§ 33 malillugu siunnersuutinut akuersissutigineqartunut atatillugu nalunaarutit nassuiaatillu UPA-mi saqqummiunneqartussat

Innuttaasut tarnimikkut napparsimasut innuttaasut akornanni inooqataaqqilertarnerannut annertusaanissaq anguniarlugu tarnikkut nappaatilinnut immikkoortortaqarfik aammalu pinerluttunik isumaginnittoqarfimmi sulisut ilinniakkamik qaffassaqqiffigisinnaasaannik immikkut suliaqarnissaq siunertaralugu Naalakkersuisut sukkanerpaamik Rigsmyndighed-mut attaveqarnissaat pillugu Inatsisartut aalajangiiffigisassaattut siunnersuut.
Inatsisartunut ilaasortaq Anna Wangenheim, Demokraatit

Kommunit aaqqissugaanerisa allannguutaat pillugit Naalakkersuisut nalilersuinissamik suliaqaqqullugit peqquneqassasut Inatsisartut aalajangiiffigisassaattut siunnersuut. Aaqqissuussaanermi allannguutaasimasut pitsaaqautai ajoqutaalu nalilersorneqassapput, sumiiffimmilu demokratiimut kommunillu aningaasaqarnerannut sunniuteqarsimanersoq, kiisalu allaffissornikillisaaniarnermut siunertaasimasoq piviusunngortinneqarsimanersoq nalilersorneqassallutik. Nalilersuineq UPA2024 nallertinnagu Inatsisartunut agguaassorneqassaaq.
Inatsisartunut ilaasortaq Aqqalu C. Jerimiassen, Atassut

Illoqarfigisaq qimallugu erniartortartut ilaqutaasalu, unammillernartumik atugarisaat pillugit qulaajaanermik iliuusissatullu pilersaarummik suliaqaqqullugit Naalakkersuisut peqquneqarnissaannik Inatsisartut aalajangiiffigisassaattut siunnersuut. Iliuusissatut pilersaarut UKA24-p aallartinnginnerani saqqummiunneqarsimassaaq.
Inatsisartunut ilaasortaq Mikivsuk Thomassen, Inuit Ataqatigiit

Ikiaroornartup cannabis-ip inerteqqutaajunnaarsinneqarpat pitsaaqutai aammalu ajoqutai misissuiffigineqarnissaat siunertaralugu Naalakkersuisut nassuiaammik suliaqaqqullugit Inatsisartut aalajangiiffigisassaattut siunnersuut. Nassuiaat cannabis-ip qanoq inerteqqutaajunnaarsinneqarsinnaanera aammalu qanoq tuniniarsinnaaneranik imaqassaaq kingusinnerpaamillu ukiakkut 2024-imi Inatsartunut tunniunneqassaaq.
Inatsisartunut ilaasortaq Kristian Jeremiassen, Inuit Ataqatigiit

Naalagaaffimmiit akisussaaffiit sorliit pitsaasumik angerlaanneqarsinnaanerinik allattorsimaffimmik imaqartumik Naalakkersuisut nalunaarusiussasut peqquneqarnissaanik Inatsisartunut siunnersuut. Nalunaarusiaq akisussaaffiit angerlaanneqartussat tamarmik immikkut aningaasatigut kingunissaanik imaqassapput taamatullu akisussaaffiit angerlaanneqarnissaannut tigussaasumik piffissalersorlugit. Nalunaarusiaq piareereersimassaaq Inatsisartunullu tunniunneqareersimassalluni UKA2024 nallertinnagu.
Demokraatit Inatsisartut gruppia

Namminersorneq pillugu Inatsimmi § 21-p atuutsilersinneqarnissaa siunertaralugu ataatsimiititaliamik pilersitsisoqarnissaanik Naalakkersuisut peqquneqarnissaannik Inatsisartut aalajangiiffigisassaattut siunnersuut.
Inatsisartunut ilaasortaq Kuno Fencker, Siumut

Inatsisartut aalajangiiffigisassaattut siunnersuut, Naalakkersuisut peqquneqassasut naalagaaffiup avataani Kalaallit Nunaata sinniisoqarfiinut aningaasartuutit nalilersoqqullugit. Nalilersuineq Inatsisartunut UPA2024 ingerlanerani agguaanneqassaaq
Inatsisartunut ilaasortaq Jens-Frederik Nielsen, Demokraatit

Kommunitoqqat uterfigeqqissagutsigit allaffissornikkut aningaasartuutit qanoq allanngussanersut pillugit Naalakkersuisut nalunaarusioqqullugit Inatsisartut aalajangiiffigisassaattut siunnersuut. Nalunaarusiaq UPA2025-mut Inatsisartunut agguaanneqassaaq.
Inatsisartunut ilaasortaq Aqqalu C Jerimiassen, Atassut

Inatsisartunut qinersinissamut atatillugu Naalagaaffinngornissaq pillugu isumasiuilluni innuttaasut taasitinneqarnissaannik Naalakkersuisut peqquneqarnissaat pillugu Inatsisartut aalajangiiffigisassaattut siunnersuut.
Inatsisartunut ilaasortaq Aqqalu C Jerimiassen, Atassut