Inatsisartoqarfik
Ataatsimiinnerit

Apeqquteqaat aallaavigalugu oqallinnissamik siunnersuut

Apeqquteqaat aallaavigalugu oqallinnissamik siunnersuutit - Eqqaamasassat

 

 

  1. Tunniussivissatut killiliunneqartoq.

Apeqquteqaat aallaavigalugu oqallinnissamik siunnersuutit Inatsisartut ataatsimiinnissaata aallartinnissaa sapaatit akunnerinik marlunnik sioqqullugu kingusinnerpaamik nal. 12:00 tunniunneqarsimassapput.

 

  1. Ilusiliinissamut piumasaqaatit eqquutsinneqarsimanissaat.

Allannissaanut najoqqutassiaq atoruk partiillu allaffeqarfiinik ataatsimiititaliallu allattaanik ikiorteqarsinnaaneq atorluaruk. Ilusiliinissamut piumasaqaatit eqquutsinneqarsimanngippata siunnersuutip oqaluuserisassanut ilanngunneqarnissaa Inatsisartut Siulittaasoqarfiannit akuerineqarnavianngilaq.

 

  1. Oqallisigitikkumasat maannakkorpiaq pisunut attuumassuteqarnersoq inuiaqatigiillu eqqarsaatigalugit pingaaruteqarnersoq isumaliutigilluaruk.

Oqallisigitikkumasaq maannakkorpiaq pisunut annertunerpaamik attuumassuteqarpat  inuiaqatigiinnullu siamasissumik pingaaruteqarpat Inatsisartut ataatsimiinnerminni oqaluuserisassaannut ilanngunneqarnissaa ilimanarnerussaaq. Siunnersuutit najukkami pissutsinut taamaallaat tunngasut aallavittut isigalugu Inatsisartut Siulittaasoqarfiannit itigartitsissutigineqarnissaat naatsorsuutigineqartariaqarpoq. Aamma taamaappoq siunnersuutit "imakippallaat" pillugit. Assersuutigalugu Siorapalummi mannissarniartarneq pillugu oqallinnermit timmissat imarmiut nungutaanissaminnut ulorianartorsiortut qanoq pitsaanerpaamik ikiliartorunnaarsinneqarsinnaanerat apeqquteqaat aallaavigalugu oqallisissiatut siunnersuutigissallugu pitsaanerussaaq.

 

Pissutsit apeqquteqaat aallaavigalugu oqallinnissamut naammattumik tunngaviliisuunngitsut sammineqarnissaat kissaatigigukku taarsiullugu Naalakkersuisunut allakkatigut apeqquteqarnikkut pissutsit pineqartut soqutigineqalersissinnaavatit. Apeqqutip taamatullu Naalakkersuisut akissuteqaataasa nuutinneri Inatsisartunut ilaasortanut tusagassiorfinnullu nassiunneqartarput.

 

  1. Sammineqartoq Inatsisartunit siusinnerusukkut oqallisigineqarsimanersoq misissoruk. Sammisat ukiuni kingullerni Inatsisartuni oqallisigineqarsimasut oqaluuserisassatut ilannguteqqinneqarsinnaanerat aallaavittut isigalugu naatsorsuutigineqarsinnaanngilaq. Pisariaqartikkukku ataatsimiititaliami allatsi aperisinnaavat.

 

  1. Apeqquteqaat aallaavigalugu oqallinnissamik siunnersuutip suliarineqarneranut atatillugu partiivit allaffeqarfianik ataatsimiititaliamilu allatsimik ikiorteqartarit, eqqaamalluguli ulloq tunniussereerfissaq sioqqulluarlugu ataatsimiititaliami allatsimut saaffiginnittariaqaravit (Inatsisartut ataatsimiinnissaata aallartinnissaa minnerpaamik sapaatit akunnerinik arfineq marlunnik sioqqullugu, ajornanngippalli siusinnerujussuakkut).

 

  1. Eqqaamajuk apeqquteqaat aallaavigalugu oqallinnissamik siunnersuutit Inatsisartut Allattoqarfiannut qarasaasiakkut emailikkut pappiaranngorluguluunniit nassiutissagakku. Tamanna partiivit allaffeqarfia aqqutigalugu nalinginnaasumik pisarpoq.

 

 


Nassuiaatit

 

  1. Ulluliunneqartoq tassaavoq ulloq siunnersuutip Inatsisartut Allattoqarfiannut nassiunneqarfia.

 

  1. Siunnersuummut oqaluuserisassani normuliunneqartoq ilanngullugu partiip allaffeqarfianit Inatsisartulluunniit Allattoqarfiannit immersorneqassaaq. UPA tassaavoq upernaakkut ataatsimiinneq, UKA tassaalluni ukiakkut ataatsimiinneq.

 

  1. Apeqquteqaat aallaavigalugu oqallinnissamik siunnersuutip qulequtaa ima aallartinneqassaaq "...pillugu apeqquteqaat allaavigalugu oqallinneq" apeqquteqaallu aallaavigalugu oqallisigineqartussatut siunnersuutigisami sammineqartup naatsumik ersarissumillu nalunaarneqarneranik siuleqartinneqassalluni. Qulequtaa ersarissarlugu allanneqassaaq.

 

  1. Siunnersuuteqartup taaguutaa, aqqa partiilu ilaasortaaffia apeqqutip sammineqartup qulequtaata atinnguani ungaluusap iluani nalunaarneqassapput. Partii ilaasortaaffittut nalunaarneqartoq tassaasinnaavoq ass. "Siumut", "Inuit Ataqatigiit", "Atassut", "Demokraatit", "Partii Naleraq" imaluunniit "attaviitsoq".

 

  1. Itisiliisutaasumik nassuiaat immikkut qulequtsernagu aallartinneqassaaq. Itisiliissutaasumik nassuiaatip apeqqutinut aalajangersimasunut Naalakkersuisut oqaaseqaateqarnissaannik kaammattuut imarigajuppaa (Taamaattumillu "apeqquteqaat aallaavigalugu oqallinnissamut siunnersuummik" taaguuteqarpoq).
Najoqqutassiaq apeqquteqaat aallaavigalugu oqallisissiaq

Apeqquteqaat aallaavigalugu oqallinnissamik siunnersuutip aallartissutigisinnaasaatut assersuut:

 

23.  juni 20091                                                                                                                                      UKA 2009/XX2
 

 

 

Inatsisartut Suleriaasianni § 36 naapertorlugu apeqquteqaat aallaavigalugu oqallisissiaq imaattoq matumuuna saqqummiuppara:

 

...pillugu apeqquteqaat allaavigalugu oqallinnissamik siunnersuut [apeqquteqaat aallaavigalugu oqaluuseritikkumasaq] 3

Inatsisartuni ilaasortaq [Siunnersuuteqartup aqqa], [Siunnersuuteqartup partii ilaasortaaffia] 4

 

 

[Apeqquteqaat aallaavigalugu oqallisitigitikkumasamut tunngavigineqartup itisilerlugu nassuiaatiginera]5