Ilaasunik angallassineq pillugu kiffartuussinissamik isumaqatigiissutinik Naalakkersuisut suliaqarneranni killiffik pillugu Aningaasaqarnermut Akileraartarnermullu Ataatsimiititaliap Ineqarnermut, Sanaartornermut Attaveqarnermullu Naalakkersuisoq tallimanngornermi ulloq 30. september siunersiorpaa.

Siunersiuinermi matuma kinguliani allassimasut, ataatsimiititaliap isumaa malillugu suliami pisariaqanngitsumik paatsuungatsitsisut, ilaatigut sammineqarput:

• Tamatumani pineqarpoq illuatungeriit tamakkernatik atsiorsimanerarlugit tusagas­siorfiit nalunaaruteqarnerat aammalu tassunga atatillugu isumaqatigiissuteqartar­nermut inatsimmi isumaqatigiissutit pituttuisuusut pillugit aalajangersakkanut Naa­lakkersuisut innersuussinerat. Naalakkersuisut paasissutissiissutigaat neqerooruteqar­tut neqeroorummik tunniussinerminni pituttorneqartut aammalu Namminersorlutik Oqartussat neqeroorutinik tiguneqartunik akuersinerminni assinganik pituttorne­qartut. Taamaalilluni suliap siuariartorneranut sanilliullugu apeqqutaalerpoq atsior­nerit amigaataanerat qanoq kinguneqarsinnaanersoq.
• Kiffartuussineq ajorseriaateqanngitsoq, Nunattali Kujataani kiffartuussineq kisimi allannguuteqartinneqartoq Naalakkersuisut nalunaarutigaat. Ajornartorsiutilli aala­jangersimasut tusagassiorfinnit annertuumik sammineqarput. Tamatumani pineqar­poq angalasut ingerlaqqiffissaminnut niunermik tunngaveqartunut nammineq pisuussutiginngisaminnik inortuisut billetsinik annaasaqannginnissaannik unnuisaria­qalernermullu akiliuteqartannginnissaannik kissaateqarnermik apeqqut. Qeqertarsuup Tunuani kinguaattoortoqartillugu billetsinik annaasaqarnissamut unnuinermilu aningaasartuuteqarnissamut qularnaveeqqut ukiuunerani (15.11-15.5) atuuttoq taamaalilluni aamma atorunnaarpoq. Qeqertarsuup Tunuani Nunattalu Kujataani aaqqiissuteqarnissaq ataatsimiititaliamit kissaatigine­qarpoq, taamaaliornikkut taama pisoqartillugu angalasut annertunerusumik aningaasartuuteqaqqunagit. Siunertamut tassunga aningaasanik amerlanerusunik aningaasanut inatsimmi nassaarniarnissaq pillugu isumaqatiginninniarnissamut peqataanissani ataatsimiititaliap tamarmiusup piareersimaffigaa.
• Tamatumani pineqarpoq kiffartuussinissamik isumaqatigiissuteqarniarnermi Naalak­kersuisut aammalu Aningaasaqarnermut Akileraartarnermullu Ataatsimiititaliap atuuffiisa assigiinngitsumik paasineqarsinnaanerannik kinguneqartumik suliap ingerlanerani ilaatigut tusagassiorfinni oqariartuuteqartoqartarsimanera.

Kingullermik taaneqartumut tunngatillugu ataatsimiititaliap kissaatigaa Naalakkersuisut aammalu Aningaasaqarnermut Akileraartarnermullu Ataatsimiititaliap suliami atuuffii ersa­rilluinnartumik ilisimaneqassasut. Ataatsimiititaliap isumaa malillugu tamanna pillugu aningaasanut inatsimmi ersarilluinnertumik aalajangersagaqarpoq. Naalakkersuisut qinnute­qarnerat naapertorlugu suliassap isumagineqarnissaa pillugu suleqatinik isumaqatigiissu­teqarnissamut piginnaatitsissummik Naalakkersuisunut Aningaasaqarnermut Akileraartar­nermullu Ataatsimiititaliaq tunniussissaaq. Angallassiviusussat ataasiakkaat qanoq akulikit­sigisunik tikinneqartarnissaannik kissaatip saniatigut isumaqatiginninniarnissamut pigin­naatitsissutikkut aningaasatigut atugassarititaasut aalajangiusimaneqarput. Aningaasaqar­nermut Akileraartarnermullu Ataatsimiititaliap taama piginnaatitsineratigut kiffartuussinis­samut isumaqatigiissuteqarnissamut Naalakkersuisut piginnaatinneqarput. Allatut oqaati­galugu sumiiffinni niuernermik tunngaveqarluni ingerlatsinissamik soqutiginnittoqan­ngiffiusuni angalanissamut periarfissiisunik neqerooruteqartoqarnissaa kiffartuussinissamut isumaqatigiissutit aqqutigalugit Naalakkersuisut qulakkiissavaat. Angalanissap tamakkii­sumik akia angalasumit tamakkerlugu akilerneqannginnissaa kiffartuussinissamut isuma­qatigiissutikkut qulakkeerneqassaaq. Ingerlaarfinnut ataasiakkaanut attaveqarnerit akut­tuallaannginnissaat kiffartuussinissamut isumaqatigiissutikkut qulakkeerneqassaaq.

Kiffartuussinissamut isumaqatigiissutissatut missingiutit Naalakkersuisunit suliarineqareer­pata, taakku Aningaasaqarnermut Akileraartarnermullu Ataatsimiititaliamut tusarniutigalugit nassiunneqassapput. Taamaaliornikkut angallanneq pillugu isumaqatigiissutit ilusiisa oqaa­seqarfiginissaannut Inatsisartut Aningaasaqarnermut Akileraartarnermullu Ataatsimiititaliaq aqqutigalugu qulakkeerunneqarput, tak. tamanna pillugu aningaasanut inatsimmi oqaaser­taliussaq. Aningaasaqarnermut Akileraartarnermullu Ataatsimiititaliap aalajangiisinnaas­suseqarnera piginnaatitsissutip  tunniunneqarnerani atorunnaarmat kiffartuussinissamut isumaqatigiissutit naammassinissaat Naalakkersuisut isumagisassaraat. Tusarniaanerup ilaatinneqarnera Naalakkersuisut piginnaatinneqarnerisa akisussaanerisalu atorunnaar­nerannik kinguneqanngilaq. Taamaattumillu tusarniaanerup ingerlanerani imaanngilaq Naalakkersuisut akisussaaffimmik arsaarneqartut.

KNR-ip nittartagaani 8. september 2016-imi allaaserisami allassimavoq Ineqarnermut, Sanaartornermut Attaveqarnermullu Naalakkersuisoq ima oqarsimasoq:

• Tassa pisariaqarsimavoq, soorunalimi uggornarpoq, kisianni suliap pitsaasumik naammassinissaa aamma taanna pisariaqartissimavaat, angallannermut naalakker­suisoq Knud Kristiansen oqarpoq.

Taama oqaaseqarneq ataatsimiititaliap suliamik kinguarsaasimaneratut paasinerlunneqarsinnaammat ataatsimiititaliamit assorsuaq ajuusaarutigineqarpoq. Taamaattoqanngilarmi, tassami kiffartuussinissamut isumaqatigiissusiornissamut piginnaatitsissut majip qaammataatali naanerani Naalakkersuisunut tunniunneqarpoq. Piffissami taaneqartumi suliap ataatsimiititaliamut tusarniutigineqarnera eqqorpoq, tamatumani akisussaaffik Naalakkersuisuniippoq.

Ataatsimiititaliaq imaattunik marlunnik kaammattuuteqarpoq:

Kiffartuussinissamik isumaqatigiissutit sivitsorneqarnissaannik kingullermik suliarinnin­nermut atatillugu ataatsimiititaliamit kissaatigineqarpoq Naalakkersuisut isumaqatigiin­niarnerit ima siusitsigisukkut aallartissagaat upernaap ingerlanerani inaarlugit suliarine­qareersinnaasunngorlugit. Taamaaliornikkut ingerlatsisut atuisullu ingerlatassamik piler­saarusiornissaannut piffissarissaarnerunissaat qulakkeerneqassammat. Tamatuma pisiman­nginnera ataatsimiititaliamit assut ajuusaarutigineqarpoq.

Suliassat marluk kiffartuussinissamik isumaqatigiissutit siunissami isumaqatigiinniutigi­neqarnissaanni pimoorullugit sulissutigineqartariaqartut ataatsimiititaliaq isumaqarpoq. Ta­matumani pineqarpoq suliassaqarfimmi unammillernissamut periarfissanik siuarsaanissaq aammalu suliassaqarfiit kiffartuussinissamik isumaqatigiissuteqarfiusussat aammalu niuer­nermik tunngaveqarluni ingerlatassat erseqqinnerusunngorlugit saqqummuinneqarnissaat, taamaliornikkut Kalaallit Nunaanni ilaasunik angallassineq ataqatigiinnerusunngorlugu ataatsimoornerusunngorlugulu ataatsimiititaliamit takuneqarsinnaaqqullugu.

Ataatsimiititaliamit neriuutigineqarpoq nalornissutit sinneruttut Naalakkersuisunit maanna aaqqinneqarsinnaanngortut aammalu innuttaasut ingerlatsisullu 2017-imi angalanissanik maanna pilersaarusiorsinnaangortut.

Paasissutissanik allanik pissarsiniarluni Aningaasaqarnermut Akileraartarnermullu Ataatsimiititaliap Siulittaasuanut Jens Emanuelsenimut oqarasuaammut: +299 52 21 10-mut saaffiginnittoqarsinnaavoq.