimaguppoq.

 

Thue Uummannap eqqaani Marmorilimmi 1940-mi inunngorpoq. Ilinniartitsisutut ilinniarsimavoq siullermillu Danmarkimi kingornalu Kalaallit Nunaanni atuarfimmi atuartitsisuulluni.  Namminersorluni Oqartussaanerup eqqunneqarnerani Kultureqarnermut Ilinniartitaanermullu siullersaalluni Naalakkersuisunngorpoq taamatullu atuuffeqarluni 1983-ip tungaanut. Kiisalu ukiuni 1975-76-imi piffissani sivikitsuni Folketingimi sinniisuusarsimavoq.

 

Ilinniartitsisutut sulinini naalakkersuinermillu ingerlataqarnini nunatsinni nunattalu avataani kisiisa tusaamaneqaatiginngilai. Thue pingaarnertut tassaavoq eqqumiitsuliortoq.

 

Thue eqqumiitsuliortutut imminut ilinniartippoq. Eqqumiitsuliortutut ingerlatsinermini tamatigoortuuvoq: Suliffeqarfiit peqatigiiffiillu arlallit ilisarnaasiortarsimavai ilisimaneqarnerpaallunilu nuannarineqarnerpaagunarpoq KNI-p ilisarnaataa tungujortumik tunuliaqutilik marlunnillu nanortaqarlunilu qaasuitsup ulloriartalik. Frimærkinik titartaasarpoq (juullimullu nipitittakkamik ataatsimik), allaallumi pequtinik ataasiakkaanik ilusilersuisimalluni. Maniitsumi kommunip ataatsimiittarfia kusassarsimavaa aammalu suliai marluk tamarmik saviminermik sanaat Nuummi rådhusip silataani kusassaataapput.

 

Kulturikkut Illorsuarmi Katuami immikkut aaqqissuussisoqartillugu oqaluttarfiliaa kusanartoq, umiap siorngatut ilusiligaq, nuannaarutigineqarluartarpoq. Pisortat ingerlatsiviini allaffiinilu, taamatullu angerlarsimaffippassuarni, kalaallit arnartaannik assilialiai iikkani takussaapput.

 

Aammali qiperuilluni kusanartuliorneq pikkoriffigilluinnarpaa kikkulluunniillu piniartunut saviliaanik tigummiarsimasut puigulertorneq ajorpaat atortussaminik toqqaanermini, suliarinninnermini kusassarnerinilu qanoq peqqissaarussisarsimatiginersoq.

 

Kultureqarnermut Pisortaqarfimmi ukiorpanni atorfilittatut sulereerluni kalaallit eqqumiitsuliaannik ineriartortitsinissamik suliniummut pisortanngormat kalaallit eqqumiitsulioriaasiata tammatsaalineqarnissaanik ineriartortinneqarnissaanillu soqutiginninnera amerlasuunut isumassarsiorfiusarsimavoq.

 

Thue suliaminit ilisimaneqaatiginerpaavaa; Erfalasorput, 1985-imilli erfalasoriligarput. Thue Christiansen akornatsinniikkunnaarpoq, Erfalasuttali; pilersissimasaata, nunatsinnut asanninnitsinni ataatsimoortittuassavaatigut.

 

1991-imi Thue Christiansen kuultimik Nersornaasigaavoq aammalu 1997-imi Ridder af Dannebrogordenimik nersornaasigaalluni.

 

Nulia ilaqutaalu misigeqatigingaarpakka.

 

Eqqaaneqarnera ataqqinartuuli.

 

 

Inatsisartut Siulittaasuat

Kim Kielsen