Sumiiffiinni inuussutissarsiornerup ineriartornera nammineerluni takunninnikkut annertunerusumik paasisaqarfigineqarnissaa Ataatsimiititaliat angalaneranni siunertarineqarpoq. Tamatuma saniatigut najukkani inuussutissarsiortunit  immersorneqarnissaq paasissutissinneqarnissarlu ataatsimiititalianit kissaatigineqarpoq, taamaalillutik ataatsimiititaliat ullumikkut Kalaallit Nunaanni inuussutissarsiornerup ilisarnaatitut unammilligassai periarfissaalu nammineq isiminnik takullugit paasisaqarfigisinnaaniassagamikkit.

 

Ataatsimiititaliat angalaneranni aamma kommunini aqutsisut, inuussutissarsiornermut siunnersuisoqatigiit, aalisarnermut, piniarnermut inuussutissarsiornermullu soqutigisaqatigiiffiit ataatsimiititalianit ataatsimeeqatigineqarput. Tassunga atatillugu aalisarnermik inuussutissarsiortunut aamma suliffeqarfinnut nunamiit aallaaveqartumik inuussutissarsiortunut arlalinnut ataatsimiititaliat takuniaapput. Suliffeqarfiit angisuut mikisullu, namminersortunit pisortaniillu pigineqartut ataatsimiititat takuniaaffigaat.

 

Sumiiffinni tamani ataatsimiititaliat pitsaasumik tikilluaqquneqartarnertik nuannaarutigaat. Ataatsimiititaliani ilaasortanut paasisaqarfiusumik suliat assigiinngitsorpassuit saqqummiussuunneqarmata ataatsimiititalianut annertuumik pissarsiffiupput.

 

Ataatsimiititaliat angalanerminni ilaatigut makku maluginiarpaat:

• Suliffeqarfiit Namminersornerullutik Oqartussanit pigineqartut angissusertik atorlugu suliffeqarfeeqqanik namminersortunik unammillinnginnissaat naalakkersuinikkut eqqumaffiginiarneqartariaqartoq kissaatigineqartoq. Suliffeqarfiit Namminersornerullutik Oqartussanit pigineqartut suliffeqarfeeqqat namminersortut ingerlassaasa assinginik aallartitsisarlutillu angissusertik atorlugu unammillertarnerat aallarnisaasartut arlallit kukkusumik takutitsinerusutut isumaqarfigaat.

 

• Suliffeqarfiit Namminersornerullutik Oqartussanit pigineqartut akornanni unammillinnginnissamut piumasaqaatit piusut sunniutaat - taakku nutarterneqarsinnaanerat siunertaralugu - sukumiinerusumik misissornissaat pisariaqartoq.

 

• Umiarsuarnik tunitsiviliinissamut akuersissutinik tunniussisarnerup isumagineqartarnera arriippallaarmat aalisarnermik ingerlassallit annertungaatsiartumik tamanna isornartoqartikkaat.

 

Paasisat qulaani taaneqartut pillugit Naalakkersuisut piaartumik suliniuteqartariaqarnerat pisariaqartoq ataatsimiititalianit isumaqarfigineqarpoq. Ajornartorsiutillu taakku Naalakkersuisunit piaartumik malittareqqinneqarnissaat kissaatigalugu ataatsimiititaliat Naalakkersuisunut saaffiginnilersaarput.

 

Angalaqataapput:

 

Ruth Heilmann, (S). Inuussutissarsiornermi ataatsimiititaliap siulittaasua.

Lene Knüppel, (D). Inuussutissarsiornermi ataatsimiititaliami ilaasortaq. 

Ane Hansen, (IA). Aalisarnermut, Piniarnermut, Nunalerinermullu ataatsimiititaliap siulittaasua.

Augusta Salling, (A). Aalisarnermut, Piniarnermut, Nunalerinermullu ataatsimiititaliami ilaasortaq.

Jens B. Frederiksen, (D). Aalisarnermut, Piniarnermut, Nunalerinermullu ataatsimiititaliami ilaasortaq.

 

Sakarias Amondsen, Inuussutissarsiornermi ataatsimiititaliamut allatsi

David Jensen, Aalisarnermut, Piniarnermut, Nunalerinermullu ataatsimiititaliamut allatsi