Ukiakkut ataatsimiinneq 2024 Imm. II

2024-mi ukiakkut ataatsimiinneq Imm. II-mi ingerlaqqissaaq ulloq 3. februar 2025 Inatsisartut ataatsimiittarfianni ulloq ataatsimiiffiusoq siulleq immikkullu ataatsimiiffiusoq ingerlanneqassalluni. Siulittaasoqarfiup UKA24 Imm. II-mi oqaluuserisassat immikkoortunik UKA24 Imm. I-imi oqaluuserineqanngitsoortunik naleqqussarpai.

Siulittaasoqarfiup oqaluuserisassat imatut naleqqussarsimavai:

• Sap. ak. 5-mi ullut ataatsimiititalianit ataatsimiiffiusarnissaat suli pilersaarutaavoq.
• UKA24 Imm. II sap. ak. 6-imiit aallartissaaq ulloq 3. februar ataatsimiiffiussalluni siulleq. Ataatsimiinneq nal. 10.00 aallartissaaq nal. 20.00-illu tungaanut ingerlassalluni ullormi tassani oqaluuserisassat Imm. 1-imit kinguartinneqarsimasut amerlanersaasa siullermeerneqarsinnaanissaat qularnaarniarlugu.
• Inatsisartut ataatsimiittarfianni ataatsimiinnerit ullut tamaasa nal. 10.00 aallartittassapput nal. 17.00-ilu naammassereersimasarnissaat naatsorsuutigineqarluni.
• Immikkoortut ulluni ataatsimiiffiusussani pilersaarutigineqartuni oqaluuserineqanngitsoortut suliariaasiusutut ullormut ataatsimiiffiusumut tullermut ingerlateqqinneqartassapput.
• Immikkoortut kinguartinneqartut oqaluuserineqartarnissaannut Inatsisartut ataatsimiittarfianni ulluni ataatsimiiffiunngitsuni, tassa ataasinngornerni tallimanngornerniluunniit, ullunik immikkut ataatsimiiffiusunik pilersitsisoqarsinnaassaaq. Tamanna pisassaaq oqaluuserisassat ingerlaavartumik iluarsiissuteqarfigineqartarnerisigut.
• Imm. II-mi pingasunngornikkut akunnerit apeqquteqarfiusinnaasut pingasuussapput pingasunngornerni nal. 10.00-imiit 11.00-imut ingerlanneqartartussat, tamatumalu kingorna ataatsimiinneq nal. 17.00 tungaanut ingerlaqqittassalluni.

Siulittaasoqarfiup maluginiarpaa ataatsimiinnerup aaqqissuussaanera nutaaq suliassanik oqaluuserineqartunik itisiliinissamut piffissaqartitsinerulersimasoq ataatsimiititaliallu sulinerannik eqqissisimanarnerulersitsisimasoq, naak Inatsisartut oqaluttarfianni oqallinnerit akuttunngitsumik qaffaanneqalaartaraluartut.

Siulittaasoqarfiup ilanngullugu oqaatigissavaa Inatsisartuni oqallinnerit aamma sakkortusinnaasarmata. Siulittaasoqarfiup ataatsimiinnermik aqutsisartutut suliassaraa Inatsisartut ataatsimiittarfianni oqallinnerit isummat assigiinngissinnaaneri Inatsisartunullu ilaasortat ataasiakkaat, tamarmik naligiittut innuttaasut qinigaat, ataqqillugit tamatigut ingerlanneqartarnissaat ilaasortanut kaammattuutigisassallugu. Siulittaasoqarfiup ataatsimiinnermik aqutsisutut Inatsisartut ataatsimiittarfianni oqallinnerit nalinginnaasumik naalakkersuinikkut oqallinnermut minnerunngitsumillu innuttaasunut oqallinnernik malinnaasunut pissarsiviusarnissaat sulissutigiuassavaa kaammattuutigalugulu, Inatsisartut ataatsimiittarfianni oqallinnivut avatitsinnit aamma paasineqarsinnaassappata. Inatsisartut ataatsimiittarfianni oqalliseriaatsimut pitsaasumut akisussaaneq taamaalilluni ilaasortani oqallinnermut peqataasuni ataasiakkaaniittuarpoq.

UKA2024 Imm. II-mut tunngatillugu atortussat tamarmik www.inatsisartut.gl-imi takuneqarsinnaapput, soorlu aamma oqaluuserisassani allannguutit nittartakkakkut pisartagarilerneqarsinnaasut. Nutarterinit tamarmik nittartakkami malinnaavigineqarsinnaassapput.

Ikinngutinnersumik inuulluaqqusillunga

Mimi Karlsen