Asasara Inatsisartuni ilaasortaqat.

 

Inatsisartut qinigaarlaat  ulloq 1. december 2005 Nuummi inissitsiterluni Inatsisartut ataatsimiinnissaannut sivisunerpaamik ilaasortaasimasutut ataatsimiigiaqqusinnaagakkit nuannaarutigaara. Ataatsimiigiaqqusineq ulloq 23. november 2005 naammagittaalliuteqarfissatut piffissaliussap naanerani ataatsimiititaliap inaarutaasumik akuersissutiginnissimanissaa apeqqutaatillugu pivoq.

 

Ulloq 1. december 2005 Hans Egedep Illuani nal. 09.00 ullaakkut kaffisoqatigiinnermik aallarnerneqassaaq. Tamatuma kingorna nal. 10.00 Annaassisitta Oqaluffissaarsuani naalagiaqatigiinnissamut ingiaqatigiissaagut, tassanngaannillu Inatsisartunut ingerlaaqatigiissalluta.

 

Inatsisartut ataatsimiittarfianni ataatsimiinneq nal. 11.00 aallartissaaq.Ullormut oqaluuserisassanut takussutissiaq, maannangaaq ilisimatitsissutigineqarsinnaasoq ilanngullugu nassiunneqarpoq.

 

Naalakkersuisunik nutaanik pilersitsinermut tunngatillugu utaqqiisaasumik aningaasaliissutinik inatsimmi aningaasaliissutit aqunneqarnerat pillugu oqaluuserisassanik amerlanerusunik siunnersuuteqartoqarnissaa naatsorsuutigineqarsinnaavoq.

 

2005-imi Inatsisartut inissitsiterlutik ataatsimiinnerannut tunngatillugu nalinginnaasumik paasissutissat inatsisartunilu sulinermut nassuiaatitut pilersaarusiaq aamma ilanngussatut nassiunneqarput.

 

Inatsisartut sinnerlugit Hans Egedep Illuani ulloq 1. december 2005 nal. 18.00-imiit 22.00-i-mut ammaanersiorluni ilasseqatigiinnissamut sutugassaqarfiusumut qaaqqusinnaagakkit nuannaarutigaara.

 

Tamassi ataatsimiilluarnissassinnik kissaappassi.

 

Inssuiarnersumik inuulluaqqusillunga

 

Jonathan Motzfeldt

Inatsisartuni Sivisunerpaamik ilaasortaasimasoq

 

PAASISSUTISSIINEQ

INATSISARTUT 2005-IMI INISSITSITERLUTIK ATAATSIMIINNERAT

 

Pingasunngorneq ull. 30. november Inatsisartunut ilaasortat tikilluaqqullugit isumasioqatigiissitsineq.

Nal. 9.00-9.45. Hotel Godthåbimi ullaakkorsiorneq

Nal. 10.00-10.20. Inatsisartut Allattoqarfiannik sulisunillu suleqateqarnerup saqqummiunneqarnera kiisalu nalinginnaasunik paasissutissiineq v/Inatsisartut Allattaanerat Ellen Kolby Chemnitz

Nal. 10.20-11.00. Inatsisartunut ilaasortanut ilitsersuutip saqqummiunnera v/Ellen Kolby Chemnitz

Nal. 11.00-11.15. Unillatsiarneq

Nal. 11.15-12.00. Aningaasarsiaqartitsinermut inatsisip saqqummiunneqarnera v/Direktør Nicolaj Sørensen

Nal. 12.00.-14.00. Ullup qeqqasiorneq ilaasortallu ataasiakkaat assilisinnerat

Nal.14.00-14.45. Inatsisartuni sulineq & Inatsisartut Naalakkersuisullu akornanni suleqatigiinneq v/Ataatsimiititaliami allatsi Sakarias Amondsen

Nal. 14.45-15.15. Kaffisorneq

Nal. 15.15-16.00. Inatsisartuni sulineq & Inatsisartut Naalakkersuisullu akornanni suleqatigiinneq. (nangitaq)

 

Sisamanngorneq ull. 1. december

Nal. 9.00-9.45. Hans Egedep Illuani ullaakkorsiorneq

Nal. 9.50-10.00. Annaassisitta Oqaluffianut ingerlaaqatigiinneq

Nal.10.00-10.45. Naalagiaqatigiinneq

Nal. 11.00-11.15. Inatsisartunut isaariap tummeraani assilisinneq

Nal.11.15-13.00. Inatsisartut ataatsimiittarfianni ataatsimiinneq

Nal.13.00-14.00. Ullup qeqqasiorneq

Nal.14.00-15.00. Ataatsimiititaliat inissitsiternerat

Nal.18.00- 22.00 Hans Egedep Illuani aapparisat ilagalugit ilasseqatigiinneq

 

Tallimanngorneq ull. 2. december

Nal. 10.00-12.00. Inatsisartunut ilaasortat qarasaasialerinermik Qarasaasiaqarfimmi partiikkaartumik pikkorissartinneqarnerat

·  Programmit ulluinnarni sulinermi atorneqartartut saqqummiunnerat

·  Inatsisartunut ilaasortanngorlaat atuisutut pilersinneqarnerat

·  Mail & MS Officepakkep atorneqartarneranik ilitsersuineq

Nal. 12.00-13.00. Ullup qeqqasiorneq

Nal.13.00-14.00. Ataatsimiititaliani siulittaasut/ataatsimiititaliat & ataatsimiititaliani allatsit akornanni pilersaarusiorluni ataatsimiinneq