Hansigne Lyberth maanga qanilliimilaarsinnaavit. Asasara Hansigne Lyberth. Eqqortumik oqassagaanni inuunermi sivisuumi suliffioqisumilu suleqatigisartakkannut maligassiuisuulluarsimavutit. Aalisakkerivimmi sulillutit aallartikkavit akilernerlugaalluni sulineruvoq, suliffissuarmilu pissutsit pitsaanngillat nillerlunilu, sulinerlu tamaviaarnartuuvoq, pilertortumillu suleqativit paasivaat sulisut sinniisaattut atuunnissannut piginnaaneqartuullutillu piukkunnaateqartuusutit. Taamanerniillu sulinermut atukkasi atugaasa ataatsimoorlusi soqutigisasi atuunninni sinniisuuffigisimavatit.

Sulisut naleqquttumik akissarsiaqarnissaat atorfinitsitaanerminnilu atugassarnissaat taamaalillunilu inuppalaarnerusumik atugaqarlutik inuuneqarnissaat inuuninni suliassatut tigusimavat. GAS-imi kingornalu SIK-mi suliniarnerit aallartissimavat siulersuisuunernilu nikerartuni qinigaasarsimallutit. Qinigaaffinnilu arlalinni immikkoortortaqarfimmi siulittaasuusarsimavutit. Isumaqatigiissutit isumaqatiginninniutigineqartussanngoraangata isumaqatigiinniallaqqissutut ilisimaneqarputit akkord-ternerlu isumaqatigiinniutigineqaraangat annertuumik sunniuteqartarsimallutit. Paasissutissiisarnerup siammarneqarnissaanut sulisartullu piginnaatitaaffeqarnermikkut ilisimasaqarnerulernissaat pingaartittuarsimavat, Sulisartullu Højskoliata aallarteqqaarnerani sunniuteqarsimallutit.

Piffissap ingerlanerani aamma illoqarfimmi innuttaasut soqutigisaannik ingerlatsinissannut piffissaqarsimavutit, taamaalillutillu kommunalbestyrelsimi issiasimallutit.

Naak soraarninngoreersimagaluarlutit suli peqatigiiffilerinermi sulinikkut inoqativit atugarisaasa pitsanngorsarneqarnissaannut suliniuteqarnerit suli ingerlappat, taamaattumillu kommunimit utoqqaallu peqatigiiffiannit nersorniarneqarsimallutit. Ukiorpassuarni sullissisimaninnut qujassutissaqarfigaatsigit. Namminersornerullutik Oqartussat nersornaasiuttagaat Nersornaat sølviusoq tunniussinnaagakku nuannaarutigeqaara. Ummammik pisumik piluarit.

Maannakkut Jakob aamma Peter Lyberth maanga qanilliimilaaqqugaluarpakka. Asasakka Jakob aamma Peter Lyberth. Inuunermi sulineq aallartiaarsimavarsi. Meeraallusili aasaanerani atuanngiffeqarnissinni ataatarsi aataarsilu aalisarnermik ikiorlugit aallartissimavusi. Taamanikkut inersimasut akissarsiarisartagaasa affaat akissarsiarisarpasi, taamanerniilli siunissamut sipaarnermik ilinnialersimavusi, tamannalu Maniitsup kommuniata ilaqutariippassuillu ukiut ingerlanerini iluaqutigisimaqaat. Aalisariutinut aningaasaliinermi aallartippusi kingornalu kilisaammik pisillusi. Aalisarnerinnarmik ingerlatsisimanngilasi, aammali nunami suliffeqarfippassuarnik aallartitsisarsimavusi, taamaalilluni Maniitsumi inuussutissarsiornermi inerisrtornermut iluaqutaaqisumik. Tamakku tamaasa sapinngilasi, naak niuernikkut aningaasarsiornikkullu annertuumik ilinniagaqarsimanngikkaluarlusi, silatusaarnikkut eqiasuinnikkut annertuumillu suliniuteqarnikkut maangarujussuaq pisimavusi. Inuit 200 missaanniittut inuussutissaqartippasi, taakkunannga affaat ukioq naallugu, taakkulu illoqarfitsinni sulisinnaasut eqqarsaatigalugit amerlangaatsiartorsuupput. Suliniarnersi qanoq annertutigisoq eqqarsaatigigaanni inuuvusi maniguuttut isummernissaminnulli tunuarsimaartuunngitsut. 

Asasara Jakob Lyberth. Ukiorpassuarni suliniuteqarsimaninnut qujassutissaqarfigaatsigit Namminersornerullutik Oqartussat nersornaasiuttagaat Nersornaat sølviusoq tunniussinnaagakku nuannaarutigeqaara. Uummammik pisumik pilluarit.

Asasara Peter Lyberth. Ukiorpassuarni suliniuteqarsimaninnut qujassutissaqarfigaatsigit Namminersornerullutik Oqartussat nersornaasiuttagaat Nersornaat sølviusoq tunniussinnaagakku nuannaarutigeqaara. Uummammik pisumik pilluarit.