Piffissami kingullermi tusagassiorfinni allaaserinnittoqartarsimavoq kiffartuussinissamut isumaqatigiissusiornermi Naalakkersuisut Aningaasaqarnermullu Ataatsimiititaliap atuuf­fiisa paatsoorneqarnerannik kinguneqarsinnaasunik. Allaaserineqartut Aningaasaqarnermut Akileraartarnermullu Ataatsimiititaliap isumaa malillugu annertuumik amigaateqarmata kukkuneqarlutillu allaaserisat ataatsimiititaliap qisuariarfigisariaqarpai mannalu aqqutigalugu suliami annertoqisumi inuiaqatigiinnullu pingaaruteqaqisumi erseqqissaateqassalluni.

Taamaalilluni 2016-imi aningaasanut inatsimmik siunnersuuteqartutut kiffartuussinissamut isumaqatigiissutinut sinaakkutitut atugassarititaasussat Naalakkersuisut namminneq siunner­suutigimmatigit ataatsimiititaliamit naqissuserneqassaaq. Naalakkersuisullu taamaalillutik Aningaasaqarnermut Akileraartarnermullu Ataatsimiititaliamut qinnuteqaamminni allapput kiffartuussinissamut isumaqatigiissutit 2016-imi aningaasanut inatsimmi konto pingaar­nermut 72.20.05-imut, ilaasunik angallassinermut tapiissutinut tunngasumut, oqaasertalius­sami nr. 1-imi killissaritinneqartut iluini neqeroorutigineqarlutillu isumaqatigiinniuti­gineqassasut. Taamaattumillu Aningaasaqarnermut Ataatsimiititaliap apriilimi aningaasat 121 mio. kr.-iunissaannik sinaakkusiisimaneranik allaaserisani oqarneq pissusiviusunut akerliuvoq.

Piffissami isumaqatigiinniarnissamut piginnaatitsissutip ataatsimiititaliamit akuerineqar­nerani aningaasaliissutinik annertunerusunik pisariaqartitsisoqarsinnaaneranik ataatsimiiti­taliaq sukkulluunniit saqqummiussivigineqanngilaq. Taamaattumik ataatsimiititaliap taku­sinnaasimanngilaa sooq sinaakkutitut atugassarititaasut attatiinnarneqassannginnersut. Meeqqanut soraarnerussutisialinnullu akikillisaassuteqarnissap qulakkeerneqarnissaanut qaf­faanissaq Naalakkersuisut taamaallaat qinnutigaat, tamannalu ataatsimiititaliamit akue­rineqarpoq. Tamannalu kingusinnerusukkut pivoq.

Naalakkersuisut ima oqarsimasut issarneqarpoq Angallassinermi kiffartuussinermik ajornerulertoqarnissaa Inatsisartuni politikerinut tupaallaataasussaanngikkaluarput. Isumaqatigiinniarnissamut piginnaatinneqarnissamik qinnuteqaamminni Naalakkersuisut ataatsimiititaliamut ima paasissutissiimmata ataatsimiititaliamit erseqqissarneqassaaq:

Kiffartuussinissamut isumaqatigiissutit tamarmik angallannermi suliassat nunallu immikkoortui, aammalu sullissinerup qaffasissusia akulikissuserlu maanna atorneqartut tunngavigalugit neqerooruteqartitsivigineqassapput.

Suliap immikkoortuata aappaani aningaasanut inatsimmi aalajangersakkat malillugit Naalakkersuisut kiffartuussinissamut isumaqatigiissutissatut missingiut Aningaasaqarnermut Akileraartarnermullu Ataatsimiititaliamut tusarniutigalugu nassiuttussaavaat. Piffissap taamaalinerani apeqquteqarnissamut aammalu Naalakkersuisunut kaammattuuteqarsin­naanermut ataatsimiititaliaq taamaallaat periarfissaqarpoq. Aatsaat taamaalinerani ajor­seriaateqartoqarnissaa ataatsimiititaliamit maluginiarneqarpoq taakkulu kiffartuussinermi allannguinertut Naalakkersuisunit taaneqarput. Kiffartuussinissamut isumaqatigiissutit inaarsarneqarnissaannut akisussaaffik Naalakkersuisuniippoq, tassungalu ilaavoq assersuu­tigalugu ajorseriartoqannginnissaa Naalakkersuisunit kissaatigineqarpat ilassutitut anin­gaasaliissuteqarnissamik qinnuteqaateqarnissamut pisussaaffik. Tamatumani ataatsimiititaliaq isumaqarpoq ajorseriaateqartitsinissaq pinngitsoortinniarlugu iliuuserineqarsinnaasutut Naalakkersuisunit periarfissatut taaneqartunut aningaasartuutit angalasunit akilerneqassanngitsut. Iliuutsit taamaattut aningaasanut inatsisikkut aningaa­salersorneqarnissaat ataatsimiititaliamit kissaatigineqarpoq.

Allaaserisani nassuiaatigineqartutut suliamik suliarinninnermi Aningaasaqarnermut Akile­raartarnermullu Ataatsimiititaliaq pikkorliorsimasoq allaaserisat taaneqartut innuttaasunik isumaqalersitsisinnaanerat ataatsimiititaliamit assut ajuusaarnartinneqarpoq.

Tusagassiorfiit malillugit kiffartuussinissamut isumaqatigiissutit pitsanngorsarniarlugit aningaasanik amerlanerusunik nassaarniarnissaq Naalakkersuisut siulittaasuata piareersi­maffigaa. Ataatsimiititaliaq isumaqarpoq ajorseriartoqarnissaa paasineqarmalli aningaasat pisariaqartinneqartut Naalakkersuisumit akisussaasumit pissarsiarineqarsimasuuppata piffissaagallartillugu iliuuseqarnerussasoq.

Aningaasaqarnermut Akileraartarnermullu Ataatsimiititaliamit kissaatigineqarpoq aningaa ­sanut inatsisissap pingajussaaneerneqarnissaanut Naalakkersuisut qinnuteqaateqassasut taamaasilluni ataatsimiititaliap innuttaasullu kissaatigisaattut suliaq naammassine­qarsinnaasunngorlugu.

Paasissutissat annertunerusut Aningaasaqarnermut Akileraartarnermullu Ataatsimiititaliap siulittaasuanut Jens Immanuelsenimut, uunga saaffiginninnikkut pissarsiarineqarsin­naapput: +299 52 21 10.