2026-mi upernaakkut ataatsimiinneq

 

2026-mi Inatsisartut upernaakkut ataatsimiinnissaannut (UPA26) oqaluuserisassat ullumi nassiussuunneqarput.

 

Inatsisartut upernaakkut ataatsimiinnerat marlunngornermi ulloq 14. april 2026 nal. 10.00 aallartissaaq ullullu 18. juni 2026 tungaanut ingerlasussatut pilersaarutigineqarluni.

 

Siulittaasoqarfiulli ullut ataatsimiiffiusussat kingullit ulloq 31. marts 2026 apeqquteqaat aallaavigalugu oqallinnissamik siunnersuutinik tunniussivissap kingorna naleqqussarsinnaavai, taamaattumillu ullut ataatsimiiffiusussat ilaat kingusinnerusukkut iluarsineqarsinnaassallutik.

 

Katillugit immikkoortut 147-t UPA2026-mi suliarineqassapput. Inatsisartunut ilaasortanit immikkoortut nutaat katillugit 48-t Naalakkersuisunillu immikkoortut nutaat 33-it suliarineqartussatut oqaluuserisassanut ilanngunneqarput. Tamatuma saniatigut immikkoortut UKA25-mit kinguartinneqarsimasut 66-it ataatsimiiffiusumi  suliarineqassallutik.

 

Sapaatit akunnerini ullut ataatsimiiffiusartussat imatut agguataarneqarput:

 

2026-mi upernaakkut ataatsimiinneq (UPA26)

· 2026-mi upernaakkut ataatsimiinneq marlunngornermi ulloq 14. april nal. 10.00 aallartissaaq

 

· Sapaatip akunneranut ullut pingasut Inatsisartuni ataatsimiittarfianni ataatsimiiffiusassapput – marlunngorneq, pingasunngorneq sisamanngornerlu – piffissami nal. 10.00 – 16.00

 

· Ataasinngornerit tallimanngornerillu ataatsimiititaliani ataatsimiiffiusassapput. Sapaatip akunnera 19 aamma 22 ullut marluk kisimik ataatsimiiffiussapput

 

· Pingasunngornerni marluk- pingasuni piffissami nal. 10.00-imiit nal. 11.00-imut naalakkersuisunut akunneq apeqquteqarfiusinnaasoq ingerlanneqartassaaq, tamatumalu kingorna ataatsimiittarfimmi ataatsimiinneq nanginneqartassalluni. Akunneq apeqquteqarfiusinnaasoq siulleq ulloq 22. april pissaaq (Naalakkersuisut apeqquteqarfigineqarsinnaasut tulleriinnerat Inatsisartut nittartagaanni takuneqarsinnaassaaq pisariaqarneralu malillugu nutarterneqartassalluni)

 

· UPA26-mi ulloq ataatsimiiffiusoq kingulliugallartoq tassaassaaq ulloq 18. juni

 

UPA2026-mut tunngatillugu atortussat tamarmik www.ina.gl-imi takuneqarsinnaapput, soorlu aamma oqaluuserisassat allannguutaat nittartakkakkut pisartagarineqalersinnaasut.

 

Ilaasortat Naalakkersuisullu ataatsimiinnissaq sapaatip akunneranik ataatsimik sioqqullugu iluarsiissuteqarnissamik siulittaasoqarfimmut qinnuteqarnissamut periarfissaqarput, taamaattumillu oqaluuserisassani allanngortitsisoqartarsinnaalluni. Iluarsiissutit tamarmik nittartakkami ingerlaavartumik iluarsineqartassapput.

 

 

 

Inussiarnersumik inuulluaqqusillunga

 

Kim Kielsen