Kalaallit Nunaata Skotlandimit tunissutisiaa annoraamineq ikaartitigaq kipparissortooq immikkuullarilluinnartoq Kalaallit Nunaannillu atsiussaq, (Greenland Tartan), Inatsisartut siulittaasuata Kim Kielsenip Inatsisartut sinnerlugit tiguaa.

 

Tuluit Nunaannit tuluit inatsisartunut ilaasortaatitaat sisamat ulloq 9. februar pisortatigoortumik pulaarmata Inatsisartut siulittaasuata Kim Kielsenip Inatsisartut sinnerlugit tikilluaqquai, Skotlandimiillu Kalaallit Nunaannut pisortatigoortumik tunissut immikkuullarilluinnartoq nassarpaat: Annoraamineq ikaartitsigaq kipparissortooq nutaamillu ilusilersugaasoq atserneqartorlu “Greenland Tartan”.   

 

Annoraaminerlu tunissutaasoq assip sinissaaniittoq Inatsisartut Siulittaasuannut tunniunneqarpoq tunuliaqutaasumullu nassuiaataasumik ima oqaasertalerneqarsimalluni.

 

Oqaasertaliussami qangarsuaanit Skotlandimi oqaatsit issuarneqartartut innersuussutigineqarput:

 

“Annoraamineq ikaartitigaq kipparissortooq, Tartan, atortillugu ilitit illersorsinnaajuarpatit!”

(“If you wear the tartan, then you can fight for the clan!”)

 

Tamatuma saniatigut Kalaallit Nunaannik ersoqatigiinnissamik nalunaarut ilanngunneqarsimavoq:

 

“Qularutigissanngilarsilu uagut Skotlandimi ikaartitsikkamik titarnilersukkamik annoraaminiliaaterput, Tartan, atorlugu peqatigalusi kalaallit inuiaat Kalaallit Nunaannik piginnittuusinnaatitaajuaannarnissaat ataatsimoorfigiuassagipput!”

 

(“And you can be sure that as Scots, we will always wear our tartan with you,

and stand in solidarity for the right of Greenland to be for the Greenlanders!”)

 

Ilusilersukkap oqaluttuassartaa annoraaminerlu Inatsisartuni pulaartunut takusassiarineqarpoq.

 

Tuluit Nunaanni tuluit inatsisartunut ilaasortaatitaat sisamaasut partiinit sisamaneersuupput, aallartitallu ukuninnga inuttaqarlutik:

 

Brendan O'Hara MP (Scottish National Party) – Chair, siulittaasoq
Liz Saville Roberts MP (Plaid Cymru) - Vice Chair, siulittaasup tullia
Cat Smith MP (Labour)
Alicia Kearns MP (Conservatives)
Dr Dwayne Ryan Menezes (Polar Research and Policy Initiative) – Secretariat, allattoqarfik

 

Tuluit Nunaata Kalaallillu Nunaata akornanni attaveqatigiinnerup naalakkersuinikkullu paasinneqatigiinnissat siuarsarneqarnissaat aallartitat pingaarnertut siunertaraat, aammalu nunatsinnik tapersersuinertik, ersoqatigiinnertik kiisalu ikinngutigiinnertik takutikkumallugu.  

 

Kalaallit Nunaata NATO-mi kitaamiunilu ilaanissamik kissaateqarnera tapersersorniarlugu, issittumilu inatsisartunut qaninnerusumik nukittunerusumillu attaveqarnerulernissaq taamaalillutik aallartitat kissaatigaat.

 

Tamatuma peqatigisaanik Kalaallit Nunaata nunarsuarmi inissisimanermini ilungersunartorsiornera NATO-mi iligisanut tamanut sunniuteqartoq pillugu Tuluit Nunaata Europallu ilisimasaqarnerulernissaat paasinninnerulernissaallu tuluit aallartitaasa aamma kissaatigaat.

 

Inatsisartut Siulittaasuat Kim Kielsen oqarpoq:

”Skotland tuluillu inuiaqatigiit tamarmiusut sinnerlugit aallartitat tikeraarnerminni oqariartuutaat siullertut attortissutigaara. Ilitsinnit ersarilluinnartumik taperserneqarnerput Kalaallit Nunaata qujamasuutigaa, soorlu tamanna aallartitat tikeraarneranni oqaloqatiginninnernilu aammattaaq ersersinneqartoq.

 

Pisortatigoortumik tunissummut kusanaqisumut Inatsisartut sinnerlugit qujavunga. Qaqutigooqaarmi Kalaallit Nunaanni innuttaasut tamakkerluta avitseqatigiissutigisinnaasatsinnik tunissuteqarfigineqartarnerput.

 

Ilusilersugaq nutaajusoq uagut nammineq ileqqutoqqatsinnut pitsaasumik tapeeqataajumaartoq aammalu uagut nammineq inuiaqatigiittut assuutitsinnut assigiinngitsutigut ilaliunneqarumaartoq qularutiginngilara. Ilusilersugaq kusanartoq qularutiginngilara iligiittut peqatigiilluta Kalaallit Nunaata siunissaannik sorsoqatigiinnissatsinni takutitsisuusoq tulluusimaarutigalugu atussagipput, Skotlandimeersunillu kimilluunniit peqateqarluta nuannaarnerput takutikkumaaripput, - Kalaallit Nunaata siunissani nammineq aalajangissammagu.”  

 

 

Inussiarnersumik inuulluaqqusillunga

 

Kim Kielsen