Kalaallit Nunaanni aqqusinertigut angallannermut inatsisip allan-ngortinneqarnissaanik siunnersuutip Inatsisartunit aappaasaaneerneqarnissaa februarimi ukiukkut ataatsimiinnermut kinguartinneqaqqullugu Inatsisartut Siulittaasoqarfiannut qinnuteqarniarluni Inatsisartut Inatsisit Atortinneqarnerannut Ataatsimiititaliaat aalajangerpoq.

Inatsisip allannguutissaatut pilersaarut qaammatinit tallimaniit arfinilinnut kinguarsarneqarnissaa  kinguartitsinerup kingunerissavaa.

Nunami maani tusarniaavigineqartussatut tulluartut siunnersuummut sunniuteqarsinnaanissamut periarfissinneqarnissaat kinguartitsinerup siunertaraa.

Issuarneqarsinnaasoq:

"Ukiut 15-it qaangiupput aqqusinertigut angallannermut inatsit kingullermik allanngortinneqarmat. Maannalu periarfissarsivugut eqqortumik suliarinissaanut! Soqutigisaqaqatigiittut kattuffiit tusarniaavigineqarsinnaasut tamarmik tusarniaavigineqarsimanngitsut oqaatigisinnaavarput. Aamma paasivarput kommunerisatsinnit tusarniaanermut akissutigineqartut arlallit danskit inatsiseqarnermut ministeriaqarfiata isumaliutersuutinut ilanngutinngivissimagunarai - malunnarmammi inatsisissatut siunnersuummut nassuiaatini tusarniaanermut akissutit isummersorfigineqarsimanngitsulluunniit. Tamanna pitsaviunngilaq! Kalaallit Nunaannut aqqusinertigut angallannermut inatsimmut iluarsiinermi danskit aqqusinertigut angallannermut inatsisaanni allannguutit kingulliit kisiisa aallaavigisariaqanngillat. Inatsit Kalaallit Nunaannut atortussaavoq, nunatsinnilu maani pissutsinut, kissaatinut pisariaqartitanullu naapertuuttuusariaqarluni. Tamanna inatsisissatut siunnersuummik piareersaateqarnermi sillimaffigineqartariaqarpoq - taamaanngippammi Køgemi motorilinnut aqqusinernut Maniitsuminngarnit naleqqunnerusumik inatsiseqalissammat."

Olga P. Berthelsen, Inatsisartut Inatsisit Atortinneqarnerannut Ataatsimiititaliaannut siulittaasoq.