Inatsisartut Nunanut Allanut Sillimaniarnermullu Ataatsimiititaliaanit nalunaarut

Kalaallit Nunaata pisiarineqarsinnaaneranik USA-mi præsidentinngortussap Donald Trumpip nalunaaruteqarnerata kingorna Kalaallit Nunaat nunani allani tusagassiorfinni annertuumik sammineqarsimavoq. Kalaallit Nunaata nunanit allanit soqutigineqarnera annertuserujussuarsimavoq. Nunanut Allanut Sillimaniarnermullu Ataatsimiititaliap taamaattumik erseqqissumik oqaatigerusuppaa partiit isumaqatigiissutaat tunuliaqutseramiuk Naalakkersuisut Siulittaasuatalu oqaatigeriigaa, ”Qallunaajorusunngilagut. Amerikarmioorusunngilagut. Kalaaliuvugut.” isumaqatigalugu.

Tamanna pissutigalugu Nunanut Allanut Sillimaniarnermullu Ataatsimiititaliap Naalakkersuisut Siulittaasuat tallimanngornermi ulloq 17. januar 2025 apeqqutit nunanut allanut sillimaniarnermullu tunngasut pillugit matoqqasumik siunersiunissamut aggersarpaa.

Nunanut allanut sillimaniarnermullu tunngatillugu ullumikkut pissutsit oqallisigineqarnissaat siunertaralugu Inatsisartut Nunanut Allanut Sillimaniarnermullu Ataatsimiititaliaata aalajangerpaa Naalakkersuisut Siulittaasuat siunersiuinermut matoqqasumut aggersarniarlugu. Siunersiuinerup matoqqasumik ingerlanneqarnissaanik aalajangiineq qulequttat sammineqartussat mianernarnerinik kiisalu Kalaallit Nunaata inissisimanermigut soqutigisaasa qularnaarneqarnissaannik pisariaqartitsinermik pissuteqarpoq.

Naak siunersiuineq matoqqasumik ingerlanneqartussaagaluartoq Nunanut Allanut Sillimaniarnermullu Ataatsimiititaliap erseqqissarpaa Kalaallit Nunaata nunanut allanut sillimaniarnermullu tunngatillugu inissisimanera pillugu Naalakkersuisut Inatsisartunik tamarmiusunik ingerlaavartumik paasissutissiisarlutillu siunnersuisarnissaat pingaaruteqarmat.

Naalakkersuisuutitaqartut kisimik Naalakkersuisunit paasitinneqaratik Inatsisartut tamarmiusut peqataatinneqartarnissaat aalajangiisuuvoq aalajangiinerit pingaarutillit pisariaqartumik tunngavissaqarluarlutik tapersersorneqarlutillu pisarnissaannut.

Pipaluk Lynge

Nunanut Allanut Sillimaniarnermullu Ataatsimiititaliap siulittaasua

Paasissutissat sukumiinerusut ataatsimiititaliap siulittaasua mobil +299 56 25 56 attaveqarfigalugu pissarsiarineqarsinnaapput.