Ataatsimiinnermut ilusissanut piumasaqaatit il.il.

Atortussat oqaluuserisassani immikkoortumut pineqartunut tunngasut tamarmik, allakkatigut saqqummiussissuteqarpat taanna aamma ilanngullugu, Inatsisartut Allattoqarfiannut tunniunneqassapput.

Atortussani oqaluuserisassap normua eqqortoq nalunaarneqarsimassaaq atortussallu kalaallisut qulinngorlugit qaallunaatullu qulinngorlugit tunniunneqassallutik, nassuiaatilli kalaallisut qallunaatullu immikkut 25-inngorlugit tunniunneqartassallutik. Pisarnitsitut atortussat qarasaasiatigut agguaatissavagut, siullermik ilaasortanut partiillu allaffeqarfiinut.

Taamaattorli AIS aamma IAI kalaallisut qallunaatullu immikkut 40-nngorlugit tunniunneqartassapput.

Oqaluuserisassani immikkoortut normussaat ataatsimiinnissaq sioqqullugu nassiunneqareertarput normunillu amerlanerusunik pisariaqartitsisoqarpat taakku inatsisartut@inatsisartut.gl aqqutigalu pissarsiarineqarsinnaallutik. Ilanngullugu eqqaamaqquneqarpoq immikkoortut ataasiakkaat uteqattaartuummata ”aalajangersimasumik immikkoortutut normullit”.

Atortussat taamatuttaaq mailikkut filitut ilanngussatut elektroniskinngorlugit tunniunneqassapput. Atortussat filitut ilanngussatut inatsisartut@inatsisartut.gl-imut nassiunneqassapput. Immikkoortunut ataasiakkaanut tamanut atortussat immikkut nassiunneqassapput. Atortussat allagaateqarfimmi ujaruminarnerunissaat eqqarsaatigalugu immikkoortup normua ajornanngippallu siunnersuutip qulequtaa (naatsumik) emailip qulequtaani takuneqarsinnaassaaq.

Immikkut maluginiaqquneqarpoq ilannngussatut atortussat attuumassutillit tamarmik aamma nassiunneqartussaammata, filillu atserneqarnerani ilanngussaq normu sorleq pineqarnersoq erseqqissumik takuneqarsinnaassammat.

Atortussat ulloq taanna agguaanneqartussatut kissaatigineqartut allattoqarfiup kingusinnerpaamik nal. 13.00 tigoreersimasariaqarpai. Atortussat kingusinnerusukkut tunniunneqarpata atortussat tiguneqartut nalinginnaasumik ullormi tulliuttumi aatsaat agguaanneqassapput.

Oqaluuserisassap normua amerlasuunngortitsinnginnermi atortussat immikkoortuisa tamarmik quppernerata siulliup qulaata talerpiatungaani ataanilu saamiatungaani allanneqarsimassaaq.

Immikkoortumi pineqartumi allagaatit arlaqarpata, allagaatit kalaallit qallunaatullu immikkut tulliuttutut tulleriinnilerlugit ataatsimut kakkiunneqassapput.

• Saqqummiussissut akissuteqaalluunniit

• Inatsisissatut siunnersuut

• Nassuiaatit

• Ilanngussaasinnaasut

Atortussat qarasaasiakkut nassiunneqartillugit oqaluuserisassani immikkoortumut atortussat tamarmik Wordinngorlugit kalaallisut qallunaatullu immikkut nassiunneqassapput filillu aqqa .doc-imik .docx-miilluunniit taaneqassalluni. Ilanngussat regnearkitut pigineqarpata taakku Excelinngorlugit tunniunneqassapput filillu aqqa .xls-imik naaneqassalluni. Ilanngussat PDF-inngorlugit (Portable Document Format) tiguneqartut aamma akuerineqarsinnaapput.

Inatsisartut Allattoqarfiata atortussat tiguneqarnerini atortussat piumasaqaatinik matumani immikkoortuni 1-imi 2-milu takuneqarsinnaasunik eqquutsitsisimanersut uppernarsassavaa. Atortussat piumasaqaatinik immikkoortumi 1-mi 2-milu naammassinnissimanngippata Allattoqarfiup atortussat tiguneqarnissaat itigartissavaa.

Piumasaqaatit tamakku pillugit nalorngissuteqartoqassaqaluarpat Allattoqarfiup allagaateqarfianut allaffimmi fuldmægtigimut David Lynge-Frederiksenimut dafr@ina.alla.gl-imut imaluunniit oqarasuaammut 34 61 33-mut saaffiginnittoqarsinnaavoq.

Allattoqarfik oqaluuserisassani immikkoortunut ataasiakkaanut atortussanik assigiinngitsunik tunniussisoqannginnerani naalakkersuisoqarfinnit aqutsisoqarfinniillu atortussat qanoq iluseqarlutik tunniunneqarnissaat pillugit sianerfigitikkajuttarpoq, taakkulu eqqaasinneqartarput ilusissanut piumasaqaatit il.il. nittartakkatsinni www.inatsisartut.gl-imi takuneqarsinnaammata.”Ataatsimiinnerit” tassungalu isereeruit ”Periaatsit ilusiliinissamullu piumasaqaatit” tuukkit.

Filinik taaguusersuisarneq suleriaatsillu eqqarsaatigalugit malittarisassat www.inatsisartut.gl-imi nassaarineqarsinnaapput. Ingerlaqqiffissaq qulaani imm. 3-mi taaneqartoq takoqquneqarpoq.

Immikkut malugeqquneqarpoq ilanngussatut atortussanik filinik elektroniskiusunik pissusissamisoortumik atsersuisarnikkut atortussat suussusersineqarnissaat immikkoortiterneqarnissaallu ajornannginneralaarsuanngortissammassuk.

Tamakku pillugit apeqqutissaqaraanni taakku e-mailitsinnut inatsisartut@inatsisartut.gl-imut nassiunneqarsinnaapput.

Iluarsiissutinik nassiussisarnissamik pisariaqartitsineq annikinnerpaaffimminiitinniarlugu inatsisilerinikkut misissuataarineq sapinngissamik inatsisissatut siunnersuutit ataasiakkaat saqqummiunneqannginnerini naammassineqareersimasariaqaraluarpoq, tassa sapinngisamik ataatsimiinnermut siunnersuutinik tunniussinissamut killissarititaasoq sioqqulluarlugu.

Inatsisissatut siunnersuutit eqqarsaatigalugit tusarniaasoqarsimappat, taakku inatsisiliornermut najoqqutassiat atuuttut naapertorlugit inatsisissatut siunnersuummut nalinginnaasumik nassuiaatini sukumiisumik allaaserineqarsimassapput. Taamaattumik tusarniaanermut atortussanik tamarmiusunik ataasiinnangorlugit Allattoqarfimmut tunniussinissaq naammappoq. Tusarniaanermut atatillugu atortussat tulliuttut ilaakkajupput:

• Allakkat tusarniaassutip assilineri,
• tusarniaanermi akissutit tiguneqartut assilineri,
• inatsisissatut siunnersuutip tusarniaassutigineqartutut isikkoqarluni assilinera,
• tusarniaanermi akissutit pillugit allakkiortoqarsimappat aamma taanna,
• tamanna inatsisissatut siunnersuummut nalinginnaasumik nassuiaatini takuneqarsinnaanngippat kikkut tusarniaanermi akissuteqaqqullugit kaammattorneqarsimanerat pillugu paasissutissat,
• tusarniaanermut akissuteqarnissamut piffissarititaasoq atorneqarsimasoq pillugu paasissutissat.

Tusarniaanermut atatillugu atortut taakkununnga atatillugu inatsisissatut siunnersuutip Allattoqarfimmut tunniunneqarnerat peqatigitillugu tunniunneqassapput.

Atortussat pappiaranngorlugit qarasaasiakkullu tunniunneqassapput. Pissutsit qulaani taaneqartut isiginiarneqarpata tusarniaanermi atortut tamarluinnarmik nutserneqarnissaat pisariaqanngilaq, taamaattorli Inatsisartut ataatsimiititaliaata imaluunniit ataatsimiititaliap pineqartup allattaata ataatsimiititaliap siunnersuummik suliarinninnissaa eqqarsaatigalugu atortussat taakkuluunniit ilaasa nutserneqarnerinik qaqugukkulluunniit Naalakkersuisunut pissarsiniarsinnaapput.

Taamatuttaaq Naalakkersuisut aalajangiiffigisassatut siunnersuutaat (ass. danskit inatsisiliornerisa Kalaallit Nunaannut atuutsinneqalernissaannik siunnersuutit aamma Namminersorlutik Oqartussat nunat tamalaat akornanni isumaqatigiissutinut ilanngunnissaannik siunnersuutit) nassuiaatillu tusarniaatigineqarsimasinnaasarput. Taamaattoqarsimatillugu naalakkersuisoqarfiit kaammattorneqarput aalajangiiffigisassatut siunnersuummut / nassuiaammut ilanngussami (Tusarniaaneq pillugu allakkiaq) tusarniaanermi akissutit ataasiakkaat imarisaat taakkununngalu Naalakkersuisut oqaaseqaataat nassuiaateqarfigisaqqullugit, taamaalilluni Inatsisartuni partiit ilaasortallu siullermeerinninnissaq sioqqullugu taakkuninnga ilisimasaqalerniassammata, soorlu tamanna inatsisissatut siunnersuutit eqqarsaatigalugit aamma pisartoq.

Taamatut kaammattuuteqarneq isiginiarneqarpat, taava tusarniaanermut atatillugu atortussanut taakkulu nutserneqartarnerannut atatillugu qulaani najoqqutassiat aamma atuutissapput, pissutsit apeqqutaatillugit iluarsiissuteqarfigalugit.

Atortussat tamarmik kalaallisut qallunaatullu tunniunneqartassapput. Tamanna aamma ilanngussanut ilanngunneqartunut atuuppoq.

Pisunili immikkut ittumi, ass. danskit inatsisaannut Kalaallit Nunaannut atuuttussanngortitsisoqassatillugu, imaattoqarsinnaasarpoq atortussat ilaasa danskisuinnaq pigineqarneri. Nunat tamalaat akornanni isumaqatigiissutit eqqarsaatigalugit taamaaqataani atortussat ilaat tuluttuinnaq pigineqarsinnaasarput. Taamaattoqartillugu atortussat saavanni atortussamik kalaallisut (ajornangippallu danskisut) eqikkaasoqarsimasassaaq.

Minnerunngitsumik danskit inatsisaannik Kalaallit Nunaannut atuutilersitsinissamik siunnersuutit eqqarsaatigalugit taakku kalaallisuui immikkut eqqumaffigineqartariaqarput. Tamatumunnga pissutaavoq piffissami kingullermi maluginiarneqarsimmat taamatut peqqussutit arlallit kalaallisut ajorluinnartumik pitsaassuseqartarsimasut.

Inatsisartut Suleriaasiannut ilanngussami Naalakkersuisunit ilaasortanillu saqqummiussisarnerit akissuteqaateqartarnerillu eqqarsaatigalugit aalajangersagaqarpoq. Taamaattumik saqqummiussissutit akissuteqaatit takissutsimikkut piffissanut oqaaseqarfiusinnaasunut naleqqussarneqarsimassapput, taamaalilluni piffissat oqaaseqarfiusinnaasut eqquutsinneqarsinnaaniassammata.

Saqqummiussissutit akissuteqaatillu Inatsisartunut nassiunneqannginnerminni soorunami aamma kukkunersiorneqarsimassappat eqqortumillu oqaasertalersorneqarsimassallutik, taamatullu aamma imarisamikkut kalaallisut qallunaatullu assigiissallutik.

Nalilerneqarpat atortussanik saqqummiussineq piffissat oqaaseqarfiusinnaasut suleriaatsimut ilanngussami taaneqartut iluanni pisinnaanngitsoq, taava Inatsisartut Siulittaasoqarfiat nammineq aalajangiinini tunngavigalugu periarfissaqarpoq sivisunerusumik oqaaseqarnissamik kissaatit  akuerinissaannut. Tamanna pillugu qinnuteqaatit sivisunerusumik oqaaseqarnissap kissaatigineqartup sivisussusissaa erseqqissumik nalunaarlugu sapinngisamik siusissukkut saqqummiunneqartariaqarput, tassa qinnuteqaatit taamaattut siunnersuutip suliarineqarnissaa sivikinnerpaamik nalunaaquttap akunneri 48-t sioqqullugit tiguneqarsimanngippata suliarineqarnissaat aallaavittut isigalugu naatsorsuutigineqarsinnaanngilaq. Sivisunerusumik oqaaseqarsinnaanissamik qinnuteqaatit inatsisartut@inatsisartut.gl-imut.

Kingusinnerpaamik siunnersuutinik tunniussinissamut killissarititaasumi siunnersuutinik tunniussinermut atatillugu immikkoortunut Naalakkersuisunit nalunaarutigineqartunut takussutissiamik tamarmiusumik tunniussisoqassaaq.

Takussutissiami immikkoortut ataatsimiinnerup ingerlanerani oqaluuserisassatut kissaatigineqartut tamarmik nalunaarsimassapput. Immikkoortut siunnersuutinik tunniussivissatut killissatititaasumi Inatsisartunut agguaanneqarnissaminnut suli piareerneqarsimanngitsut eqqarsaatigalugiut nalunaarutigisat allattorsimaffianni erseqqissumik tamakkiisumillu takuneqarsinnaassapput:

1. Atortussat sooq piareersimanngillat?
2. Atortussat qaqugu nassiunneqarsinnaappat?
3. Immikkoortoq aatsaat nalinginnaasumik ataatsimiinnissami naatsorsuutigineqartumi tullermi oqaluuserineqassagaluarpat tamanna sunik kinguneqarsinnaava?

Immikkoortup ataatsip arlallilluunniit qaqugukkut oqaluuserineqarnissaannik Naalakkersuisut immikkut kissaateqarpata immikkoortullu ataatsimut suliarineqarnissaannik kissaateqassagaluarpata taakku oqaluuserisassatut nalunaarutigisat allattorsimaffiannut ilanngunneqassapput.

Inatsisissatut aalajangiiffigisassatullu siunnersuutit eqqarsaatigalugit maannamut suleriaasiusimasoq malillugu taakku Inatsisartunut agguaanneqarnerannit siunnersuutip siullermeerneqarnissaanut sapaatit akunneri pingasut ingerlareersimasussaapput.

Siunnersuut siullermeerinninnerup kingorna sapaatit akunneri pingaasut qaangiutsinnagit aappassaaniigassanngortinneqarneq ajorput, inatsisissatullu siunnersuutit eqqarsaatigalugit siunnersuut aappassaaneerinninnerup kingorna sapaatip akunnera ataaseq qaangiukkaangat aatsaat pingajussaaniigassanngortinneqartarluni.

Inatsisissatut siunnersuutit ilaasa aappassaaneerneqarnissaat pingajussaaneerneqarnissaallu ataatsimiinnermut tulliuttumut kinguartinneqarsinnaanersoq/kinguartittariaqarnersoq taamatuttaaq paasissutissiissutigineqartariaqarpoq.

Oqaluuserisassat suleriarineqarnerannut atatillugu kingusinnerpaamik ullormi siunnersuutinik tunniussinissamut killigitinneqartumi Naalakkersuisunut ilaasortat ataasiakkaat ataatsimiinnerup ingerlanerani najuutinnginnissaannut takussutissiortoqarsimassaaq. Takussutissiami ullut sorpiaat Naalakkersuisunut ilaasortap pineqartup Inatsisartuni oqaluuserisassaataasa suliarineqarnerini peqataaffigisinnaannginerai nalunaarneqarsimassapput, tassalu ullut angallaviusussat aamma ilanngunneqarsimassallutik.

Ataatsimiinnissamut oqaluuserisassat suliarineqarneranni sapinngisamik najuutinnginnissat ullormi siunnersuutinik tunniussiviusussami nalunaarutigineqarsimasut isiginiarneqarumaarput, tamatumali pisuni ataasiakkaani isiginiarneqarnissaa qularnaarneqarsinnaanani. Angalanissanut pilersaarutit najuutinnginnissallu allat aatsaat kingusinnerusukkut nalunaarutigineqartut pissutigalugit oqaluuserisassat allanngortinneqarnissaat aallaavittut naatsorsuutigineqarsinnaanngilaq. Taamaattumik Naalakkersuisut ilaasortaq Inatsisartuni ”oqaluuserisassaatimi” ilaata suliarineqarnerani angalasariaqarsimassappat, Naalakkersuisut ilaasortap allap pineqartup suliassaatai taanna sinnerlugu Inatsisartunut saqqummiuttariaqassavai.

Ataatsimiinnerit nalaanni isumasioqatigiinnernik, isummersoqatigiinnernik assigisaannillu Inatsisartunut ilaasortanut soqutiginarsinnaasunik aaqqissuussisoqartarnera Allattoqarfiup akuttunngitsumik misigisarpaa. Aaqqissuussinerit taamaattut piffissaagallartillugu pilersaarusiorneqarsimasariaqarput Inatsisartunilu ataatsimiinnerit isiginiarlugit piffissalerneqartariaqarlutik. Inatsisartut ataatsimiittarfianni ataatsimiinnerit nalinginnaasumik marlunngornerni, pingasunngornerni sisamanngornerilu nal. 11:00-imiit 16:00-imut inissisimasarput. Naalakkersuisoqarfiit maannangaaq isumasioqatigiinnernik, isummersoqatigiinnernik assigisaannillunniit Inatsisartunut ilaasortanit peqataaffigineqartussatut naatsorsuutigineqarsinnaasunik pilersaarusiorsimappata taava taakku pillugit paasissutissat siunnersuutinik tunniussinissamut killissarititaasoq eqqorlugu Siulittaasoqarfimmut nassiunneqarsimasariaqarput.

Ataatsimiinnissami aggersumi ullut ataatsimiiffiusussat inaarutaasut nittartakkami takuneqarsinnaapput.

Iluarsiissutit atorneqartarnerat Naalakkersuisut inatsisiliornermut najoqqutassiaanni kiisalu Inatsisartut nittartagaanni suleriaatsinut ilusissanullu piumasaqaatinut takussutissiami eqqartorneqarpoq.

Inatsisartut Allattoqarfiat ajoraluartumik akuttunngitsumik iluarsiissutinik tigusaqartarpoq ilusissanut piumasaqaatinut naapertuutinngitsunik. Iluarsiissutit taakku ajoraluartumik itigartinneqartariaqartarput.

Taamaattumik ilusissanut piumasaqaatit taakku malinneqartariaqarnerat eqqaasitsissutigissallugu pisariaqartutut isigineqarpoq.

Inatsisartut suleriaasianni § 35 tassungalu atatillugu aalajangersakkat naapertorlugit nassuiaatit pinngitsoorani Inatsisartuni isumaqatigiinniutigineqartussat ikittuinnaapput. Tamatumani assersuutigalugu Aningaasaqarniarnikkut ingerlatsineq pillugit nalunaarut pineqarpoq. Inatsisartut Suleriaasianni § 35, imm. 5 takoqquneqarpoq. Siulittaasoqarfik tamatuma saniatigut pisuni immikkut ittuni nalunaarutit isumaqatigiinniutigineqarnissaannut akuersissuteqarsinnaavoq.

Nassuiaatip isumaqatigiinniutigineqarnissaa Inatsisartut namminneq akuersissutigisimappassuk tamanna pisutut immikkut ittutut isigineqassaaq.

Tamatuna saniatigut pingaarnerut malittarisassatut erseqqilluinnartutut nassuiaatit isumaqatigiinniutigineqarnissaat naatsorsuutigineqarsinnaanngilaq.

Nassuiaatit taamaallaat agguaanneqartussatut kissaatigineqartut ukioq kaajallallugu nassiunneqarsinnaapput. Taakku eqqarsaatigalugit qarasaasiakkuinnaq agguaanneqarnissaat akuerineqarsinnaavoq, taamaattorli Inatsisartut Allattoqarfiata kaammattuutigaa agguaassineq aamma pappiaranngorlugu pissasoq, agguaassassat qulaani imm. 1-imi taaneqartutut amerlassusilerlugit.

Ataatsimiinnerit nalaanni nalinginnaasumik ullormut ataasiarluni arlaleriarluniluunniit atortussat taamatut nassiussuunneqartarput.

Inatsisartut Suleriaasianni § 37, imm. 5 naapertorlugu ataatsimiinnerit nalaanni sapaatip akunnikkaartumik akunnermik apeqquteqarfiusinnaamik ingerlataqartoqartarpoq. Akunneq apeqquteqarfiusinnaasoq taanna nalunaaquttap akunnerata ataatsip iluani ingerlanneqartarpoq, tamatumani Naalakkersuisunut ilaasortaq ataaseq Inatsisartunut ilaasortanit siumut nalunaarutigereerneqarsimanngitsunik toqqaannartumik apeqquteqarfigineqartarluni. Akunneq apeqquteqarfiusinnaasoq nalinginnaasumik pisarnertut pingasunngornerni nal. 10:00-imiit 11:00-imut ingerlanneqartarpoq. Naalakkersuisunut ilaasortanut apeqquteqarfigineqarsinnaasunut takussutissiaq ataatsimiinnerup aallartinnginnerani Inatsisartunut nassiunneqartariaqarpoq.

Inatsisartut Siulittaasoqarfiat pisariaqartitsineq malillugu ataatsimiinnerit ingerlanerani akuttunngitsumik ataatsimiittarput. Siulittaasoqarfik siusinnerusukkut periaaserineqarsimasutut ataatsimiinnerup nalaanni ullut tamaasa ataatsimiittarunnaarnikuuvoq.

Saaffiginnissutit Inatsisartut Ataatsimiittarfianni isumaqatigiinniarnernut pingaarutillit malittarisassatut pingaarnertut ima piffissaagallartigalugu nassiunneqartariaqarput Siulittaasoqarfik saaffiginnissummik suliarinninnissamut angumerinnissinnaasariaqarluni. Saaffiginnissut Inatsisartut Ataatsimiittarfianni immikkoortumut aalajangersimasumut pingaarutilik malittarisassatut pingaarnertut kalaallisut qallunaatullu nassiunneqartariaqarpoq immikkoortup Inatsisartut Ataatsimiittarfianni suliarineqarnissaa sivikinnernerpaamik nalunaaquttap akunnerinik 48-nik sioqqullugu.

Siulittaasoqarfimmut saaffiginnissutit kalaallisut qallunaatullu inatsisartut@inatsisartut.gl-imut nassiunneqartassapput.

Aalajangiiffigisassatut siunnersuuteqarnermi qulequtaq taasissutissaq kiisalu siunnersuummut tunngavilersuut eqqarsaatigalugu ilusissanut piumasaqaatit eqquutsinneqarsimanissaat qularnaarneqartariaqarpoq. Taamaattumik Inatsisartut Allattoqarfianni ataatsimiititaliat allattaat tamanna pisariaqartinneqassagaluarpat aalajangiiffigisassatut siunnersuutit saqqummiunneqannginnerini ikiuinissaminnut piareersimapput. Tamanna kissaatigineqarpat pisortatigoortumik emailerput inatsisartut@inatsisartut.gl atoqqunneqarpoq.