Inatsisartut Ilaqutariinnermut Peqqissutsimullu Ataatsimiititaliaat Danmarkimi paasisassarsiorluni angalavoq

Ataatsimiititaliaq ulluni 2. decemberimit 6. decemberip tungaanut Århusimi Københavnimilu paasisassarsiorluni angalavoq.

Angalanermi siunertarineqarpoq:

• Tarnimikkut napparsimasut immikkoortortaani R3-mi kalaallit tarnimikkut napparsimasut eqqartuussaanermikkut katsorsagassanngorsimallutik uninngasut misissorneqartarnerat napparsimavimmiitsitaanerisalu ingerlaasaa pillugit ilisimatitsissutinik pissarsinissaq
• Isumaginninnermut Ataatsimiititaliaq aamma Peqqissutsimut Ataatsimiititaliaq peqatigalugit Folketingip Kalaallit Nunaanut Ataatsimiititaliaalu ataatsimoorussamik soqutigisat suliallu attuumassutillit pillugit eqqartueqatigiinneq
• Kalaallit Peqqissartut Angerlarsimaffiannut pulaarneq, Danmarkimilu Kalaallillu Nunaanni nakorsartittut isumagineqartarnerat pillugu immikkoortortallu akornanni suleqatigiinneq pillugu paasissutissanik pissarsinissaq

Pulaarnerni tamani saamasumik kiinnerlutik ilassiortunut ataatsimiititaliamut ilaasortat qujapput, immikkullu qujaffigerujussuarumallugit R3-mi aamma Kalaallit Peqqissartut Illuanni sulisut. Ataatsimiititaliamit aamma qujaffigineqarput Kalaallit Peqqissartut Illuanni uninngasut peqqissutsimut suliassaqarfimmut annertuumik soqutiginninnerannut.

Danmarkimi ilaqutariit kalaallit angajoqqaatut piginnaasaannik misissuinernut atatillugu eqqarsartaatsinik misissuisarnerit atorneqartarnerannik suliap ineriartornera Folketingep ataatsimiititaliaanik ataatsimeeqateqarnermi pingaarutilittut oqaluuserineqarpoq. Suliaq pisariusoq Ilaqutariinnermut Peqqissutsimullu Ataatsimiititaliamit oqaatigineqarpoq, tamatumani oqartussat assigiinngitsut akornanni annertuumik suleqatigiittoqarnissaa pisariaqarluni, aammali Kalaallit Nunaata Danmarkillu akornanni naalakkersuinikkut eqqummaariffigineqarnissaa suleqatigiissutigineqarnissaalu pisariaqartinneqartuarpoq. Taamaattumik ataatsimiititaliap Meeqqanut Inuusuttunullu Naalakkersuisoq isumaqatigaa, tassalu kalaallinik ilaqutariinnik immikkoortitsinerit unitsittariaqarput.

Naggasiullugu Ilaqutariinnermut Peqqissutsimullu Ataatsimiititaliap inuit tamaasa juullisiorluarnissaannik kissaappai ukiunilu qaangiuttuni suleqatigiilluarnermut qujalluni.

Inussiarnersumik inuulluaqqusillunga

Ilaqutariinnermut Peqqissutsimullu Ataatsimiititaliap siulittaasua

Mala Høy Kúko