Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaq Finlandimut Danmarkimullu angalavoq

Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaq piffissami 18. februarimit 27. februar 2026 tikillugu Finlandimut Danmarkimullu paasisassarsiorluni angalavoq.

Ilinniartitaanerup iluani ineriartornermut malinnaanissaq paasisassarsiorluni angalanermi siunertarineqarpoq. Ilinniartitaanerup iluani periutsit, inuusuttut susaqanngitsut pillugit aaqqiiniarnermut suliniutit, pitsaassutsimik qulakkeerinnittarneq aamma nakkutilliineq kiisalu ilinniartitaanermut attuumassutilinnik pisariaqartitsinernik nalilersuisarnerit pillugit ilisimasanik pissarsisoqarnissaa ataatsimiititaliamit kissaatigineqarpoq.

Ataatsimiititaliap maluginiarpaa ilinniartitaanermut atatillugu pisariaqartitsinernik nalilersuisarnerit Finlandimi ilinniartitaanerup aaqqissuussaanerani annertuumik pingaaruteqartuusut. Ilinniarfinnik aaqqissuussineq inatsisinik aallaaveqartumik aaqqissuulluakkamillu tunngavilimmik pisarpoq, suliffeqarfeqarnermi ilinniartitaanermilu susassaqartunik ataatsimut immikkut ilisimasallit suleqatigiiffiat aqqutigalugu peqataatitsinikkut. Nalilersuinerit qitiusumik suliarineqartarput ministeriamullu inassuteqaatinut tunngaviusarlutik.

Maluginiagassaavortaaq Finlandimi meeqqat atuarfianni atuartitsisut tamarmik ilinniagartuutut kandidatitut ilinniaqarsimammata atuartitsinerminnilu ataatsimik ikiorteqartinneqartarlutik. Ataatsimiititaliaq isumaqarpoq taamatut aaqqissuussinikkut qularnaatsumik ilisimasanillu tunngaveqartumik meeqqat atuarfianni suliassanik naammassinninniartarneq ikorfartorneqartoq.

Qulaani allassimasunut tunngatillugu ataatsimiititaliaq Finlandimi ukununnga pulaarpoq:

• Finlandimi Danmarkip Aallartitaqarfia
• Finnish National Agency for Education
• Finnish Education Evaluation Centre
• Espoo-mi atuarfimmut pulaarneq
• Finlandip inatsisartoqarfiani Ilinniartitaanermut Kultureqarnermullu Ataatsimiititaliaq peqatigalugu ataatsimiinneq
• Finnish National Agency for Education
• Service Centre for Continuous Learning and Employment
• Ohjaamo Helsinki
• Ilinniartitaanermut Kultureqarnermullu Ministereqarfik

Tamatuma saniatigut Finlandimi ilinniartitaanermut ministeri Anders Adlercreutz, Svenska folkpartiet-imeersoq, persuarsiornertaqanngitsumik ataatsimeeqatiginissaanut ataatsimiititaliaq periarfissinneqarpoq.

Qulaani allassimasunut tunngatillugu ataatsimiititaliaq Danmarkimi ukununnga pulaarpoq:

• Meeqqanut Inuusuttunullu Ministereqarfik
• Ilinniartitaanermut Ilisimatusarnermullu Ministereqarfik

Taamatuttaaq Folketingimi Meeqqanut Atuartitsisarnermullu Ataatsimiititaliaq, Ilinniartitaanermut Ilisimatusarnermullu Ataatsimiititaliaq kiisalu Kalaallit Nunaannut Ataatsimiititaliaq ullup qeqqasiornertalimmik ataatsimeeqatigineqarput. Ilutigisaanillu Meeqqanut Inuusuttunullu Ministereqarfimmut pulaarnermut atatillugu meeqqanut atuartitsisarnermullu ministeri Mattias Tesfaye, Socialdemokratineersoq, ataatsimiititaliamit naapinneqarpoq.

Tamatuma saniatigut Kalaallit Arsaattartut Kattuffiata aaqqissuussaanut ataatsimiititaliaq peqataavoq, tassani Helsinkimi airdomes-it assigiinngitsut pingasut alakkarnissaannut ataatsimiititaliaq periarfissinneqarluni.

Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliami uku ilaasortaapput: Nivi Heilmann Efraimsen (Inuit Ataqatigiit), Isak Johannessen (Naleraq), Margrethe Thårup Andersen (Demokraatit), Pipaluk Olsen (Demokraatit) aamma Anders Olsen (Siumut). Anders Olsen paasisassarsiorluni angalanermut peqataanngilaq allanik pisassaqarnini peqqutigalugu.

Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaq sinnerlugu
Inussiarnersumik inuulluaqqusillunga
Nivi Heilmann Efraimsen, siulittaasoq

Annertunerusumik paasisaqarusukkaanni ataatsimiititaliap siulittaasua uunga attavigineqarsinnaavoq +299 29 58 79.