Siulittaasoqarfik ukiakkut ataatsimiinnerup immikkoortuata aappaanut inatsisissatut siunnersuummik saqqummiussaqarnissaminik eqqarsaateqartoq sinnerlugu siunnersuut tusarniaatigineqarpoq.

 

Siunnersuutip imarisai pingaarnerit
Aalajangiiffigisassatut siunnersuutit suleriaaseq atuuttoq naapertorlugu siunnersuutip allaffissornikkut aningaasatigullu kingunerisassaannik allaaserinninnermik ilaqartinneqartartussaapput. Piumasaqaatip tamatuma Inatsisartunut ilaasortat partiilluunniit aalajangiiffigisassatut siunnersuutaat eqqarsaatigalugit atuukkunnaarsinneqarnissaa kingunerisassanillu allaaserinninnerup tamatumunnga taarsiullugu Naalakkersuisut akissuteqaataannut, pisariaqarpat immikkut immikkoortumi ilanngussamiluunniit, ilaasalernissaa siunnersuutigineqarpoq. Inatsisartut taamaalillutik suli aalajangiinissamut tunngavissamik qulaajarluakkamik qulakkeerunneqassapput.

 

Kingunerisassanik allaaserinninnerit ullumikkornit annertunerulerlutilluunniit (taamatullu aamma annikinnerulerlutilluunnit) sukumiinerulernissaat siunnersuutikkut siunertarineqanngilaq.

 

Ilanngullugit isumaliutigisassat

Aaqqissuussinermut siunnersuutigineqartumut sanilliullugu qinigassatut allatut isumaliutigineqarsinnaasutut Siulittaasoqarfiup isumaliutigaa aaqqissuussineq, taanna malillugu Naalakkersuisut ilaasortamit partiimilluunniit aalajangiiffigisassatut siunnersuutip allaffissornikkut aningaasatigullu kingunerisassai aatsaat nassuiaateqarfigisassallugit aappassaaneerinninnissaq sioqqullugu, taamaallaallu siunnersuutinut Inatsisartuni siullermeerinninnermi amerlanerussuteqartunit tapersersorneqartunut.

 

Taamatut aaqqissuussisinnaaneq aamma oqaaseqarfigeqqullugu tusarniaavigineqartut qinnuigineqarput.

 

Tunuliaqut
Aalajangiiffigisassatut siunnersuutit ullumikkut siunnersuutip allaffissornikkut aningaasatigullu kingunerisassaannik allaaserinninnermik ilaqartinneqartartussaapput. Piumasaqaat tamanna ilaasortarpassuarnit malikkuminaatsutut misigineqartarpoq. Siunnersuutissap eqqarsaatigineqartup kingunerisassaasa qulaajarneqarnissaannut ilaasortat amerlanertigut § 37 malillugu apeqquteqartariaqartarput. Piumasaqaat tamanna "aporfissatut" isigineqarsinnaavoq, minnerunngitsumik siunnersuutissamik eqqarsaatigineqartumik suliaqarneq piffissaq tunniussereersimaffissaq sioqqutitsiarlugu aallartinneqarpat, taamalu akissutinik pissarsiniarnissamut piffissaqartoqarani.

 

Aamma imatut pisoqarsinnaasarpoq aalajangiiffigisassatut siunnersuutip eqqarsaatigineqartup kingunerisassai § 37 malillugu apeqquteqarnikkut qulaajarneqarsinnaasaratik, paasissutissanik katersinissaq annertooq, susassaqartunit avataaneersunit paasissutissanik annertuumi pissarsiniarnissaq imaluunniit nalilersuilluni misissueqqissaarnerit imaannaanngitsut § 37 malillugu apeqqummut akissuteqarnissamut killiliussat avataanniittut akissuteqarnissamut piumasaqaataagaangata. Taamatut pisoqartillugu siunnersuuteqartut siullermik misissuinissamik aallartitsinissamik imaluunniit nassuiaasiornissamik siunnersuuteqarnissaannut innersuunneqartarput. Tamannalu siunnersuuteqartumut, nalunaarusiornermut taarsiullugu massakkorpiaq iliuuseqartoqarnissaanik kissaateqartumut naalakkersuinikkut anguniagalimmullu pakatsinarlunilu nikallornarsinnaasarpoq.

 

Taamaattumik piumasaqaat pakatsinernik kinguneqartarsimavoq

 

Aalajangiiffigisassatut siunnersuutip kingunerisassaasa qulaajarneqarsimanissaannik piumasaqaatip tamakkiisumik atorunnaarsinneqarnissaa taamaattoq isumaqarnarpoq aaqqiinerusoq pissusissamisuunngitsoq illersorneqarsinnaanngitsorluunniit: Inatsisartut qulaajarluarneqarsimasunik tunngaveqarlutik aalajangiisinnaanissaat immini pissusissamisoortumik piumasaqaataavoq, sattaaserluni aalajangiisoqannginniassammat aalajangiinerup inuiaqatigiinnut qanoq akeqarnissaata naatsorsuutigisariaqarnera, taamatullu aamma nunami innuttaasunut inuussutissarsiortunullu sunik kinguneqarnissaanik naatsorsuutigisariaqarnera nalullugit.

 

Piffissarititaq
Tusarniaanermut akissutit uunga nassiuteqquneqarput inatsisartut@inatsisartut.gl assilinera uunga nassiullugu kfr@ina.alla.gl.

Inatsisartut Allattoqarfiata inatsisissatut siunnersuummut oqaaseqaataajunnartut kingusinnerpaamik ulloq 30. december 2024, nal. 12.00 tiguneqareersimanissaat qinnutigaa

 

 

----------

 

 

Inatsisartut Suleriaasiata allanngortinneqarnera - Siunnersuut

 

Inatsisartut Suleriaasiata allanngortinneqarnera - Nassuiaatit