Inatsisartut Siulittaasuata Mimi Karlsenip ulloq 7. Oktober 2024-mi Qasigiannguani Ole Madsen sølviusumik Nersornaaserpaa

Inatsisartut Siulittaasuata Mimi Karlsenip Qasigiannguit Oqaluffiata ataatsimiittarfiani nalliuttorsiorpalaartumik katerisimaarnermi Ole Madsen sølviusumik Nersornaaserpaa.

Ole Madsen sølviusumik Nersornaaserneqarpoq ukiorpassuarni inuiaqatigiinnik akuuffigisaminik, nammineq piumassutsimik peqatigiiffilerinermi suliassanik assigiinngitsunik isumagisaqartarnermigut kiisalu ukiorpassuarni pattattartutut ajoqitullu sulisimanermigut sulilu sulinermigut, annertuumik sullissisimanini pissutigalugit.

Inatsisartut Siulittaasuata Ole Madsenimut oqalugiarnermini ilaatigut makku erseqqissaatigai:

“Inatsisartut Siulittaasoqarfiata sølviusumik Nersornaaserpaatsit ukiorpassuit ingerlanerini assigiinngitsorpassuartigullu inuiaqatigiinnik akuuffigisannik annertuumik sullissisimanerit pissutigalugu.

Taamaalilluni ilisimaneqarluarpoq inuuninni sivisuumi nammineq piumassutsimik tunngavilimmik assigiinngitsorpassuarnik suliaqartarsimasutit, erinarsoqatigiinni aqutsisutut, Qasigiannguani peqatigiiffilerinermi sunngiffinni suliaqartarnikkut, SIP-mi sulisartoqarnermut tunngasunik suliaqartarnikkut minnerunngitsumillu timersoqatigiiffimmi KUGSAK-mi meeqqanik inuusuttunillu sungiusaasarnikkut.

Ulluinnarni suliappit saniatigut pattattartutut ajoqitullu ilinniagaqarsimavutit ukiorpassuarnilu taamatut oqaluffimmi pattattartutut ajoqitullu atuussimallutit maannalu utoqqaligaluarlutit suli taamatut sulillutit. Nutaarsiassaagunanngilaq oqaruma soraarninngorlutit suliarisartakkannit tunuarsinnaagaluarlutit inuiaqatigiinnut inooqataaffigisannik suli sullissinissat toqqarsimagakku, tamannalu inummut ilungersuuteqallaqqissumut ilisarnaatit ilagaat.

Najukkami inuiaqatigiinnut tunniusimallutit peqataajuarnikkut illoqarfiup inuuneranut katattussaanngitsumik tunniussaqarsimavutit timersoqatigiiffeqarnermilu timitalimmik suliniuteqartarnikkut timersornermi peqataassagaanni ataatsimoornerup ataqqeqatigiinnerullu pingaaruteqassusiinik ilinniartissimallugit.

Ukiorpassuarni qasusuilluinnarlutit ilagiit sinniisaannik sullissisimavutit maanilu najukkami annertunerusumik aaqqissuussisoqassatillugu ikiuunnissannut tunuarsimaarneq ajorputit, soorlu aamma pissusissamisuuginnartoq inuiaqatigiinnik sullisserusunnerit ingerlatiinnarakku utoqqaat peqatigiiffiata ingerlanneqarneranut peqataanikkut.

Akuuffigisimasatit peqataaffigisimasatillu amerlaqalutillu assigiinngeqaat, tamarmillu maani nalliuttorsiualaarnermi taaneqarsinnaagunaratik.”

 

Ole Madsenip qujassuteqarluni oqalugiarnermini ilaatigut erseqqissarpaa:

"Inuunermi inuttut suleqataasussanngorluta inunngortitaasimavugut. Uangulli nammineq aalajangertussaavarput taamaaliussanerluta taamaaliussannginnerlutaluunniit."

 

 

 

Siulittaasoqarfik sinnerlugu

Inatsisartut Siulittaasuat Mimi Karlsen