Nunanut Allanut Sillimaniarnermullu Ataatsimiititaliap Ilinniartitaanermut, Kultureqarnermut Ilageeqarnermut Nunanullu Allanut Naalakkersuisoq siunersiuinissamut aggersarpaa.

Kangerlussuup siunissaa pineqartillugu maannalu isumaqatiginiarnerit  ingerlasut pillugit ataatsimiititaliap pissutsit annertuumik ataqqivai, taamaammallu siunersiuineq Naalakkersuisut maannamut nalunaarutigisimasaanut sammisorujussuuvoq. Siunersiuineq Kangerlussuup mittarfiata atorneqarnissaanut aammalu naalakkersuinikkut avammut nalunaaruteqarnernut tunngavoq.

Siunissami Kangerlussuarmi mittarfeqarfiup mittarfiullu atorneqarnissaasa nalornissutitaqarnerisa ersarissarneqarnissaat, ataatsimiititaliap pingaartippaa. Pissutsit ersarissarneqarnissaannut qulakkeerinninnissaq annertuumik pisariaqartinneqarpoq. Kiisalu Inatsisartut ataatsimiititaliaa tassunga attuumassutillip ilaatinneqarnissaa pingaaruteqarpoq, taamaasiornikut inuit ilaatinneqarnissaat tunngaviulluarnissaallu qulakkeerneqassammat.

Siunersiuinermi makku ataatsimiititaliamit oqaluuserineqassapput:

1. Piffissami kingullermi Kangerlussuaq pillugu Naalakkersuisut nalunaarutigisimasaat.
2. Illersornissaqarfiup siunissami Kangerlussuarmiinnissaa.
3. Kangerlussuup Mittarfeqarfiata aamma mittarfiata siunissaa.

Aleqa Hammond

Nunanut Allanut Sillimaniarnermullu Ataatsimiititaliamut siulittaasoq

Paasissutissat annertunerusut ataatsimiititaliap siulittaasuanut oqarasuaat +299 49 23 09-imut  saaffiginninnikkut pissarsiarineqarsinnaapput.