Nunanut Allanut Sillimaniarnermullu Ataatsimiititaliap pingasunngornermi ualikkut Inuussutissarsiornermut, Niuernermut, Nunanut Allanut Silallu Pissusaata Allanngoriartorneranut Naalakkersuisoq Inatsisartuni siunersiorneqarnissaanut aggersarpaa.

Siunersiuinerup siunertaraa Naalakkersuisut nunanut allanut tunngasutigut naalakkersuinikkut ingerlatsineranni anguniakkat siunnerfiillu pillugit paasissutissanik assigiinngitsunik ataatsimiititaliap pissarsinissaa.

Siunersiuinermi oqaloqatigiinneq pitsaasumik ingerlanneqarpoq ataatsimiititaliarlu suliat assigiinngitsut pillugit paasissutissanik Inuussutissarsiornermut, Niuernermut, Nunanut Allanut Silallu Pissusaata Allanngoriartorneranut Naalakkersuisumit tunineqarluni.

Nalunaaruteqartarnerit assigiinngitsut sapaatit akunnerini kingullerni tusagassiorfitsigut sammineqarsimasut ilaatigut paasisaqarfigineqarnissaat ataatsimiititaliap kissaatigisimavaa.

Suliassaqarfinni pineqartuni naalakkersuinikkut anguniakkatik Naalakkersuisut oqaasertalereerpatigit sukumiinerusumik paasissutissinneqarnissani ataatsimiititaliap qilanaaraa.

Naalakkersuisunik ataavartumik oqaloqateqartarnissaq, taamatullu aamma pineqartut tusagassiorfitsigut sammineqalinnginnerini Naalakkersuisunit paasissutissinneqartarnissaq, ataatsimiititaliamut qitiulluinnarpoq, taamaaliornikkummi atituumik naalakkersuinikkut peqataatitsineq qularnaarneqaannarani, paatsuinerit tusagassiorfitsigut pilersinnaasartut pinngitsoortinneqarsinnaammata.

Naalakkersuisunit ingerlaavartumik peqataatinneqarnissani ataatsimiititaliap qilanaaraa.

Sofia Geisler

Nunanut Allanut Sillimaniarnermullu Ataatsimiititaliaå siulittaasua

Paasissutissat sukumiinerusut ataatsimiititaliap siulittaasua oqarasuaat +299 58 81 55 attaveqarfigalugu pissarsiarineqarsinnaapput