Inatsisartut Siulittaasoqarfiata Nuummi ulloq 25. november 2024 Inatsisartut Siulittaasuat Mimi Karlsen kuultiusumik Nersornaaserpaa

 

Inatsisartut Siulittaasuata sinniisussaata Kristian Jeremiassenip Nuummi Hans Egedep Illuani nalliuttorsiualaarnermi Inatsisartut Siulittaasuat Mimi Karlsen kuultiusumik Nersornaaserpaa.

Inatsisartut Siulittaasuat Mimi Karlsen kuultiusumik Nersornaaserneqarpoq ukiorpassuarni tunniusimalluni naalakkersuinikkut suliaqarnera aammalu Inatsisartut Siulittaasuattut atuunnera pissutigalugit.

Inatsisartut Siulittaasuata sinniisussaata Inatsisartut Siulittaasuanut Mimi Karlsenimut oqalugiarnermini ilaatigut makku erseqqissaatigai:

“Mimi Karlsen, inuuninni ukiorpassuarni tunniusimallutit naalakkersuinikkut suliaqarnerit aammalu Inatsisartut siulittaasuattut atuunnerit pissutigalugit Inatsisartut Siulittaasoqarfiata kuultiusumik Nersornaaserpaatit.

Inatsisartunut ulloq 2. juni 2009-mi qinigaaqqaarputit aammalu kultureqarnermut, ilinniartitaanermut, peqqissutsimut, isumaginninnermut, suliffeqarnermut, ilageeqarnermut naligiissitaanermullu suliassaqarfiit iluini arlaleriarlutit Naalakkersuisunut ilaasortaasimallutit. Piffissap ingerlanerani ataatsimiititalianut, siunnersuisoqatigiinnut aalajangiisartunullu assigiinngitsorpassuarnut aamma ilaasortaasarsimavutit.

Kommunit siusinnerusukkut agguataarneqarnerisa nalaani piffissami 2005-imit 2009-mut Maniitsumi kommunalbestyrelsimut aamma ilaasortaasimavutit, tassanilu viceborgmesteritut aamma atuuffeqarsimallutit.

Inatsisartut Siulittaasuattut ulloq 22. september 2023-mi qinigaaqqaarputit, tamatumanilu peqqissutsimut Naalakkersuisutut atuuffippit aappaanit tunuartariaqarsimallutit. Inatsisartut Siulittaasuattut ulloq 20. september 2024-mi qinigaaqqipputit.

Ilinniarfissuarmi ilinniartitsisutut ilinniarsimavutit ukiorpassuillu ingerlanerini perorsaanerup iluani ingerlaqqiffiusumik ilinniarsimallutit, soorluttaaq ukiorpassuit ingerlanerini Maniitsumi immikkut ittumik atuartitsinermi ilinniartitsisuusimasutit siunnersuisartutullu ilinniartitsisuusimallutit. Naalakkersuinikkut suliaqarninni perorsaasutut misilittakkatit annertuumik isumassarsiorfigisarpatit, taakkulu naalakkersuinikkut suliaqarnermi aqqutsinikkut atortorissallugit pisut ilaanni iluaqutigilluarsinnaasarlugit.

Naalakkersuinikkut sulininni pinngortitaq annertuumik isumassarsiorfigisarpat nukissamillu aallerfigisarlugu. Illit ilaquttatillu asiartarnermik ataatsimut nuannarinninnissigut akulikitsumik katersuuttarpusi. Taamaattumillu ukiorpassuit ingerlanerini najukkanni peqatigiiffilerinermik silamilu timersuutinik sammisaqarnermik annertuumik aamma ingerlataqarsimavutit.

Inuusuttunut atugassarititat minnerunngitsumillu peqqissutsimut ilinniartitaanermullu suliassaqarfik annertuumik soqutigisaralugit naalakkersuinermik suliaqartutut tunniusimalluinnartutut ilisimavatsigit.

Inatsisartunut Siulittaasutut naalakkersuinikkut sulininni isumaqatigiisitsiniarneq aammalu Inatsisartut suliaat pillugit naalakkersuinikkut soqutigisat assigiinngitsorpassuit katersuuffiunissaat anguniartuarpat. Amerlanerpaat amerlanertigut ataatsimoortinniarlugit illit nammineq naalakkersuinikkut soqutigisavit uninngatikkallarnissaa ilaatigut unammillernartarsimavoq.

Naalakkersuinikkut ingerlatsininni pisimasut iliuuserisimasatillu annertuut naalakkersuinikkut sulininni tunniusimalluinnarninnut minnerunngitsumillu piumassuseqarninnut takussutissaapput, tamannalu kuultiusumik Nersornaasernikkut siulittaasoqarfiup annertuumik qujaniarneranut ersiutaavoq.”

 

Inatsisartut Siulittaasuat Mimi Karlsenip qujassuteqarluni oqalugiarnermini ilaatigut erseqqissarpaa:

“Qujanaq Inatsisartut siulittaasuinut, inatsisartunut.

Ilaquttat, nunaqqatit, inuit atugaat pitsanngortinniarlugit suliassaqartuaannarpoq, suliarigaannilu iluaqutaaneri takullugit pilluaataajuaannarluni.

Peroriartorpunga suliaqartuaannartut akornanni. Taakkuttaaq piumaffiginnittuaannarput suliaqarnissamik, taannalu uannut sunniuteqarsimaqaaq.

Politikkikkut sulineq suliffittulli allatut isigaara. Inuit ikiugassat, ataqqisassat, atukkallu pitsanngortinniagassat suliarisarlugit. Nersorneqarnissaq qummulluunniit isigineqarnissaq pingaartinnagu.”

 

 

 

Siulittaasoqarfik sinnerlugu

Inatsisartut Siulittaasuata sinniisussaa

Kristian Jeremiassen