"Kalaallit Nunaanni inuussutissarsiutit ineriartortinneqarneranni nutaaliaasunik malinnaasinnaasunik aningaaseriveqarneq pingaaruteqarluinnartuuvoq".

Taama oqarpoq Kay Dam Steffensen nersornaaserneqareerluni.

Kay Dam Steffensen Kalaallit Nunaanni ullumikkut aningaaseriveqarnerup nalunngisatta ineriartortinneqarnerani iluaqutaasumik malunniutilimmik sulisimavoq, aammalu inuussutissarsiornerup namminersortup annertusiartornerani ineriartueqataasimalluni.

1960-ikkut naalerneraniilli Kalaallit Nunaanni aningaaseriveqarnerup ineriartortinneqalerneranili suleqataasimavoq, taamaalillunilu suliaqarfimmi tassani maligassiuisuusimavoq Kalaallit Nunaannut immikkut pingaarutilimmik.

Ilulissat kangerluani qaleralinniarneq 1968-imi eqqumiitsuliortoq Jens Rosing filmiliortullu suleqatigalugit filmiliarivaa. Filmiliornerup ingerlanerani aamma aningaasanik atornermut inniminniinermullu tunngasut Iluliarmiunut Aasiammiunullu paasissutissiivigisimavaattaaq.

Kay Dam Steffensen 1970-imi Bikubenimut pisortanngorpoq, taamaalillunilu Nuna Bankiusimasup pilersinneqarnerani ilusileeqataasimalluni. Aningaaseriviup siulittasoqarfiani ukiuni qulini peqataasimavoq. Kay Dam Steffensen aamma Nuna Fondenimik pilersitseqataasimavoq, taanna inuussutissarsiornermi, suliallu nalinginnaasut taperserneqartarnissaannik atorneqartussatut siunertaqartuuvoq.

Inatsisartut siulittaasuata Jonathan Motzfeldtip Namminersornerullutik Oqartussat sinnerlugit Namminersornerullutik Oqartussat saqqarmiuliuttagaat Nersornaat sølviusoq Kay Dam Steffensenimut Nordatlantens Bryggenimi tunniuppaa 31. marts 2006.