Tunup avannaani qeqertami Kunngikkormiusut Ataqqinassusilik Prins Henrik atsiullugu Qeqertaq ateqalissaaq Prins Henrik

Tunup avannaani sumiiffiup aqqa Île de France Namminersornerullutik Oqartussat siunnersuuteqarnerata kingorna Nunat Aqqinik Aalajangiisartut allanngortippaat, taamaalilluni siunissami qeqertaq Kunngikkormiusut Ataqqinassusilik Prins Henrik atsiullugu taaneqartalissalluni. Matumalu kingorna qeqertaq taaneqartalissaaq Qeqertaq Prins Henrik.

Kunngikkormiusut Ataqqinassusilik Prins Henrik 70-inik ukioqalerluni inuuissiorneranut atatillugu ulloq 11. juni 2004-mi, Namminersornerullutik Oqartussat tunissutaat Inatsisartut Siulittaasuata Jonathan Motzfeldtip ulloq 8. juni 2004-mi ataqqinartumik naapeqatigiinnermi tunniutissavaa.

Ataqqinartumik naapeqatigiinnermi Inatsisartut siulittaasuata Jonathan Motzfeldtip  atuagaq nutaanngitsoq franskit-belgiamiullu 1905-imi ilisimasassarsiornerminni allattugaannik imaqartoq, Croisiére Oceanographique accomplie a bord de la Belgica dans la Mer du Grönland (Oceanografisk krydstogt ombord på Belgica i Grønlandshavet) Louis Philippe Robert d´Oleans-imit 1907-imi saqqummersinneqartoq tunniutissavaa.

Inatsisartut Siulittaasuat Jonathan Motzfeldt oqaaseqarpoq:

- Qeqertaq Prins Henrik aterneqarnissaanut suliuteqarnermi kalaallit inuiaat Kunngikkormiusut Ataqqinassusilik Prins Henrikiullu akornanni, Danskit Kunngikkormiuisa aallartitaattut, kissalaartumik ikinngutigiinnerup uppernarsaaffigineqarnissaa Namminersornerullutik Oqartussat kissaatigaat.

Qeqertaq Prins Henrik-p tunuliaqutaa

Qeqertaq Prins Henrik aallaqqaammut franskit-belgiskiamiullu 1905-imi umiarsuvinnguamik Belgica-mik ilisimasassarsiornerannut atatillugu atserneqarpoq.  Ilisimasassarsiorneq Orleansip Hertugianit (Duc d´Orleans) aallarnisarneqarsimavoq, Tunup imartaata sapinngisamik avannarpasinnerpaartaa umiarsuarmik anguniarneqarnissaa siunertarineqarluni. Avannamut ingerlaarnermi immap naqqanik, nunap pissusaanik qanganisalerinermillu ilisimasassarsiorluni suliaqartoqarpoq sumiiffik ilisimasassarsiortunit nunap assiliorneqarpoq.

Qeqertaq Prins Henrik qanganitsanik nunatsinni qangarsuarniit kulturit siullerpaat ilaannit nassaarfiusimanini aallaavigalugu soqutigineqalersimavoq. Kap Sankt Jacqes-ip eqqaani Issittup kangisissortaani illukunik amerlanerpaanik, Inunnit siullerpaanit taamatullu Independence II-meersunit aamma Dorset siullerneersunit kiisalu Thule-meersunit nassaarfiusimavortaaq.

Qeqertami Prins Henrikimi nassaanik aaqqissuussamik nalunaarsuineq siulleq pivoq 1906-1908-mi Tunup Avannaata sineriaani Danmarks-Ekspiditioni ilisimasassarsiormat.

Peylandimi Eigil Knuthsip qangarnitsanik misissuineranut atatillugu aammalu sumiiffiup qanittuaniittut 1938-imi qimusserluni Eli Kristiansen peqatigalugu Qeqertaq Prins Henrik siullermik tikippaa. 1938-imi 1939-imilu Knuthsi qeqertaq pillugu nalunaarsuillunilu assaavoq.  Sumiiffimmi qangarnitsanik erlinnartuutit alutoringaaramigit 1987-imi uterfigaa, tassanilu paasillugu najugaqarfigineqarnikuusimasuni nassaarfigeqqaakkamini qangarnitsat erlinnartuutit qeqertamiittut ilaannannguarigaat. Taamaattumik Knuths, qeqertami najugaqarsimasut piffissallu ingerlanerani inuunerisimasaat pillugit annertunerusumik ataasiakkaat qulaajaaffiginiarlugit1988-imi 1989-imilu qeqertamut uteqippoq.

Paasissutissat erseqqinnerusut Inatsisartut Siulittaasuat Jonathan Motzfeldt-imut oqarasuaat 34 61 05 imaluunniit angallattagaq 55 37 01 aqqutigalugu saaffiginninnikkut pissarsiarineqarsinnaapput.