Aatsaat 1. januar 2010-mi utoqqalinermi pensionisianik pisartagaqalernissamut ukiutigut killissarititat nalinginnaasut 65-inut qaffanneqarmata aallarniutigalugu erseqqissatigineqassaaq.

Ukiorisanut piumasaqaatinut atatillugu ikaarsaariarnermi aalajangersakkat makku 1. januar 2010-p tungaanut atuupput:

• 31. december 2008 ilanngullugu inuit 63-inik ukioqalersimasut utoqqalinermi pensionisianik tunineqartassapput.
• 1. januar 2009 aallannerfigalugu kiisalu 31. december 2009 ilanngullugu inuit 64-inik ukioqalersimasut utoqqalinermi pensionisianik tunineqartalissapput.

Tamatuma saniatigut inatsimmi nutaami tunngavissat pingaarnerit makku erseqqissaaviginissaat Ilaqutariinnermut Ataatsimiititaliami ilaasortat immikkut pissutissaqartippaat:

• Utoqqalinersialimmut kisimiittumut tunngaviusumik pensionisiat 1. juli 2007-imit ukiumoortumik 110.000 kr.-inut aalajangersarneqarput. 
• Utoqqalinersialinnut aappariinnut tunngaviusumik pensionisiat 1. juli 2007-imit ukiumoortumik 150.000 kr.-inut aalajangersarneqarput.
• Aappariinnut aappaa utoqqalinermi pensionisiaqartumut aappaalu siusinaartumik pensionisiaqartumut tunngaviusumik pensionisiat ukiumoortumik katillutik kr. 140.000-iupput. Taakkulu utoqqalinermi pensionisiaqartumut kr. 80.000-inut siusinaartumillu pensionisiaqartumut kr. 60.000-inut agguataarsimapput.
• Utoqqalinersialik kisermaaq 1. juli 2007-imit utoqqalinermi pensionisianut iluarsiissutitaqanngitsumik ukiumoortumik utoqqalinersiami saniatigut allanik 56.000 kr.-inik isersitaqarsinnaavoq.
• Utoqqalinersialik kisermaaq ukiumoortumik 56.000 kr.-it sinnerslugit utoqqalinersiat saniatigut allanik isertitaqarpat utoqqalinermi pensionisiat ikilisikkiartuaarneqassapput, taakku 228.000-inik taakkunanngaluunniit amerlanerusunik ukiumoortumik allanik isertitaqarnikkut atorunnaassapput.
• Utoqqalinersiallit aappariit ukiumoortumik 84.000 kr.-it angullugit aatsaat isertitaqarsimappata utoqqalinermi pensionisiaat iluarsiivigineqassapput. Utoqqalinersiallit aappariit ukiumoortumik 84.000 kr.-it sinnerlugit allanik isertitaqarpata utoqqalinermi pensionisiat ikilisikkiartuaarneqassapput, taakku 318.000 kr.-inik taakkunanngaluunniit amerlanerusunik ukiumoortumik allanik isertitaqarnikkut atorunnaassapput.
• Utoqqalinermi pensionisialik aapparisap inooqatigisalluunniit isertitai akileraarutaasussat apeqqutaatinnagit utoqqalinersiat affaanik pisartagaqarsinnaatitaavoq.
• Tamanna pillugu malittarisassat erseqqinnerusut naapertorlugit utoqqalinermi pensionisiat siunissami akinut iluarsiissuserneqartalissasut.
• Kommunini utoqqalinermi pensionisialinnut tapinik aningaasanut atugassiisutinut tunngasunik kommunit namminneq aalajangersaasinnaapput.
• Utoqqalinermi pensionisiallit inummut tapisiaqalersinnaanermut periarfissaminnik tamarmik naliiliiffigineqarsinnaatitaapput.

Annertunerusumik paasissutissanik pissarsiniarnermi ¿ Ilaqutariinnermut Ataatsimiititaliami ilaasortat makku  attavigineqarsinnaapput:

Inatsisartunut ilaasortaq Emilie Olsen telefon: 34 62 58, mobil 52 86 64 

Inatsisartunut ilaasortaq Agnethe Davidsen telefon: 34 62 24, mobil 55 57 01

Inatsisartunut ilaasortaq Ruth Heilmann telefon: 34 62 30, mobil 52 98 05

Inatsisartunut ilaasortaq Agathe Fontain telefon: 34 62 26, mobil 48 45 31