Folketingep Udenrigspolitiske Nævnip Kalaallit Nunaanniinnera

Folketingep Udenrigspolitiske Nævnianit aallartitat sivikitsumik paasisassarsiorlutik ulluni 18.-20. august nunatsinneeqqammerput. Aallartitaasut ippassaq sisamanngornermi ulloq 19. august Inatsisartut Nunanut Allanut Sillimaniarnermullu Ataatsimiititaliaannik ataatsimeeqateqarput. Ullormut oqaluuserisassatut oqaluuserineqartut pingaarnertut ukuusimallutik,  Kalaallit Nunaata nunanut allanut tunngasutigut siunissami piginnaatitaaffissai kiisalu EU-mi isumaqatigiissutip nutaap nunatsinnut kinguneqaatissai.

Nunanut allanut tunngasutigut naalakkersuinikkut aammalumi suliatigut takuneqarsinnaasumik ukiuni kingullerni nunarput, Namminersornerulluni Oqartussaanermi inatsimmiittut sipporlugit ineriartorfiusimavoq. Ineriartornerlu tamanna taamatullu Kalaallit Nunaata siunissami nunanut allanut tunngasutigut piginnaatitaaffissai Udenrigspolitisk Nævnip Inatsisartullu Nunanut Allanut Sillimaniarnermullu Ataatsimiititaliaata ataatsimiinnerminni oqallisigaat. Namminersorneq pillugu Isumalioqatigiissitat pilersinneqarneratigut taamatullu Statsminister Anders Fogh Rasmussenip Kalaallit Nunaata siunissami piginnaatitaaffissaasa aalajangersaaffiginissaat pillugu inatsisissamik saqqummiussiumalluni oqaaseqarneratigut suliat ingerlalersut oqallinnermut pingaarnertut aallaaviupput. Ataatsimoortumik isumalioqatigiissitat suliaqarnerisa nalaanni inatsisissatut siunnersuummik saqqummiusseratarsinnaanerup qanoq nassataqarnissaa oqallisigineqarpoq. Nunanut allanut sillimaniarnermullu tunngassutillit tassarpiaapput Isumalioqatigiissitat suliarisassaasa pingaarnerit ilagaat. Inatsisissatut siunnersuut Isumalioqatigiissitat suliaannik toqqaannanngitsumik killiliisuusussaan-ngimmat illuatungeriit pingaartutut isigaat. Namminersornerullutik Oqartussaanermi inatsit tamaat, apeqqutillu immikkuullarissut kisiisa pinagit nalilersoqqittariaqarnera pisariaqartuusoq Ataatsimiititaliamit erseqqissarneqarpoq.

Inatsiseqarnikkut nutaamik isumaqatigiissusiornermut atatillugu Danmarkip Kalaallillu Nunaata EU-mut attaveqarnerannut tunngasut apeqqutit nukinginnartut ataatsimiinnermissaaq oqallisigineqarput. EU-mi ataatsimoorussamik nunanut allanut politikki Kalaallit Nunaanut arlalitsigut sunniuteqartussaavoq. Isumaqatigiissummut atatillugu suliaqarfiit danskit kalaallillu ataatsimoorussaat pillugit danskit naalakkersuisui nassuiaammik saqqummiussiniarlutik neriorsuisimapput. Nassuiaasiaq taanna saqqummereerpat politikkip taassuma kingunissai nævnip ataatsimiititaliallu oqallisiginiarpaat. Aalisarnermut isumaqatigiissut maannakkut atuuttoq taamatullu siunissami peqatigiinnissamut isumaqatigiissutigineqarsinnaasoq oqallisigineqarportaaq.

Kalaallit Nunaata, Danmarkip USA-llu isumaqatigiinniarnerisa nalaanni Folketingip Udenrigspolitisk Nævnia Inatsisartullu Nunanut Allanut Sillimaniarnermullu Ataatsimiititaliaat ataatsikkut ilisimatinneqartarsimapput, sisamanngormallu ataatsimiinnermi isumaqatigiissutit taakkulu sunniutigisinnaasaat taamatullu avatangiisit pillugit apeqqutit kiisalu amerikarmiut missilinut illersuusiorneranni ineriartorneq oqallisigineqarput.

Pissutsini ataatsimoortuni soqutigisaqarfinni imminnut ilisimateqatigiittarnissaq nævn-ip ataatsimiititaliallu ataatsimoorlutik annertuumik soqutigivaat, matumani ilanngullugit EU pillugu apeqqutit Isumalioqatigiissitallu sulinera. Suleqatigiinnerup ingerlateqqinneqarnissaa ilisimateqatigiittarnerlu ingerlatiinnarneqassasut aalajangiunneqarpoq. Decemberimi ataatsimiinneq nanginneqassasoq aalajangiunneqarpoq.

Paasissutissat sukumiinerusut pissarsiarineqarsinnaapput – ataatsimiititaliap siulittaasuanut Per Rosing-Petersenimut, oqarasuaat +299 55 24 75-imut saaffiginninnikkut.

Inatsisartut Nunanut Allanut Sillimaniarnermullu Ataatsimiititaliaanni makku ilaasortaapput:
Inatsisartunut ilaasortaq Per Rosing-Petersen (Siumut), siulittaasoq
Inatsisartunut ilaasortaq Aqqaluk Lynge (Inuit Ataqatigiit), siulittaasup tullia
Inatsisartunut ilaasortaq Jonathan Motzfeldt (Siumut)
Inatsisartunut ilaasortaq Ellen Christoffersen (Atassut)
Inatsisartunut ilaasortaq Per Berthelsen (Demokraatit)
Folketingimut ilaasortaq Kuupik Kleist, taaseqataasinnaanngitsoq
Folketingimut ilaasortaq Lars Emil Johansen, taaseqataasinnaanngitsoq

Inussiarnersumik inuulluaqqusillunga

Per Rosing-Petersen
Ataatsimiititaliami siulittaasoq
Ulloq 20. august 2004, Nuuk