Siulittaasoqarfik ullumi tassanngaannartumillu naalakkersuisoqatigiinnik nutaanik pilersitsinermut atatillugu UPA22-mi oqaluuserisassat allanngortinneqarnissaannik taamatullu aamma Inatsisartut ataatsimiittarfianni oqaluuserisassat sapaatip akunneranit 14-imit 17-imut kinguartinneqarnissaannik Inuit Ataqatigiinnit Siumumiillu qinnuteqaammik tigusaqarpoq.

Siulittaasoqarfiup UPA22-mi oqaluuserisassani allannguutit kinguartitsinerillu tulliuttut akuerai:

• Sapaatip akunnerani 14-imi oqaluuserisassani immikkoortut tamarmik sapaatip akunneranut 17-imut kinguartinneqarput
• Sapaatip akunnerani 14-imi Inatsisartuni ullut ataatsimiiffiusussat marluussapput
• Ulloq 5. april ataatsimiinneq nal. 13.00 aallartissaaq oqaluuserisassallu allanngortinneqassallutik oqaluuserisassani immikkoortut pingasut oqaluuserineqartussanngorlugit: oqaluuserisassani imm. 2 Oqaluuserisassanut nassuiaat, oqaluuserisassani imm. 3 Inatsisartut siulittaasussaannik siulittaasullu tullissaanik qinersineq aamma oqaluuserisassani imm. 16 Naalakkersuisunik qinersineq
• Ulloq 6. april oqaluuserisassat allanngortinneqassapput oqaluuserisassani immikkoortut marluk oqaluuserineqassallutik: oqaluuserisassani imm. 2 Oqaluuserisassanut nassuiaat aamma oqaluuserisassani imm. 4 Ataatsimiititaliani ilaasortassanik taakkulu sinnisussaannik qinersineq (matoqqasumik ataatsimiinneq)

Upernaakkut ataatsimiinnermut oqaluuserisassat sapaatip akunnerata aggersup ingerlanerani siulittaasoqarfiup naleqqussassavai.

Sapaatip akunnerata ingerlanerani oqaluuserisassat nutartikkat nassiunneqarumaarput oqaluuserisassanilu allannguutit Inatsisartut nittartagaatigut takuneqarsinnaassallutik.

Inussiarnersumik inuulluaqqusillunga

Hans Enoksen