Kalaallit Nunaanni datacentereqalernissamut periarfissat Aningaasaqarnermut Akileraartarnermullu Ataatsimiititaliap Irlandimut paasisassarsiorluni angalanermini misissorpai

Aningaasaqarnermut Akileraartarnermullu Ataatsimiititaliamut ilaasortat ungasinngitsukkut Irlandimi Dublinimut pissarsiffiulluartumik paasisassarsiorlutik angalapput. Angalanermi siunertaavoq Kalaallit Nunaata aningaasaqarnerata assigiinngisitaarnerulernissaanut ilisimasassanik isumassarsianillu pissarsinissaq. Datacenterit tassungalu atatillugu Kalaallit Nunaata nillataarnerata aammalu erngup nukissiorfeqarnermi periarfissat atorluarneqarsinnaanerat angalanermi immikkut qitiutinneqarput.

Datacentereqarnermi suliffissuarnut atatillugu oqartussaasut inissisimanerat paasisaqarfigiumallugu inuussutissarsiornermut ministereqarfik aammalu silap pissusiinut nukissiuuteqarnermullu ministereqarfik kiisalu aningaasaleerusussuseqarnermik siuarsaanissamut naalagaaffiup suliniaqatigiiffia IDA ataatsimiititaliamut ilaasortanit pulaarneqarput. Tamatumani ilaatigut piumasaqaatit, periutsit najukkamullu sunniutit ataatsimiititaliamit tusagaqarfigineqarput. Tamatuma saniatigut datacenterit ingerlatseqatigiiffiit tungaanit isigalugit aammalu datacenterliorfissatut suut pilerigineqartarnersut tusagaqarfigiumallugit inuussutissarsiortut peqatigiiffia Cloud Infrastructure Ireland aammalu  Digital Infrastructure Ireland ataatsimiititaliamit ilaatigut ataatsimeeqatigineqarput. Irlandimiinnermissaaq EQUINIX datacenter aamma takuniaaffigineqarpoq, taamaalillunilu datacenterit illutaat paasisaqarfigineqarlutik.

Irlandimi aningaasaqarnermut ataatsimiititaliamut siulittaasup Mairéad Farrellip ataatsimeeqatiginissaa Dublinimi ulluni pingasuni pisussanut pilersaarummi aamma periarfissaqarfigineqarpoq. Irlandimi Kalaallillu Nunaanni aningaasaqarnikkut inissisimanerit nunallu oqaluttuarisaanikkut assigiissusii ataatsimiinnermi ilaatigut oqaluuserineqarput.

Pulaarnerit paasissutissiiffiulluartut datacenterinik suliffeqarfissuit pillugit unammilligassanik aammalu misilittakkanik  ammasumik avitseqatigiiffiusut tigussaasunillu siunnersuiffiusut Aningaasaqarnermut Akileraartarnermullu Ataatsimiititaliamit qujassutigineqarput.

Erik Jensen
Aningaasaqarnermut Akileraartarnermullu Ataatsimiititaliap siulittaasua
Annertunerusumik paasisaqarusukkaanni ataatsimiititaliap siulittaasua oqarasuaammut attavigineqarsinnaavoq +299 53 04 08.