Inatsisartut Siulittaasuannit Lars-Emil Johansenimit

Landsrådimut Inatsisartunullu ilaasortaasimasup ukiorpassuarnilu folketingimut ilaasortaasimasup Otto Steenholdtip 80-inik ukioqalerluni inuuissiornermi, ukiorpassuarni suli akornatsinniinnissaanik allamik isumaliorfiunngikkaluartup, kinguninngua toqukkut qimagunnera tusarlugu tassanngaannarlunilu alianarpoq.

Otto Steenholdt ukiorpassuarni qanittumik naalakkersuinikkut suleqatigisimavara.

Ottop naalakkersuinikkut piumassuseqarnera nukissaqarneralu peroriartorneranik ilinniagaanillu aallaaveqarput. Piniartoqarfimmi peroriartorsimanini Ottop puigunngisaannarsimavaa, ilinniartitsisutullu ilinniagaqarnermigut ilisimasalikkaminik tamanna tapertalerlugu ulluinnarni ajornartorsiutit naalakkersuinikkut aaqqinniarlugit suliaqarnermini tunngavigisimallugu.

Otto Steenholdt 80-inik ukioqarluni toqusoq eqqaaniassagaanni, nunatsinni inatsisartoqarnerup oqaluttuarisaanera nutaajunerusoq, ajoraluartumik qaqutiguinnaq immitsinnut oqaluttuarisartagarput, kingumut qivianngitsoorneqarsinnaanngilaq,

Otto Steenholdt inuusuttut naalakkersuinermik suliallit arlallit 1971-imi Kalaallit Nunaata Landsrådianut qinigaasut ilagaat. Nipi ersarissoq kulturikkut pingaartitatsinnik Danmarkimillu naalagaaffeqatigiinnermik illersuisoq. Qinikkatut ilisarnaatigaa oqallorinnini erseqqissunillu tunngavilersuisinnaanini,qinigaaffimmini tamani ilisarnaatigisani.

Piniartup erneratut nunaqarfimmiutullu Otto pinngortitamiinnernik nuannarisaqarlunilu pinialerituujuvoq. Nuliani Hanne ilaquttanilu allat ilagalugit Danmarkimut nooreeraluarluni, tuttut nalaanni ukiut tamaasa Nuuliartuarsimavoq, piniariarluni kalaaliminernillu pingaarteqisaminik ukiornissaanut katersiartorluni.

Otto Steenholdt qinikkat Kalaallit Nunaata naalakkersuinikkut oqaluttuarisaaneranut nutaajunerusumut sunniuteqarsimasut malunnaatillit ilagaat. Partiimik Atassummik pilersitseqataasutut taamaalilluni partiip siuttua Lars Chemnitz Atassutip siulittaasuatut tunuarmat pissusissamisoortumik kingoraarpaa. Atassummut siulittaasuunermini illuatungiliuttuuvoq nukittooq, naapeqatigiiffissarsiornikkut inerititaqarfiusunik aaqqiissuteqarnissamut peqataanissaminut tunuarsimaanngitsoq. Tamanna ilaatigut pivoq namminersornerulernerup eqqunneqarnerani Kalaallit Nunaatalu taamanikkut EF-iusumit ilaasortaajunnaarnerani.

Steenholdt qinikkatut inuk nuannaartuuvoq inuppalaartoq, taamaattumillu nunatsinni Danmarkimilu ikinnguterpassuaqarlunilu ilisarisimannitserpassuaqarluni.

Otto Dronningip nersornaasiuttaagaanik ridderkors af 1. gradimik aamma Namminersornerullutik Oqartussat nersornaasiuttagaannik Nersornaammik sølviusumik kuultiusumillu nersornaaserneqarsimavoq.

Eqqaaneqarnera ataqqinartuuli.