Nunat Avannarliit Killiit Siunnersoqatigiivisa 2006-imi Meeqqanut Inuusuttunullu atuakkiornermi nersornaasiuttagaat tallimanngormat 18. august 2006 Bárður Oskarsson-imut Savalimmiuneersumut tunniunneqarpoq. 

Bárður-ip atuakkiani "Ein hundur, ein ketta og ein mús" (Qimmeq, Qitsuk teriarlu) nersornaasisitsissutigaa. Tamanna Nuummi ataatsimiinnermi ulloq 30.juni nunat avannarliit killliit naliliisartutut ataatsimiittartoqatigiivisa aalajangiuppaat kiisalu pitsaassutimik ersarilluinnartunik peqarnermi saniatigut nunat avannarliit meeqqanut atuakkioriaasianni atuagaq nutaaliortutut ¿ allanneqarnermigut titartagartalersorneqarnermigullu nalilerneqarluni. Naliliisartoqatigiit Nunat Avannarliit Killiit Siunnersoqatigiivinit pilersinneqarput, nunat killiit avannarliit meeqqanut inuusuttunullu ukiuni pingasuni kingullernerni saqqummersinneqarsimasuni atuakkiamik pitsaanerpaamik toqqaanissaq siunertaralugu. Akissarsiassaq danskit aningaasaannik kr. 60.000-inik naleqarpoq.

Atuagaq Bárður Oskarsson-ip allallugulu titartagartalersorpaa. Ileqquuvoq qimmip qitsuk ikinngutiginngikkaa aamma qitsuk teriarlu ikinngutigiinngitsut. Bárður Oskarsson-ip oqaluttualiassani aallartikkamiuk killormut saatippaa. Taakku akerariitoqqat maani ima sungiusarneqartigisimapput allaat susassaaleqangaalerlutik.

"Ein hundur, ein ketta og ein mús" tassaavoq oqaluttualiaaraq paasiuminartoq susassaaleqinermut tunngassutilik. Ilanngulluguttaaq susassaaleqinerup qanoq ililluni allanngortinneqarsinnaaneranik oqaluttuartuuvoq. Pinngortitaassutsiminni iliuuserisartakkatik iluuserisinnaanngilaat kisiannili eqqissisimaarneq unitsinneqaraangat, pissutsinut allarluinnarmut soqutiginarnerusumullu pisarput ¿ taamaalillutillu oqalulersarlutik. Taamaattorli aaqqiagiinngissutitik iluarsisarneraat oqaluttuami eqqaaneqanngilaq.

Bárður Oskarsson-ip titartagai paasiuminartuupput quianartunilli imaqarluarlutik. Qimmeq, qitsuk kiisalu teriaq ersarilluinnartumik inuttut piginnaasaqarput. Oqaluttuap aallartinnerani titartakkat ilusaat tamarmik assigiimmik titartarneqarsimapput. Nunarsuarmi maani annaanneqarsinnaanngitsutut isikkkoqarput. Kingusinnerusukkut oqaluttuaq uummartinneqarpat ilisarnaatitut periutsit allanngussapput. Titartakkat paasiuminartuunermikkut ilusilersorneqarnerminnilu katitigaanertik aallaavigalugu quinartorujussuupput.

Atuagaq oqaatsitigut imarisamigullu toqqaannartumik meeqqanut saaffiginnippoq. Oqaluttuami inersimasunik ilaasoqanngilaq, kisiannili oqaluttuami inersimasut ataavartumik oqaaqqissaariuarnerat uparuartorneqarluni: ¿ilissinnulli mianersuullusi¿. Marloqiusamik eqqortuutitsisarneq meerarpaluttumik akerlilerneqarpoq angerlarsimaffeeqqani assortuunnermik ornigisaqanngitsuni nutaaliaasuni atugaasoq. Oqaluttuaq paasiuminartuuvoq quianartuulluni sukumiinerusumillu paasiuminarsarneqarsinnaananilu nassuiarneqartariaqanngitsoq allaat meeqqat minnerpaat pissarsiffigisinnaasaat.

Inersimasup atuartussap aamma assiliartaliussat oqaasertaliussallu iluaqutaasumik nassuiaasersinnaavai oqaasertaliussat assiliartaasalu imarisaat aamma itinerusumik iserfigisinnaallugit.

Nunat Avannarliit Killiit naliliisartoqatigiivi ukuninnga inuttaqarpoq: Helena Dam á Neystabø Savalimmiunit, Silja Aðalsteinsdóttir Island-imit kiisalu Vera-Lise Olsen Kalaallit Nunaannit.  Nersornaat ukiut allortarlugit tunniunneqartarpoq. Kalaallit Nunaanni, Island-imi Savalimmiunilu Nersornaammut nalilersuisartutut ataatsimiititaliat nunakkaartumik meeqqat atuagaat Nersornaammut december 2005-imi toqqarpaat. Kalaallit Nunaannit atuagaq Nissimaat nissimaajaqqallu (Nissemænd og små nisser) Grethe Guldager-ip atuakkiaa Nuka Godfredsen-imiillu titartagartalersorneqarsimasoq inassutigineqarpoq.  Island-imit De frosne tæer Sigrún Eldjárn-ip atuakkiaa inassutigineqarpoq Savalimmiuniillu atuagaq En hund, en kat og en mus Bárður Oskarsson-imit atuakkiarineqartoq inassutigineqarluni.

Siusinnerusukkut Nersornaatisisimasut ukuupput: 2002.  "Sagan af bláa hnettinum" Andri Snær Magnason-imit aamma 2004-imi  "Engill í vesturbænum" Kristín Steinsdóttir aamma Halla Sólveig Þorgeirsdóttir-imit.

Annertunerusumik paasissutissat: Siunnersuisoqatigiit allattaat Thordur Thorarinsson, oqarasuaat. 00354 5630731, tt@althingi.is